性交轉運打喪屍: （97）

落去行人天橋，過到對面馬路，大約行左一百米，經過一間地產鋪。

鋪頭打開門，我地睄到入面無喪屍又無人，於是決定匿入去。

我啱踏入內，正想閂埋玻璃門，無端端有隻喪屍撲落地下，捉住我後腳。

我嚇左一大跳，猛咁踢腳，用力踢走佢隻手，並及時閂實玻璃門。

只要行慢一步，就唔係俾隻嘢捉後腳咁簡單，而係成個人會被撲低。



我地搬啲檯櫈塞住門口，跟住摷揾曬啲櫃桶，卒之搵到支細電筒。

我四周圍照下，間鋪頭好細，佈置簡單，得三張檯同三張櫈同埋一部影印機，地下各處就散落一張張地產傳單。

Kappa解除裝甲，席地而坐。

我挨住墻身，坐喺佢對面，呢刻出面喪屍嘅叫聲停左落嚟，好安靜。

過左一陣，Kappa出聲：「係咪肚餓呀你？」



「少少啦。」我答。

「等我搵下地下，有無螞蟻，捉兩隻俾你。」

「螞蟻？」我一頭霧水。

跟住對方問我：「可唔可以，借你手上嘅電筒，用一用？」

我用電筒照過對面，Kappa手心捧住一隻簷蛇。



佢啱啱唔係同我講嘢，係同隻簷蛇。

「哇！乜你仲帶住隻嘢喺身？」

我嚇左嚇，當堂坐遠少少，驚死隻四腳蛇爬過嚟。

Kappa當正隻嘢係寵物，又同佢玩又任佢躝上身，睇到我毛管棟。

「支電筒…」對方挨近想拎我支電筒。

「得得得，唔好埋嚟。」 我縮一縮，將支電筒碌過去。

「係啦，聽日我地，」Kappa問。

「如無意外，應該去得到嘅。」



Kappa放隻壁虎上膊頭，拎張地圖出嚟，用電筒照住嚟睇，又細細聲口噏噏咁數手指。

我聽唔清佢講乜，慢慢合埋眼，不知不覺就訓著左。

第二日。

陽光穿過玻璃門，折射入舖頭，我係俾熱醒。

睜開眼第一個瞬間，見到Kappa挨住我膊頭，訓得好稔。

太陽映照在佢身上，令潔白嘅皮膚，睇落白到透光。

我望住佢，望得入神。



其實除左套甲，佢同一般鄰家少女無咩分別，一樣清純，一樣可愛。

身早流流，「細佬」本來硬硬地，望多兩眼，忍唔住伸手，想掂下佢手臂。

殊不知，隻壁虎忽然喺佢背後鼠出嚟，嚇到我縮手兼彈起。

我反應大到嘈醒左對方。

佢一睜開眼，神經反射式咁，雙手遮擋太陽：「哇…好光…」

「係呀，天光啦，起身啦。」

Kappa趴起身，繼續瞇起雙眼，並用手遮擋太陽。

佢將隻壁虎放落一個細紙盒，再放落褲袋，隨後先著返副甲。



話時話，佢條工裝褲褲袋都幾大，都放得落幾多嘢。

鋪頭掛墻嘅鐘顯示，現在時間係早上九點。

事不宜遲，我地係時候重新啟程，繼續往鰂魚涌方向進發。

儘管Kappa無左激光槍，但托賴一路上我地唔算遇到好多喪屍，憑佢嘅身手基本上都可以應對到。

行左都大半日，無錯嘅話，照計係已經嚟到左鰂魚涌。

但係，我未去過嗰棟大廈，加上又唔熟港島嘅路同埋無google map，因此揾左好耐都揾唔到嗰棟大廈。

「點呀？仲未到？」Kappa丟走手上嘅可樂空罐。



經過琴日飲太多可樂，導致危急關頭急尿，今日佢學精左，飲慢啲亦飲少左。

「再揾下，應該係喺呢頭嘅啫。」

行行下，有督雀屎從天而降，跌落我嘅膊頭。

隨之，心中浮現起一種久違嘅感覺。