性交轉運打喪屍: （84）

「antidote咪即係解藥嘅意思？呢隻usb入面有解藥？」Sandy問我。

「乜『anti刀』係解藥咁解咩？」我有種如夢初醒嘅感覺。

「咪玩啦，小學生英文嚟架喎，係人都知點解。」Shirley對我講。

「唔出奇呀，條友連bakery都唔識。」Isabel又借機串我。

隨即楊過嘅眼神投向阿得：「啲資料你應該識睇，嗰邊counter有電腦，不如你開嚟睇下，係咪真有整解藥嘅配方？」



阿得卻喺度扭計：「無心情！咪搞我！」

「呢個時候唔好扭計啦，呢單嘢隨時關乎我地幾個以致全香港人嘅命運，呢鋪靠曬你架啦。」楊過夾硬捉阿得埋去counter坐低，並開著電腦。

阿得唔夠對方好力，想走都走唔到，只能乖乖就範：「算！條數我遲啲先同你計！」

電腦開左機，插入usb手指，裡面得一個PowerPoint檔案。

打開個file，有幾版紙，上面密密麻麻咁，列左好多一般人睇唔明嘅化學公式。



「點呀點呀？上面寫咩呀？」楊過好心急。

「睇緊呀，咪鬼嘈住曬喺度催啦！」阿得仔細咁查閱檔案。

我地幾個無再出聲騷擾。

過左一陣，阿得開口：「的而且確，usb裡面嘅係治療喪屍病毒嘅資料。」

「哇！你講真架！咁太好啦！我地終於有救啦！」楊過相當興奮。



「唔洗咁興奮住，就算有呢啲資料，都唔代表100%研發到，就算研發到唔一定真係有效。」阿得表情淡淡然。。

「咁不如我地拎隻usb去俾乘哥啦，橫掂佢嗰度咁多人做研究，多個人多份力，話唔定到時仲可以大量生產。」楊過提議。

「No，計我話梗係唔好咁輕易交出去，最好我地呢邊整到出嚟先，試過真係有效再交啲資料過去都唔遲，如果李氏真係咁想要解藥，話唔定到時肯送我地每人一層樓嚟作交換。」Sandy真係識諗，連乘哥都想屈一筆。

跟住佢就問阿得：「俾你照住上面嘅材料同步驟，有無信心將個解藥整出嚟？」

阿得又翻閱一次資料，諗左一陣先回答：「大部分所需要嘅材料都其實唔算難搵，照住步驟應該都唔難整，唯獨有一樣嘢係要『帶有病毒抗體嘅人身上嘅血液』，換句說話講，我地要搵一個天生有呢隻病毒抗體嘅人，再抽取佢嘅血出嚟，先能夠製造出呢隻藥。」

「天生有病毒抗體？意思即係嗰啲俾喪屍咬左都無事嘅人？」Shirley問。

阿得點點頭：「係，無錯。」

「乜有呢種人嘅咩？」Shirley追問。



「有都唔出奇嘅，呢個世界就係有啲人天生就有某疾病有抗體，不過呢種人唔多，所以要搵都唔知去邊度搵。」阿得解釋。

「實有嘅，話唔定發明呢隻解藥嘅人，本身都天生有抗體。」楊過大膽猜測。

呢個時候，我回想返當日喺實驗室嘅情景，仲記得周圍嘅人幾乎都變曬喪屍，偏偏個鬼佬教授無事，照咁睇佢同佢個仔有可能係有抗體。

「要點先知自己有無抗體？」我問阿得。

「好簡單啫，我地每個人埋去俾隻衰狗咬一啖，無事嗰個咪即係有抗體囉。」阿得回答。

「咁除左帶抗體嘅血，其他化學材料同器材要去邊度搵呢？」楊過問。

「我做嗰間藥廠喺鰂魚涌租左一間工廠大廈嘅單位，用嚟保存啲貨同埋一啲化學原料，仲有一啲備用嘅器材，我諗嗰度應該基本有齊所需嘅嘢嘅。」



「好！咁我地食完餐飯，訓個好覺，聽日一早出發去鰂魚涌！」