性交轉運打喪屍: （91）

「呠呠—」

「『吳運幸』…」

突然間，隱約傳嚟楊過嘅呼喊聲。

我回頭返落樓，遠處路口有架的士正慢駛過嚟。

哇！諗唔諗唔到！楊過佢地竟然會返轉頭搵我？！



雖然叫錯我個名，但我依然好感動。

司機位嘅楊過離遠見到我，探頭出車窗：「見到啦！原來你喺度！」

我隔住鐵閘想佢地揮手，同時企喺鐵閘嘅另一邊，嗰隻綠眼喪屍擰轉面，亦注意到佢地。

弊傢伙！咁樣唔掂喎，假如我yap佢地過嚟救我，咪等於要佢地自投羅網？

隻綠眼喪屍咁猛，我唔想眼白白見住四人全軍覆沒。



於是改變主意，一邊耍手擰頭，我一邊大嗌：「咪過嚟！你地走先啦！唔洗理我！」

楊過停低架車，一臉疑惑：「下？你唔同我地一齊走呀？」

「我遲啲會嚟合你地！你地唔好留喺度，呢隻喪屍唔係人咁品，快啲走！」我指住與我只有一閘之隔嘅綠眼喪屍。

說時遲，那時快，隻喪屍以迅雷不及掩耳之勢，轉身向住的士衝去。

一下跳上左車頂，兩下就打穿玻璃。



呢個時候，的士突然加速，隻嘢一時企唔穩跳落車。

雖然我隔得遠，睇得唔清，但我相信係司機位隔籬嘅阿得搶軚踩油。

因為喪屍落左地後，架車追住嚟撞，換係楊過遇到喪屍係會兜路，絕對唔會撞埋去，只有阿得先會不留情面。

然而隻綠眼喪屍輕鬆就閃過左架的士。

「隻嘢好快，你地唔夠佢抽架，快啲開車走！」我繼續呼嗌。

喪屍好快又追上前，擒上去車尾。

尾座嘅Shirley同Sandy伸手出窗，向後開槍射隻嘢。

但係咁嘅情況，碰見咁敏捷嘅喪屍，點可能射得中。



隻嘢打爛埋車後面嘅玻璃，似乎準備想捐入架車度。

四人處境岌岌可危，我左騰右騰諗緊點幫佢地脫身。

咁啱地下有一塊黑色裝甲嘅碎片，半隻手掌咁大，相信係從個女仔身上件甲甩落嚟。

靈光一閃，我諗到一個辦法。

得唔得就唔知，唯有儘管一試。

我執起塊碎片，拉高道鐵閘，隨即用塊嘢大力敲打鐵閘：「喂！過嚟啦！我帶你入去，揾你射斷你隻手嗰裝甲人報仇！」

隻嘢聽到嘈雜嘅鏘鏘聲，真係擰轉面望過嚟。



我手上揮動嘅裝甲碎片，令隻喪屍個樣變得更加兇狠，更加猙獰。

最後佢真係上釣，跳落車，面向呢邊商場方向。

我知佢一加速就會好快，所以從佢跳嘅一瞬間，就馬上落返道鐵閘。

不出所料，眨眼之間佢已經殺到面前。

本來我差啲閂唔切，好彩對方衝埋嚟嘅時候，驚動左馬路邊一大班啄緊嘢食嘅雀仔。

八九隻驚弓之鳥飛起身，令喪屍窒左半秒嚟繞過啲雀。

正正就係差左呢半秒，我先閂得切道閘。

而頭先啲雀啄緊地下嘅威化餅，應該就係從本來我綁喺身，嗰袋食物中跌出嚟。



果然又係錯有錯著。

喪屍深深不忿，依起棚牙，個樣恨不得吞我落肚咁。

我唔理咁多，一味叫楊過佢地快走：「趁機會快啲走啦，我遲啲會去會合你地！」

「好！咁你自己小心啲！我地撇啦！」楊過將架車調頭，踩油加速，馬上逃離現場。

喪屍回頭再追已經追唔切。

等佢地安全離開，我鬆一口氣，對住喪屍比出中指，跟住返上樓上。