性交轉運打喪屍: （92）

東方188呢類賣電子產品嘅商場，啲路九曲十三彎，走廊又窄又多雜物，鋪頭又間間差唔多樣，我已經唔記得我頭先自己坐過喺邊。

逛逛下，發現個女仔企喺一間賣電視賣mon嘅鋪頭，手上仲揸住個汽水罐，唔知睇咩睇到入曬神。

我靜靜雞行去八卦下，但又唔敢行得埋，就隔開兩個手位，「裝」下佢睇緊咩。

間鋪頭七零八亂，有幾個電視mon都碎左，得返一部約莫五十吋嘅電視，係仲播緊片。

播緊嘅戲就係經典港產片《生化壽屍》。



個女仔就係睇呢套戲睇到入曬神。

呢套嘢我以前都係youtube睇過，睇嘅係低清版，家下呢部電視播緊嘅，應該係高清修復版。

我都睇到入曬神。

湯盈盈飛釘，兩粒的好清楚突出嚟，果然係高清電視。

除左有飛釘，呢套戲另一個好睇嘅地方，就係「視帝祥」飾演嘅爛牙駒。



佢個啲衰衰格格嘅演繹，睇親都覺得好笑。

「…你識乜q，咁得閒打下蠟啦…」套戲睇過，呢句對白再聽一次我都笑左出聲。

不過呢下笑聲就令到個女仔發現左我。

見佢擰轉面，我已經下意識舉高手唔敢郁。

今次佢無拎刀，亦無舉槍，淨係揸住罐可樂問：「好飲。仲有無？」



我搖搖頭回答：「無啦，呢罐係最後一罐。」

「哦…」佢抿一抿嘴，擰轉頭繼續睇戲。

睇到陳小春同湯盈盈喺廁所摷個幕，我「細佬」情不自禁扯旗致敬。

個女仔就睇到一頭霧水，擰過頭問我：「佢地喺度做咩？」

唔係呀嘛，咁都要問，擺明喺度搞嘢。

我照直答佢：「咪喺度搞嘢囉。」

佢諗左一陣，又問：「搞嘢即係，咩意思？」

呢個女仔望落雖然十七十八，但呢個年紀，無理由唔知咩係搞嘢？



究竟佢係真無知定抑或假純情？

我再答佢：「文雅嘅講，即係『做愛』。」

佢又無出聲，諗左一陣：「『做』呢個字我明，但『做愛』我唔明，『愛』係咩嚟架？」
愛係咩嚟…

頂！呢個問題有啲考起我…一時間我答唔到嘴...

「嗯…睇嚟你好似都唔知...」

「知呀，我知呀，愛咪即係鐘意囉，鐘意就…就即係你飲完可樂，覺得好飲，再想飲多罐，甚至想日日飲。」

話一出口，即刻就覺得自己嘅答案一舊舊，好九唔搭八。



對方聽完，淨係「哦」左一聲，唔知明定唔明，然後佢又話：「呢個喪屍片段，我細個成日
睇，但好奇怪，之前一直，都無睇到呢一段，同埋頭先有幾段，都好似無睇過。」

「唓—或者你睇左唔記得…」

「哇…哇…救命！」

突然之間，有隻壁虎喺我身上爬，嚇到我扎扎跳叫救命，不停用手想撥走佢。

「咪郁！」

個女仔行埋嚟叫我唔好郁，咁我真係停左唔郁。

隻左手咁啱就撥左出去，啱啱好掂到對方右胸。



Size唔算大，但摸落軟熟。

對方慢慢咁將我身上嘅壁虎，捧喺自己手中。

我好唔好意思，拿拿臨縮返開隻手：「Sor…sorry…我唔係有心...」

對方無理我，只顧低頭用手指，輕輕撫摸隻簷蛇。

呢一刻，腦海諗返起當日喺城大，都試過有條簷蛇喺我塊臉度爬，同埋又係有個裝甲人出現。

嗰日嘅裝甲人會唔會同呢個女仔係同一個人？

我乾咳兩聲，清清喉嚨問：「嗰日喺實驗室門口，對住天花板開槍嗰個係咪你？」



「嗯，當時我以為，你俾喪屍感染左，諗住射死埋你，不過見到有隻四腳蛇，喺你塊面度，為左唔傷害佢，所以無開槍。」

估唔到，原來嗰一日，我係俾自己最憎嘅簷蛇救左一命。