性交轉運打喪屍: （95）

企喺遠處嘅我得個睇字，諗緊自己可以點幫手。

隨即，喪屍再次使出狠招，單手鉗住Kappa條頸，使盡力氣咁捏落去。

「咳咳…」Kappa抖唔到氣，更用唔上力。

對方處境危及，身為男人嘅我無可能袖手旁觀，見死不救。

地下有乜我就執乜，有雪糕筒就拎雪糕筒，有棄置嘅水壺就拎水壺。



跟住行近幾步，拎住啲嘢，向住喪屍dum埋去。

我知殺傷力有限，但霎時間，真係諗唔到仲有咩更好嘅辦法。

喪屍開頭唔理我，之後見Kappa好似無左反應，先放開手，並將視線轉移到我身上。

我將執到嘅樹枝飛埋去，喪屍輕鬆用鋒利嘅指甲weh斷，我將紙皮丟過去，對方又係用指甲抓破。

眨下眼，喺地下執嘅嗰啲嘢，幾下手勢就無曬。



喪屍稍稍烏低身，做出起動姿勢，睇嚟準備想加速撲向我。

以佢嘅速度，只要一加速，咁我肯定就走唔甩，不過走唔甩都要走。

我把手上最後嘅嗰樽「綠茶」丟埋出去，隨即調頭搏命跑。

果不其然，佢真係衝埋嚟。

但係一起步，佢成個人就仆左街。



我無減慢速度，一路回頭，一路繼續跑。

隻喪屍趴返起身，起步再加速，結果又仆街。

當佢又再起返身，今次連企都未企得穩，就又仆過。

我慢慢停低腳步，心諗發生咩事？

係咪有一股睇唔見嘅力量幫緊我地？

對方第三次起身，一踏前又仆街。

我小心翼翼行近埋去，發現真相原來唔係咩神秘力量，而係地下嘅潤滑液。

斷估係剛才隻喪屍用指甲，打爆樽「綠茶」。



實際上，樽嘢望似綠茶，其實係潤滑劑。個樽爆左，裡面又滑又潺嘅液體，漏曬落地下。

結果隻嘢一踩就冼到仆街。

家下佢腳下沾滿黐笠笠，又滑潺潺嘅潤滑液，想企都企唔穩。

我求其擸起地下個雪糕筒，痛打落水狗，起勢毆佢個頭。

毆爛個雪糕筒，就揾其他嘢繼續毆，之後好彩揾到一隻著住釘鞋嘅斷肢。

我執起斷肢，用帶刺釘嘅鞋底狂拍喪屍個頭。

最後，個頭俾我亨爆左，隻嘢終於都收皮。



同一時候，啱啱失去反應嘅Kappa，慢慢咁醒返。

「咦？原來你無事，仲以為你窒息死左。」

「無事，頭先我只係閉氣假死。」

Kappa埋嚟望到訓喺地下嘅喪屍：「哇，你居然一個人打死隻『綠眼』，好犀利！」

「哈！符碌啫，符碌啫。」

「只但係，我叫你幫手拎住嘅，嗰支嘢飲呢？」

「算啦，嗰啲有咩好飲，出到嚟，索性去七仔揾可樂飲啦。」

「可樂？好呀，咁快啲行囉！」Kappa聽到可樂兩個，已經舔曬脷，流曬口水。



我地好唔容易解決左隻綠眼喪屍，下一站就係向鰂魚涌進發。