性交轉運打喪屍: （124）

此時此刻，望住Kappa，我只有一個問題：到底佢係咩人？

而呢個問題，我無問出口，因為我知佢唔會答。

時間逐漸流逝，半日就咁去。

照住usb上嘅資料，阿得按原有嘅材料，再加上楊過帶抗體嘅血液，終於製成出透明無色嘅解藥。

嗰班裝甲人將我地幾個再次group埋一齊，帶去Alpha面前。



Alpha就命令兩個手下捉住並張開Jojo個口，跟手佢拎起檯上嘅解藥，滴落去Jojo個口入面。

三秒過後，Jojo雙眼出現轉變。由白色慢慢變返做黑色，同時喪屍嗰種咆哮都轉化為正常嘅狗吠聲。

「汪！汪汪！」

同上次唔同嘅係，今次Jojo正常返就無再反彈，變返喪屍。

「皇天不負有心人！哈哈哈哈哈—」Alpha揸住解藥，仰天大笑。



另一邊廂，楊過見到自己隻狗回復原狀，開心到忍唔住想衝埋去想攬攬。

Alpha就以為佢想搶解藥，即刻用槍柄打到楊過訓低。

回復正常嘅Jojo，終於認得返主人。

佢見到主人俾人打，立即嬲到狂吠，並用力從兩個裝甲人手上掙脫，然後跳起咬Alpha嘅手指。

Alpha全身著住裝甲，俾隻狗咁樣咬，當然係不痛不癢。



問題係Jojo咬得好實，條友fing左兩下都fing唔甩，唔耐煩起上嚟，竟然用另一隻揸住激光，對住Jojo開槍。

「唔好！」楊過想撲去阻止，無奈已經太遲。

綠色激光將Jojo個身射到爆開，霎眼之間就化作一堆血色肉醬。

我地全部人都睇到呆左，其中最嬲嘅一定係狗嘅主人楊過。

「仆街！我要同你死過！」

楊過嬲到塊面紅曬，唔理對方有槍，用強壯嘅身體，好似隻牛咁衝去撞跌Alpha。

Alpha無預計楊過會激烈反撲，成個人俾撞到落地下，手上嘅激光槍亦隨之跌走左。

楊過壓住Kappa，猛用拳頭對住對方頭部狂砌。



我從未見過楊過咁兇狠，咁暴力，證明佢真係極度憤怒。

由於二人糾纏一齊，所以其他裝甲人怕開槍會傷到Alpha，只能選擇埋身制服楊過。

呢班裝甲人個個都打得，不過唔好唔記得，楊過亦都係一個好抽得肌肉佬，加上呢刻憤怒值爆燈，就算咁多人圍佢，都未必一時間對付到佢。

面前一輪大混戰，我地其他人除左得個「睇」字，唔知可以做咩好。

「停手！」

呢一把係Kappa嘅聲音。

楊過好聽話，隨即就停手。



原因唔係佢俾面Kappa，而係對方揾左把鋒利嘅刀仔，「杭」住佢條頸，逼到佢無得唔停手。

Alpha起返身，臉上嘅面罩裂開左，露出左真樣。

呢條友係一個外表兇惡嘅中年男人。

「係你？我認得你…」

呢個時候，阿得眼定定望住Alpha個真樣：「唔係唔係！我之前見你，你個樣無咁…無咁…老？？？但係...我好肯定無認錯人…你就係…喺我背脊劈左一刀嘅嗰條仆街！」