性交轉運打喪屍: （87）

綠眼喪屍相當難纏，移動速度快到連裝甲人都難以瞄準。

誇張啲講，幾乎快到影都無。

「蕉…蕉…Boom！」

「蕉…蕉…Boom!」

綠色激光射唔中喪屍，只射中馬路兩旁嘅舖頭，導致產生猛烈嘅爆炸。



然而一波未平，一波又起。

隻綠眼喪屍未搞得掂，又有一大批喪屍衝緊嚟，數量至少二三十隻。

情況十分危險，此地不宜久留，趁混亂之際，我都係快啲走佬比較好。

但又見地下有支激光槍，係頭先從嗰個瓜左嘅裝甲人手中跌出嚟。

支嘢咁勁，無理由唔執架？



於是我烏低身，靜靜雞行去執，行左兩三步，從頭頂上方聽到爆炸聲。

抬頭向上，睇見旁邊座大廈俾激光射中，外墻嘅石屎俾炸毀並墜落。

一秒後，一塊差唔多成道門咁寬嘅石屎，「砰」一聲墜落於我身後。

好彩我啱啱行前左幾步，否則就會被砸到變柿餅。

本來打算快啲執起支激光槍，然後就走佬，卻無諗到支槍原來好鬼死重。



身上嗰支機關槍已經夠重，呢支激光槍起碼再重多四五倍。

我攞都攞唔起，頂盡只能夠拖住行。

「Boom！Boom！Boom！」

一連又響起多下爆炸聲，隨即又有石屎墮下，好彩全都砸唔中我。

喺距離我大概三十米處，馬路中心嘅一個裝甲人，俾嗰隻綠眼喪屍纏上左。

喪屍隻手好似八爪魚咁抓住裝甲人塊面，由於視線被遮蓋，所以就算近在咫尺，裝甲人開槍還擊但都射唔準。

啲激光全部射歪左，射曬去大廈度，炸爛曬啲外牆。

至於其他人忙住對付嗰班普通喪屍，無法及時幫手。



下一個瞬間，綠眼喪屍使出狠勁，單手將裝甲人個頭㩒落地下。

速度之快，力量之猛，兩者結合一齊造成極大威力。

裝甲人就咁訓低左，成個頭陷落地下。

綠眼喪屍跟手擰扭埋個頭，捧上手用指甲再一捏，頭部嘅黑色面罩便碎開，露出血流滿面嘅人頭。

佢將個頭放落口咬一啖，然後津津有味咁咀嚼。

「撤退！撤退！」

戴臂章嘅裝甲人帶頭搵路走，唔知係咪隔住個面罩嘅緣故，把聲好似電視訪問經過處理嘅聲音一樣：「Kappa，你嚟負責引開『綠眼』！」



棟大廈被炸穿左個大窿，除左啲石屎搖搖欲墜，仲有好多匿埋喺大廈嘅喪屍，猶如餓鬼出閘，紛紛跳落嚟。

再加上難以對付嘅綠眼喪屍，選擇撤退係一個明智決定。

「Raaauuugh!」 話咁快就有兩隻喪屍，從上跳落我旁邊巴士嘅車頂。

情況危急，我不得不放棄嗰支激光槍，用最快嘅速度轉身逃跑。

隨即又再多兩隻喪屍追過嚟，我一邊向前跑，一邊揸住機關槍向後開火。

雖然基本上無瞄準過，但符符碌碌又俾我掃低曬佢地。

楊過等人唔見人影，睇嚟我同佢地失散左，不過我諗唔洗太擔心，照計佢地都係喺呢頭，應該未走得遠。

呢一刻對我嚟講，最緊要係脫離危險先。