性交轉運打喪屍: （94）

Kappa碌大對眼，一副驚訝嘅表情：「你…講真？」

「係呀，嗰啲解藥資料，咪就係實驗室個鬼佬俾我個囉。」

「你指Professor Dave？」

「Er…我唔知佢叫咩名…總之臨死之前，佢就將嗰啲解藥資料俾左我。」

「咁啲解藥，依家喺唔喺你度？」對方追問。



我搖搖頭：「全部資料都喺我朋友手上，我諗佢地依家應該到左鰂魚涌。」

Kappa跟手喺褲袋摷左一張地圖出嚟：「鰂魚涌…呢度…咁具體位置喺邊？」

我諗一諗回答：「長華工業大廈。」

佢喺地圖上搜索，卻揾唔到個地標，畢竟呢啲咁嘅地圖，好少會標曬咁多棟大廈名。

「地圖唔見有嘅…」佢揸住地圖，行開左去一邊。



「Alpha，聽到嘅話，唔該應下我？over？」

我呢邊隱隱約約聽到，佢又嘗試呼喚同伴，「over？over？」

隔左一陣都得唔到回應，佢走返過嚟，問我：「可唔可以俾我同你，一齊去你揾你嘅同伴？」

「你想跟埋嚟？點解？」

Kappa一下又靜左唔出聲，眼仔碌碌咁，好似諗緊點答。



諗左幾秒都諗唔到，乾脆就唔答。

佢遞自己手上嗰支，龜頭園「綠茶」俾我：「好啦，咁我地陣間出發，麻煩你，幫手拎一拎支嘢，我去著返件甲。」

條友神神秘秘，乜都唔肯講，更加激發我嘅好奇心。

「你係咪從其他地方，請返嚟揾病毒解藥嘅僱傭兵？係咪乘哥請你？如果唔係僱傭兵，咁莫非係特工？」

我喺度估估下，而對方把口密不透風，撬都撬唔開。

結果就我有我講，佢有佢著甲。

仲記得，除甲嗰陣，佢只係㩒左一粒掣，當要著返上身，又係㩒一粒掣就搞掂。

地上分散嘅部件逐一拼合埋一齊，慢慢覆蓋Kappa全身。



由於黑色面罩損毀比裝甲嚴重，基本上失去保護能力，因此佢無戴返面罩。

「你手上無武器，陣間我對付喪屍，你記得企遠少少。」

我「哦」一聲回答，拎住佢嗰支未飲完嘅綠茶，跟喺後面行。

「Ah！！！」

仇人見面，分外眼「綠」，隻無左隻手嘅喪屍貼住鐵閘，向我地憤怒咆哮。

Kappa都唔怠慢，舉槍瞄準就射。

激光射穿鐵閘，不過喪屍輕鬆避過左。



「五十萬隻喪屍入面，就會出現，一隻異變喪屍，佢地嘅速度、觸覺、以及力量，都比一般喪屍大，因為佢地嘅眼睛，呈綠色，所以我地叫佢『綠眼』。」

Kappa一路講解，一邊瞄準，快速咁再連開多兩槍。

綠眼喪屍反應極速，瞬間退後閃避。

道閘經已穿左大窿，Kappa衝出去繼續追擊。

一道道綠光射出，可惜無一命中。

本身隻喪屍一路都係避，點知突然間扯甩馬路邊嘅鐵欄，順勢再將鐵欄，用力車埋去Kappa度。

敵人出其不意嘅攻擊，令Kappa嚟唔切閃避，只能用手擋隔。

下一秒，喪屍加速，用膊頭狠狠咁撞去對手。



Kappa嘅背脊重重咁撼落墻，撞擊力之大，令到成幅墻都凹曬，石屎碎裂開。

咁樣撞法，如果唔係有件甲保護，我諗佢條尾龍骨已經斷左。

喪屍五指合埋，鋒利嘅指甲向前，向住對手直插埋去。

好在Kappa反應都唔慢，能夠及時避過，否則個頭嘅下場，就會好似道墻咁，俾鋒利嘅指甲戳爆。