性交轉運打喪屍: （67）

佢抱住隻狗跑過來，身後又有班喪屍追住佢。

我預先打開車門，等到佢大步檻上車，就立即閂返度門。

啲喪屍遲左一步，就咁被拒之門外。

楊過遞條車匙，司機用最快嘅速度開車，又用最快嘅速度向前飆。

佢唔理前面有啲咩，喪屍又好，圍欄又好，總之就乜都唔理，一路狂飆。



「哎呀…哎呀…」每當車頭撞開一隻擋路嘅喪屍，楊過就發出一下痛心嘅聲音。

見到呢種玩命式嘅揸法，我就擔心條友想玩自殺，又想嚟同歸於盡，所以就出聲安撫：「唔好做傻事，慢慢揸，你唔記得你老婆臨死前粒lin…唔係…應該係臨死前嘅遺言，唔好輕生做傻事，記住為左佢，你要珍惜生命！」

聽完我咁講，對方低頭望一望掛喺胸前粒乳頭，深呼吸一口氣，隨後先減慢返個速度。

架車駛遠，嚟到一條只有零丁喪屍嘅馬路上慢駛，都算係叫做暫時脫離危險。

楊過伸手扭開收音機，擰嚟擰去都係得一啲「沙沙」聲，之前嗰段政府公告錄音無左。



咁係咪已經代表政府收左皮？

再聯想返維園嘅情景——

凌亂嘅臨時救急站、墜毀嘅直升機以及著制服同軍服嘅喪屍。

令人無法唔相信政府已無能力拯救市民，亦無法處理呢場喪屍危機，睇怕我地呢啲生還者，今後只能夠自生自滅。

本來以為可以揾到安全地方落腳，以為會有人救援同保護我地，點知係空歡喜一場。



呢刻我地全部人都頹左。

「無左救護站，咁我地依家點算好？」Isabel神情失落。

呢個問題無人答到。

我睄到櫈底有一大沓傳單。

拎上手睇下，全部都係位於灣仔一間旅館嘅宣傳單張。

「點解你呢度有咁大沓傳單嘅？你屋企開旅館架？」我問楊過。

「唔係，呢間旅館係個friend開嘅，正確嚟講係啱裝修好但未正式開業，呢啲傳單係佢托我幫手印定先，諗住等到開張之後派。」

我望落傳單上嘅旅館，裝修都幾四正，靈光一觸，就提議話：「不如我地今晚，就喺呢度落腳？我諗你個friend應該唔會介意？」



「Er…佢都變左喪屍…我諗都唔會介意嘅…但其他人點睇呀？」

「我唯一擔心嘅係，嗰度會唔會有喪屍？」Shirley問。

「照計唔會嘅，因為都未開張，只係裝修好無幾耐，連伙計都未請。」楊過回答。

最後大家商量左陣間，達成共識，一致同意去呢間未開張嘅旅館借宿。