性交轉運打喪屍: （98）

以前個人行開衰運，中雀屎踩狗屎呢啲都係家常便飯，但自從掛上轉運符，性交轉左運，就無再發生呢啲事。

因此，呢督喺久違嘅雀屎。

我行到對面馬路嘅公園仔，到草叢掹幾塊樹葉，抿走督屎。

「踏踏…踏踏…」

身後忽然傳來密集而急促嘅腳步聲。



我同Kappa不約而同擰轉面。

十幾隻…十幾隻喪屍正向住我地湧緊過嚟。

嚇到我地立即逃跑，跑無兩步又遇到七、八隻喪屍擋路。

面對前後夾擊，此刻無路可走。

「後面嗰班我對付，前面呢班你搞掂！」



Kappa遞佢把軍刀俾我，跟手喺腰間拎出另一把軍刀，轉身對付後面嘅喪屍。

剩我自己一個面對七隻喪屍，雖則開講有話「雙拳難敵四手」，不過我有運氣加持，照計會搞得掂嘅。

「Raaauuggghh！！！」

行最前嗰三隻皮膚蒼白，滿手鮮血嘅喪屍率先衝埋嚟。

我向住佢地揮動軍刀，舞左兩下，就俾其中一隻喪屍拍走左把刀。



同時間，另外兩隻喪屍，一個捉住我膊頭，一個就捏住我條頸。

情況唔太妙計，但係我都仲未識驚，因為深信運氣最後會降臨並拯救我。

好快另一邊膊頭都俾喪屍捉住，而捏住我條頸嘅喪屍哄埋嚟想咬我。

我個身完全郁唔到，個頭就左右擺，望天望地，等緊幾時有嘢飛落嚟砸中喪屍個頭，或者地下有嘢爆開。

再等多三秒，鋒利嘅牙齒快要碰到我條頸，捉住兩邊膊頭嘅喪屍亦都想咬落嚟。

呢一刻，我個心終於開始慌。

仆街！啲運氣呢？去左邊？

我個腦仲諗緊點解運氣消失嘅時候，一把軍刀掠過我耳邊，直插面前嗰隻就嚟咬到我嘅喪屍。



隨即捉住我膊頭嘅兩隻喪屍，又俾兩拳打走。

出手相救嘅正是Kappa。

「無嘢呀嘛？有無被咬？」

「無…無事…」我答。

後面嘅喪屍未解決曬，Kappa又轉身迎擊。

我執返起軍刀，唔計瓜左一隻，面前有六隻喪屍並排咁圍埋嚟。

我拎個轉運符出嚟，用手緊緊咁握住佢，心裡面不斷向幸運之神祈禱。



幸運之神，求下你賜我幸運！

六隻喪屍對住我咆哮，且不約而同撲埋嚟。

唔理三七二十一，我不停舞動手上把七吋軍刀。

結果，運氣真的失了蹤。

就算我對住喪屍斬，都係斬唔中，反而又一次被拍走把刀。

究竟發生咩事？點解啲強勁嘅運氣會無左嘅？

琴日仲好地地…

唔係…琴晚匿入地產鋪時，喺門口俾喪屍捉住後腳，嗰下差啲中伏被咬。



唔通我嘅運氣就係從琴晚開始減退？

諗起呢道係一道性交轉運符，莫非係要keep住性交，咁運氣先能夠保持？

計返我對上一次搞嘢，應該係前日下晝，琴日同今日加埋，計落已經接近四十八小時無做過愛，所以運氣就咁而流走？

係咁嘅話...咁...咁應該點算？

算啦！無好諗呢啲住，六隻喪屍正喺面前張牙舞爪。

今次我無學剛才咁，企定定等死，擰轉頭匿去Kappa度：「唔掂啦唔掂啦，打唔過咁多喪屍，快啲走佬！」

「啲喪屍擋住啲路，點走？」Kappa一邊講，一邊左右揮拳，接連擊退眼前兩隻喪屍。



佢真心犀利，十幾隻喪屍已經打低左五六隻，相反我就一隻都搞唔掂，唯一冧低嗰隻，都係佢幫我對冧

「走唔到…走唔到就『捐』啦！」我話。

「捐？」

「係呀，你跟住我做就得。」

咁多隻喪屍入面，有隻喪屍生得比較高，對腳mak得特別開。

我睇準時機，踎低捐過佢褲浪，最後真係俾我成功穿過屍群。

至於Kappa無照我咁做捐褲浪，因為佢係屍堆左揾到缺口突破。

「Raaauuggghh—」

成班喪屍窮追不捨，我地二人衝上斜坡，有理無理匿入去一間傢私鋪。

我頂住門口唔俾出面嘅喪屍入嚟，Kappa就負責對付，匿喺店入面嘅三隻喪屍。

佢折斷餐檯嘅木腳，以此作武器先插爆一隻喪屍嘅頭，跟手用相架套住兩個喪屍，再揾花樽扑爆埋佢地個頭。

不消三分鐘，佢解決店內嘅麻煩後，就埋嚟幫手頂住道門。

道門雖然係玻璃造，但明顯係強化過同加厚過嘅玻璃，班喪屍拍極都唔爛。

我地雙方僵持左好一陣，直到個天烏雲積聚，開始行雷閃電，班喪屍先俾嘹亮嘅雷聲引走。

一齊推三張大梳化頂實道門後，Kappa坐到店內陳列嘅一張床度休息。

頭先真係好險好險，一直靠住運氣對付喪屍嘅我，一旦失去運氣就揦手唔成勢，幾乎命都無。

然而，要重新增強返運氣，就只得一個方法。

望住心口黯然無光嘅轉運符，再望一眼Kappa，腦中浮現出一個諗法。