性交轉運打喪屍: （123）

Kappa見返自己嘅同伴，又驚又喜：「Alpha，你地點知我喺度嘅？」

嗰個戴臂章嘅裝甲人揸住一舊，火柴盒咁大黑色物體：「咪係你話俾我地聽。」

「但我個通訊器，明明壞左…」

Kappa諗唔明，於是從褲袋拎自己嗰舊通訊器出嚟，並嘗試對住嚟講嘢。

結果，嗰個叫Alpha，戴住臂章嘅男人，手上嘅通訊器真係收到聲。



「乜部機無壞到？」Kappa感到好驚訝。

Alpha對住自己個通訊器講嘢，調返轉Kappa就接收唔到：「你嗰部機受過損壞，所以聽唔到我講嘢，但你講嘢我就聽到。」

呢個時候，Sandy忽然開口質問Kappa：「你班friend一嚟就揾槍指住我地，咁係咩意思？」

「……」Kappa卻無言以對。

然之後，楊過亦忍唔住問班裝甲人：「究竟你地係咩人？有咩企圖？」



「我地係咩人，你地唔需要知，我地嚟呢度，只係為左一樣嘢，就係解藥。」

Alpha嗰把機械聲，隱隱然有種陰森嘅感覺。

「咁你地係咪乘哥嘅人？係咪嚟搶解藥？」Sandy一口氣問。

旁邊嘅Shirley驚家姐得罪呢班人，細細聲勸：「算啦家姐，唔好問咁多。」

「乘哥？呵！呵呵呵！」Alpha無正面回應，只係大聲冷笑幾聲。



「咁係咪我地俾解藥你，你就放過我地？」輪到阿得忍唔住發問。

Alpha又係無答問題，淨係行到阿得面前，隔住個面罩，似乎喺度打量緊對方。

「係咪只要俾解藥你，你地就會放我地走？」阿得再問一次。

Alpha點點頭，然後吩咐：「Kappa，你拎解藥同嗰啲資料過嚟。」

Kappa照吩咐將插住usb嘅Notebook，同埋阿得琴日整嘅半製成解藥，交到對方面前。

「呢啲資料都係嚟自Professor Dave？」Alpha對住個mon問。

Kappa「嗯」一聲回答。

Alpha跟手拎起樽半製成品解藥:「顏色似乎唔對板，真正嘅解藥應該係透明無色，但呢樽嘢卻係紅色，點解會咁？」



Kappa再向對方解釋原因，照咁睇，Alpha應該係佢領隊、隊長嗰類嘅人，所以要咁服從。

「哦~原來係咁~」

「你！」Alpha突然指住阿得，「我要你即刻幫我，將真正有效嘅解藥整出嚟！」

咁樣俾幾支槍指住，阿得梗係無得say no。

「你！」Alpha跟住又兇楊過，「我要你啲血！」

楊過就回應：「可以，不過有條件，我要先知道你地係咩…」

「蕉！」



「Boom！」

Alpha單手揸住槍，恐嚇式向住左手邊開火。

一道綠色激光射出嚟，直接射爆左近門口嗰間沖涼房。

「你地，無資格同我講條件。」Alpha嚴正警告我地。

喺呢班裝甲人嘅威逼之下，阿得同楊過只能就範，為佢地整解藥。

至於我同Sandy、Shirley呢啲無作用、又幫唔到手嘅人，就被其他裝甲人押到角落頭。

我腦袋空白一片，分析唔到呢刻究竟發生緊咩事…

唔計Kappa，眼前裝甲人一共有十二個。



Alpha連同另外兩個裝甲人，監督住阿得同楊過，其餘嘅就三個對一個，看住我同另外嗰兩姊妹。

留意到裝甲人之間，都係用啲奇怪嘅英文名互相稱呼，有啲叫Delta，有啲又叫Gamma。

「唔洗驚，佢地唔會傷害你地架。」

Kappa揾辦法，使開看管我嘅嗰三個裝甲人，偷偷地埋嚟對我講。