性交轉運打喪屍: （96）

現已黃昏時分，天色金黃絢麗，落日嘅餘暉映照在馬路上。

我同Kappa沿住電車軌，朝住鰂魚涌方向慢慢前行。

以我地嘅步速，假若一路無阻嘅話，估計半日能夠行得到。

我負責帶路，一邊行，一邊幫Kappa拎住，放埋二十幾罐可樂嘅大膠袋。

至於身邊嘅Kappa就負責清除攔路嘅喪屍，佢右手揸住槍，左手揸住可樂，飲完一罐又一罐。



睇嚟佢真係好鍾意飲可樂。

「好似天要黑，我地仲要行幾耐。」Kappa「gur」一口氣問。

「依家先到炮台山，起碼仲有段路要行。」

Kappa飲曬一罐，伸手入我拎住嘅大膠袋，再拎多一罐可樂。

「哇，你已經一口氣飲左四五罐，仲未飲夠？」



「好飲，所以繼續飲。」

「飲咁多，因住糖尿病。」

「嗯？糖尿病咩嚟？」

「無嘢啦，當我無講過啦，講親乜你都唔識，都唔知你邊度鄉下。」

太陽收起最後一道餘光，消失於地平線，我同Kappa喺地上拉長嘅影子，漸漸融和與漆黑之中。



咦？奇怪？點解馬路兩邊啲街燈無著嘅？

我環顧左右，原來不單止街燈，周邊嘅鋪頭都黑麻麻，啲燈全部熄曬。

先係斷水，家下終於斷埋電。

光線不足嘅情況下，只能睇得到距離近嘅嘢。

我問Kappa：「你有無電筒之類嗰啲？」

「本來防護面罩，有照明燈，可惜爛左，無得用。」對方搖搖頭回答。

「周圍黑麻麻咁危險，不如揾個安全嘅地方過晚夜，聽日先再去。」我提議。

「Um…都好。」



於是，我地兩個摸黑前行，由於睇唔清環境，所以對身邊嘅一動一靜，都分開留神。

「Raaauuugggh...」

行左一百米左右，撲面傳嚟陰森嘅喪屍叫聲。

隨即，前方陸續出現幾對反白嘅瞳孔。

「前…前面好似有喪屍…你快開槍…搞掂佢地…」我慌張咁對身邊嘅Kappa講。

「急…好急…」 Kappa卻皺埋眉頭。

「你唔係呢個關頭先嚟急尿呀嘛？」



Kappa揦埋面口，看似真係好急。

「Raaauuugggh！」喪屍嘅叫聲漸近。

黑暗中，睇唔清佢地嘅動作，只見反白嘅眼珠正向前移動。

「點都好，忍住先，開槍解決左幾隻嘢先去屙。」

「Um......」Kappa努力咁忍住，快速開左一槍。

「蕉！」

綠色激光向前射出，憑借光線掠過一瞬間嘅照明，真係睇到有四隻喪屍衝緊埋嚟。

最後激光中唔到喪屍，而係射到無雷公咁遠。



Kappa再射一槍，結果又唔中。

眼見勢色唔對路，我地想走佬，但四隻喪屍已經殺到面前，猙獰嘅面孔變得清晰可見。

當中兩隻喺一瞬間撲跌Kappa，另外兩隻就撲向我。

我連忙退後兩步，並且揸住嗰個撞滿可樂嘅膠袋，當係流星錘咁fing過去喪屍度。

亂咁fing左兩下，兩下都扑中，結果屎忽撞棍，兩隻喪屍俾我打到訓低。

與此同時，隔籬Kappa用敏捷嘅身手，亦成功擺脫兩隻喪屍：「走啦走啦！好急啊好急啊！」

「好！」



我地二人一齊轉身逃跑。

四隻喪屍好快起返身，追左上嚟。

跑緊嘅時候，當我回頭，就見佢地打開雙手，跳起飛撲埋嚟。

「避…」

我個「開」字都未講，手上嘅膠袋突然穿左。

裡面十幾罐可樂統統飛曬出嚟，正面砸中四隻喪屍，給予沉重嘅迎頭撞擊。

喪屍仆低左，趁呢個機會，我地快速逃離。

上到一條行人條橋，Kappa忍無可忍，再都忍唔住。

佢先解除裝甲，然後行埋一邊就地解決。

非禮唔視，我擰轉面唔望，兼且幫佢睇水。

對方屙完，清理好執返正，著埋套甲行到我身邊。

「咦？嗰袋可樂呢？」

「咦？你支激光槍呢？」

我地二人同時開口。

「頭先俾喪屍搞到跌左，後尾顧住逃走要屙尿，所以嚟唔切執返。」

「頭先膠袋忽然間穿左窿，啲可樂全部跌走曬。」

下一句，我地異口同聲：「下？咁點算？」

……

隨之，彼此沉默左一秒。

「Raaauuuggghhh~~~」

喪屍聲四起，打破呢秒沉默。

喺呢個漆黑而危險環境，我地兩個決定唔返轉頭，都係揾個安全嘅地方落腳先。