性交轉運打喪屍: （85）

如楊過所講，第二朝訓醒，我地六個執齊裝備同乾糧，即將出發去阿得所講嘅嗰座工廈。

大家拎嘅架撐，同當日入住所帶嘅差唔多，都係用返曬嗰日喺維園拎嘅武器。

我個身綁住一袋乾糧，托住好鬼死重嘅機關槍，神咁早起身，個人無乜精神，忍唔住打喊露。

「好！大家搞掂未？搞掂就出發啦？」楊過孭住一袋乾糧，一隻手拖住隻狗，另一隻手揸住伸縮棍。

「嗯！我地執好嘢，準備好曬啦！」Sandy同Shirley攞齊嘢，每人手上揸住手槍。



「咦？Isabel同阿得呢？」楊過睄一睄周圍，不見二人。

「嚟啦嚟啦！」Isabel沖涼沖得唔記得時間，家下先換好衫出嚟。

「你唔拎武器嘅？」楊過問對方。

「唔洗啦，我跟住你行，有你保護咪得囉。」Isabel借啲意挨落去，點知身手敏捷嘅楊過一下避開左。

我就周圍去摷阿得，最後發現條友又飲醉酒，對住沖涼房個洗衣機唱歌



「喂大佬呀，全世界等你一個，快啲起身醒下啦。」我將佢扶返起身。

「頂！好地地做乜要整解藥，整到又點，我老婆都唔會返生架啦！」阿得酒氣熏天。

「只要你救到全香港人，做左英雄，到時你老婆喺天堂一定會為你驕傲架！」

「下？會咩？我老婆會為我驕傲？」

「梗係會啦！」



阿得聽完我咁講，個人好似清醒返少少。

好唔容易集齊人，終於可以出發。

我地一行六人落到樓下後，坐上本來嘅七人車出發過鰂魚涌。

懷著滿滿期待，點知卻出師不利。

架車行左兩個街口，突然無端端爆胎。

咁無辦法啦，我地唯有落返地下，揾下有無廢置嘅汽車可以用。

行行下，忽然聽到打鬥聲同一啲無法形容嘅「蕉蕉」聲。

我地心生好奇，於是順住啲聲轉入一條街。



隨即見到有一班著住黑色裝甲，笠住黑面罩嘅人。

我立即就認得出呢班人，佢地咪就喺城大嗰陣見到嗰班裝甲人。

大約二十個裝甲人，依家正被一班喪屍圍住。

而嗰啲「蕉蕉」聲喺嚟自佢地手上嘅激光槍。

結果唔洗一分鐘，班裝甲人輕輕鬆鬆射冧曬全部喪屍。

每道綠色激光都精準咁射爆每隻喪屍嘅頭，稱得上彈無虛發，呢班人睇嚟平時係訓練有素。