性交轉運打喪屍: （125）

 
「呵呵！估唔到，咁樣都俾你認得出。」Alpha冷笑一聲。

「你呢個樣…你身上嘅裝備…」阿得仔細打量Alpha，得出一個大膽嘅推論：「你…係咪從未來…穿越時空返嚟？」

「好嘢喎，一估就估啱左。」

我打左個突，心諗唔係呀嘛，時空穿越？咁即係話，Kappa係未來人？

無可能，又唔係拍戲，呢個世界點會有時空穿越？



「莫非係李瓜乘派你穿越返嚟揾解藥？」阿得追問。

「哈哈哈哈哈哈哈！」

Alpha無端端喺度大笑：「你所認識嘅嗰一個係以前嘅我，依家嘅我不受任何人控制，相反，我甚至好快會主宰一切！哈哈哈哈—」

條友食錯藥咁款，猛咁喺度笑。

趁大家嘅注意力放喺Alpha身上，楊過乘機反抗，想出手撥走「杭」住自己嘅刀仔，殊不知Kappa反應好快，避開楊過隻手，並換埋另一隻手揸刀。



本來刀鋒對住楊過前頸，依家轉到去後頸位置。

「求下你唔好郁，我唔想傷害你。」Kappa對楊過講。

「講得啱，千其唔好整親呢位仁兄，仲要好好保護佢，因為我地要帶佢返去，用佢嘅血幫我地整解藥。」Alpha對Kappa講。

「你咩意思？你想帶我去邊？」楊過大聲問。

「當然係帶你同我地一齊返去未來啦。」



「首先我唔信你地係咩未來人，第二，就係我點都唔會屈…」

楊過未講完，阿得就爭住問Alpha：「話俾我聽！你地係點由未來返嚟？係用時光機？定係有其他能穿梭時空嘅辦法？」

「無錯，你又估啱左，我地係用時光機返嚟。」

阿得聽到「時光機」三字，立即雙眼發光。

「依家諗返起，好彩當日俾你走得甩，如果唔係，穿越返嚟後嘅我，都唔會遇到你，無你嘅話，我地就試唔到，原來Professor Dave嘅配方真係有效。」

「我想跟埋你穿越返去未來，我可以幫你大量生產解藥，只要你可以俾我用一次時光機。」阿得帶住哀求嘅語氣講。

Alpha一下冷笑：「你知唔知除左普通喪屍，仲有兩種變種喪屍，如果你整到呢兩種解藥，咁考慮一下你頭先嘅說話。」



「變種喪屍？但隻usb入邊，好似無提到變種喪屍嘅配方。」阿得話。

「啱途我地遇到綠眼喪屍同紅眼喪屍嘅屍體，或者可以俾你研究、分析一下。」

隨即，Alpha命令手下將一隻綠眼喪屍，以及紅眼喪屍嘅屍體帶上嚟。

綠眼喪屍頭殼爛曬，紅眼喪屍就全身焦燶，呢兩隻嘢分明係我同Kappa打死嘅兩隻變種喪屍。

Alpha對阿得講：「我俾廿四小時你，如果你搞得掂，咁我就會考慮考慮你剛才講嘅說話。」

阿得諗都唔諗就應承左。

「好啦！大家係時候郁動一下」Alpha對住嗰班裝甲人下令，「除左呢個整藥嘅同輸血嘅，呢三條友統統殺無赦。」

佢口中嘅三條友正是我、Sandy同Shirley。



命令一出，Alpha連同其他裝甲人同時舉槍，分別指住我地三個。

Kappa二話不說，雙手打開，擋喺我面前：「唔得！你地唔可以傷害佢！」

「Kappa，你咁係咩意思？呢幾個人毫無用處，而且又知道我地身份，係絕對唔可以留活口。」

「我唔理，總之我唔能夠俾你傷害佢！」Kappa寸步不讓。

對方咁樣嚟保護我，令我非常之感動。

「哼！我嘅命令你都敢違抗！不知好歹！」Alpha冷血無情，居然對住Kappa掹雞。

「蕉！」



呢一槍無射中我地，卻射上天花板，產生巨大嘅爆炸。

頭先Alpha開槍嘅一瞬間，無人看管嘅楊過趁機使出蠻牛一般嘅力氣，飛撞過去，導致對方瞄準失敗，射左上上面。

綠色激光射爆天花，石屎粉碎並不斷墜落，揚起滾滾灰塵。

「走！快啲走！」Kappa催促我同Sandy、Shirley離開。

「弊啦，你隻腳流緊血。」我見到對方左腳腳腕受傷流血，可能係頭先俾跌落嘅石屎擊中。

「你唔洗理我，快啲走！」

「唔得，我唔可以丟低你！」我拖起Kappa隻手，想帶佢一齊走。

至於Sandy同Sandy無猶豫咁多，直接趁混亂從門口跑左出去。



Alpha一邊喺地上同楊過肉搏，一邊命令其他裝甲人：「捉住佢地！唔好俾佢地走！」

說話一出，就有兩個裝甲人出拳揮向我。

Kappa第一時間推開我，並一己之力頂開兩個裝甲人：「唔洗理我架，我唔會有事，你走啦！」

「但係…」

「走呀！」Kappa好決斷咁叫我離開。

猶豫左三秒，最後決定聽從對方嘅說話，選擇暫時離開呢度。

我向住門口奔跑，從後有幾個裝甲人追得好貼，幾乎伸手就捉到我。

好彩，咁啱頭上有塊大石屎跌落嚟，砸到佢地訓低，咁先俾我勉強咁成功走出去門口。