性交轉運打喪屍: （65）

楊過即刻調頭，相反我身邊嘅「地中海」司機，揸實手榴彈，好有衝動想衝過去同喪屍死過。

我即刻掹住佢：「喂大佬呀！生命誠可貴！咪做傻事呀！」

「由得我啦！反正我都生無可戀！」

「唔好呀！你老婆在天之靈，一定想見到你繼續生存落去，千其唔好做傻事呀！」我用力拉住佢。

至於其他人無等我地，好快就跑遠。



Shirley一邊跑一邊回頭：「喂你地仲拖拖拉拉搞咩呀？再唔行我地唔等你架啦！」

「等埋呀喂！我地嚟架啦！」

我拎走司機手上嘅手榴彈，趁喪屍未追到前，夾硬拉走佢，並且盡力趕上其他人嘅腳步。

跟住對方無端端又拎起，胸口前嗰條奇怪嘅頸鏈，對住嗰舊淺啡色、半隻手指咁大嘅扁圓物體，喊住咁講：「老婆…無左你…我嘅世界已經無意義…我好掛住你…嗚嗚嗚…」

見到條友咁淒涼，我嘗試安慰佢。



「嗚嗚…你知唔知我老婆係點死架？」對方問我。

我搖搖頭。

「佢係俾十幾隻喪屍活生生咬死架！班喪屍好殘忍，咬到我老婆死無全屍，全身上下就死剩呢粒lin。」

「下？lin？」

佢無回答，只係錫一啖嗰個扁圓狀、中間有少少凸起嘅淺啡物體。



呢刻既我終於意會到，佢心口一路掛住嘅，原來係一粒乳頭。

霎時之間，我唔知俾咩反應，靜左幾秒無出聲。

「嗚嗚...我老婆臨死前，叫過我好好生存落去，但原來失去至親，剩低自己一個孤零零既感覺…係咁難受…嗚嗚…」講講下，佢又再喊過。

「既然你老婆都叫你好好生存，如果你真係咁愛佢既，應該就聽佢講，唔好再諗住同班喪屍攬住一齊死，應該諗辦法生存落去。」我繼續安慰。

之後佢又無出聲，只係一邊喊一邊點頭，似乎認同我既說話。

楊過同三個女仔已經拋離我地好遠，好彩佢地肯等埋我地，並招手示意我地行快啲。

我同司機兩個加快腳步，追趕上前同佢地會合。

「前面就係泳館啦，我地好快就到架啦。」帶最強嘅楊過指住前面五十米既室內游泳池。



「Raaauuugggh！！！」

但係半路又殺出「程咬金」，旁邊嘅花叢突然跳出左三隻喪屍。

兩隻著住警察制服，一隻著住紅十字會制服，全部都面露兇相。

楊過卻無所畏懼，第一時間上前埋身肉搏。

佢嘅身手真係好了得，力量比喪屍更加大，只係幾下就打到喪屍無還擊之力。

不過佢唔殺喪屍，所以淨係將三隻喪屍掛上路兩旁嘅樹上。

再行多五十米，終於嚟到維園嘅室內游泳池。



行入門口，入面黑媽媽，一啲燈都無，我就話，「唔對路喎，都唔著燈嘅？」

「可能只係門口姐，樓上有人嘅話，應該就會有燈。」Isabel回應話。

「係囉，反正嚟到，都係要上去望下架啦。」最好打嘅楊過帶頭行先。

我地其他幾個跟住佢，沿樓梯行上去。

結果上到樓上泳池，周圍都係一片漆黑，咩都見唔到，感覺有啲陰森恐怖。

我地唔敢行前，亦唔敢出聲。

只有行頭嘅楊過踏前，開著電話燈，照向前方。

白燈一亮起，泳池邊成排成列嘅喪屍，目測起碼二十個頭同時間擰轉過嚟。



「啊！！！！！」

光線不足嘅情況下，喪屍血淋淋嘅樣顯得更加恐怖，因此三個女仔嚇得大叫。

一秒後，嗰班喪屍發出招牌式嘅怒哮，作勢向住我地湧埋嚟。

「走呀！」又係楊過反應最快，首先調頭走。

我地幾個反應都唔慢，用最快嘅速度轉身跑。

衝出去大門口後，好唔好彩又遇到另一批喪屍，家陣兩批喪屍加埋一齊嚟追住我地。