性交轉運打喪屍: （139）

喺喪屍爆發嘅第十年，時光機終於完成，乘哥送左十個手下（包括Alpha）回到過去，進行第一次拯救計劃。

（既然可以穿越時空，理應要直接穿越返去阻止喪屍出現，問題係根本無人知喪屍係點嚟，喺毫無線索之下好難追溯源頭，更莫講話阻止喪屍出現。）

根據Alpha憶述，第一次行動係失敗而回，原因係一返到去就遇到喪屍圍攻，連城大門口都入唔到。

對乘哥嚟講，一次失敗、兩次失敗、三次失敗、再多次失敗都無所謂，因為只要成功一次，咁歷史就會改變。

乘哥吩咐嗰位科學家去完善時光機穿越嘅精準度，仲叫對方研發一啲厲害嘅武器同裝備，之後再過多左八年，嚟到左第十八個年頭，亦係Kappa成年嘅一年。



養兵千日，用在一時，原有嘅手下死剩Alpha一個，乘哥吩咐Alpha帶住呢批實驗室人類穿越過去。

等左咁多年就係等計劃成功一刻，可惜喺出發前嘅一個禮拜，年老嘅乘哥敵唔過歲月，生命壽終正寢，斷氣前千叮萬囑Alpha一定要成功救到Professor Dave，繼而改變歷史，因為佢話相士批佢係有一百四十歲命，如果唔係喪屍擾亂左世界，佢係唔會咁早死。

事實上，計翻條數，佢死嗰陣都差唔多百二歲，Alpha話佢啲仔早就瓜曬，佢已經係死最後。

正所謂「池中無魚，蝦稱霸」，Alpha做左人地條𡃁咁耐，依家要發圍想做大佬，一心就係要將解藥嘅資料帶返未來，因而造就出我地當前呢個局面。

「簡單一句就係，如果你選擇交隻usb俾李氏，咁歷史就會改變，香港喺2021變返正常，即係話穿越計劃唔會出現，無左呢個計劃，Kappa都唔會出現。同埋唔單止佢會即刻消失，連隨你同佢一齊嘅嗰啲記憶，都會統統忘記得一乾二淨，包括你地上過幾多次床，happy過幾多次，以後都無法再回味，乜你真係想咁樣？」Alpha呢句說話大概總結左此刻矛盾嘅局面。



如果根據原定計劃將解藥資料交俾乘哥，咁Kappa就會消失，但係如果唔將資料拎出嚟，唔解決呢個喪屍危機，咁唔通我地一路要活喺呢個充滿喪屍、無水無電嘅世界？

我同Kappa交換一下眼神，大家臉上都流露苦澀嘅表情。

從相遇到相識，雖然只係短短嘅日子，但我地卻一齊經歷左好多嘢，回憶之中有驚心動魄嘅場面，有無傷大雅嘅吵鬧，亦有激情且甜蜜嘅靈慾結合。

當一諗到同我有過咁多經歷嘅人，會喺呢個世界徹底消失，甚至變成從來都未存在過一樣，個心就un住un住咁十分難受。