性交轉運打喪屍: （90）

個女仔喺黑色面罩入面，拆走一舊火柴盒咁大嘅黑色物體，並小心翼翼擺喺櫈底。

然後，佢除低身上嘅黑色裝甲。

件甲被炸到岩岩巉巉，甚至乎有啲位置已碎到穿窿。

對方伸手掂一掂樽領，跟住成套甲就卸左落嚟。

手、腳及身體上所有部分嘅裝甲，自動分拆成一件件散開。



佢入面有著衫打底。上衣係一件純灰色背心，下身著住墨綠色摺腳工裝褲，陪襯一對黑色cons。

件甲望落咁厚，仲以為就算係女仔，都要有咁上大隻先會long得起，卻又估唔到呢個女仔又唔係想象中咁大隻。

至少唔係我諗嗰啲健美小姐嘅身材。

首先佢係好fit，瘦得嚟身材好明顯有線條，其次係就算無谷起啲肌肉，都睇得出手臂好結實。

至於男士最關心嘅地方，目測就介乎喺B與C之間。



另外，佢嘅手臂同塊臉一樣，都係好白。

佢唔係喪屍嗰種灰白，而係一種近似牛奶，一種從未受過污染嘅白。

我一路偷偷地𥄫佢，𥄫到入曬神。

直至個女仔擰轉面，眼神與我對上，我先轉移視線。

我地大家都無出聲，氣氛好安靜。



「咕—」

我個肚發出饑餓嘅咕咕聲，打破呢刻嘅沉默。

喺出發之前，其實我有綁左一袋食物喺身，然而經過一番慘烈嘅逃跑同搏鬥，個膠袋早就穿左，裡面嘅嘢食幾乎漏走曬。

咁大個膠袋家下就得返兩罐可樂，以及兩包扁曬嘅嘉頓雪芳蛋糕。

今日一大早就要出門口，無時間食早餐，加上剛才消耗左咁多體力，家下個肚餓到咕咕聲。

我打開罐可樂，拆開包蛋糕，吸取返一啲糖分同能量。

另一邊廂，個女仔從褲袋拎左一啲紗布同繃帶，為手腕上傷口簡單包紮，又不時望過嚟。

「你想食？」我揸住蛋糕同汽水示意。



對方無反應，亦無出聲，淨係眨左兩下眼。

如果唔係頭先佢開聲講過嘢，我真係會以為佢係聾啞人士。

「咕—」今次輪到對方個肚打鼓。

「算暗流，見你肚餓，俾你啦。」我將剩低嗰罐可樂同蛋糕，放落膠袋，諗住行去遞俾佢。

對方一見我有動靜，就好似驚弓之鳥一般，快速從褲袋拎出軍用刀，擺出警覺嘅姿態。

「OKOK，唔洗咁緊張，最多我唔行埋嚟。」

隨即我坐返原位，將個膠袋放喺地下，然後滑過去對方面前。



佢對住膠袋，打量左一陣，唔知係咪要確認過無危險，先伸手拎罐可樂。

揸住罐可樂，望左幾眼之後，條友居然用手去擰個罐。

呢個係罐裝唔係樽裝，點會去擰，直接勾開個鐵環就飲得。

我心諗呢條友係咪炸傻左個腦，連一罐可樂都唔識開？

對方見自己開唔到，就望一望我手上嘅可樂，觀察左一陣後，嘗試撩左幾下個鐵環，最後先成功開到。

佢淺嘗一啖，舔一舔脷，望住個可樂罐上面啲字，細細聲喺度自言自語：「可口可樂...」

無左個面罩，聽到佢真人把聲，原來都幾纖細，幾好聽。

放低可樂，佢拎起雪紡蛋糕，又係搞左一輪都唔識搣開佢，最後直接用牙咬爛個包裝紙。



照咁睇嚟，佢真係炸short左個腦…

喺商場計落都坐左大半個鐘，外面隻綠眼喪屍估計都走左。

家陣我同楊過等人失散，出到去睇嚟要自己一個去鰂魚涌揾佢地。

食完個蛋糕，飲曬罐可樂，我就一個人揾路行返落去商場樓下。

隔住鐵閘，望出對開馬路，嗰隻斷左一邊手嘅綠眼喪屍，竟然仲瀨死唔走。

嗰對綠眼離遠瞄到我，隨即以極速直衝過嚟。

我二話不說，調頭走返上樓梯，心諗慘啦今次，隻嘢幾時先肯走？



佢一日唔走，一路咁樣捕住喺出面，我一日好難走得出去！

唉...今鋪真係惡搞...