性交轉運打喪屍: （66）

身上孭住嗰隻機關槍好重，嚴重拖慢左我嘅腳步。

Isabel膝頭受左傷，跑得同我一樣咁慢，相反其他人已經跑到好前，拋離我地有一段距離。

當中楊過跑最快，喺最前面打喪屍開路。

「唔掂啦！啲喪屍追到好貼！」喺我旁邊嘅Isabel趷下趷下咁跑。

我擰轉頭望下，後面一大揸喪屍真係追到好貼，距離我地應該唔夠五十米。



「無架啦，繼續跑啦！」我喘住氣同Isabel講。

「喂！你手上揸住咁大個手榴彈都唔『dum』過去？」講完，Isabel就一手搶過我手中嘅手榴彈。

無記錯，呢個手榴彈係我頭先喺司機手上攞走嘅。

Isabel往後一扔，扔完我同佢就掩住耳仔，立即退後多幾步。，

手榴彈「啪」跌落地下，扔得唔算遠，中唔到喪屍堆，同埋落地嗰下都無爆炸。



「點解唔爆嘅？」Isabel感到疑惑。

「好似上面有個扣，要掹左先會爆。」我答。

「下？頭先你又唔講？」

「我點知你咁快丟出去？」

「唉無計，跑唔郁啦，一於開槍同佢地博過啦！」Isabel一邊倒後走，一邊舉槍。



快手開左兩槍，可惜射左兩下都射唔中。

「仲呆喺度做咩？開槍啦！」Isabel用接近命令嘅口吻對我講。

啲喪屍漸行漸近，我跟住Isabel退後，同時舉起機關槍，掹雞開火。

「砰砰砰砰砰—」支槍除左重之外，個後座力仲超勁。

我完全控制唔到，一連射左好多槍，而且向前瞄準唔到，淨係亂咁「啡」。

射射下，前面突然「Boom」一聲爆炸。

爆炸好響，所產生衝擊力令我同Isabel，不由自控咁向後彈飛。

屎忽「鄧」落石屎地，好鬼死痛，但呢個已經係不幸中大幸，假設我地頭先退得慢一步，隨時都會炸埋一份，好彩好彩…



隨住眼前啲煙逐漸飄散，見到本來打棟企嘅喪屍，一瞬間全部躺平。

莫非…莫非係我屎忽撞棍，射中地下個手榴彈，導致到爆炸？

而又咁啱班喪屍行前到手榴彈附近嘅位置，結果一炸就冚包散？

嗯…唔排除有呢個可能…

算啦，呢刻唔係考究呢樣嘢嘅時候，我同Isabel快快手起返身，原路向住出口逃跑。

其他人似乎都上曬車，就得楊過喺足球場邊左望右望：「JoJo，JoJo你喺邊？乖啦！康既阿UI啲出嚟啦！」

「做咩呀你？仲唔上車嘅？」我停低問對方。



「Jojo走失左，我要揾返去，你地上車先啦。」

「下？呢個時候仲揾狗？走啦！」

「得架啦，我好快就上車。」

我同Isabel都理唔到佢咁多，直接跑上七人車。

S字頭兩姊妹、炒車司機、我仲有Isabel都喺曬車上，但司機位空左，因為楊過未上車。

「楊過呢？佢仲未上車嘅？」Sandy十分焦急。

「佢隻狗走失左，佢話要揾返先上車。」我答話。

「下？揾狗？」



Shirley突然指出車窗：「你地睇下！死火啦今次！路邊嗰啲喪屍過緊嚟！」

「咁…咁點算呀？我地仲等唔等埋楊過？」Isabel同樣地心急如焚。

「咁樣等唔落去喎，不如開車走？」Sandy唔敢用太肯定嘅語氣講。

「只但係，我地呢度有無人識揸車？」

Isabel問完呢句，大家靜左幾秒，然後我望向「地中海」司機：「你嚟揸？」

「嗯…都得嘅…」

司機臨危受命坐過去司機位，跟住就話：「無車匙喎…」



……

我地又靜左唔出聲，你眼我望眼，呆左咁唔知點算好。

慶幸嘅係，呢個時候聽到楊過把聲：「等埋！等埋！」