性交轉運打喪屍: （62）

然而三槍入面有一槍，射爆左遠處墻上嘅火警鐘。
 
「鈴鈴鈴——」

響亮嘅火警鐘聲傳遍整棟樓。

喪屍對聲音十分敏感，呢刻周圍都係嘈吵嘅鈴鈴聲，反而令到佢地迷失方向。

瘦仔同其他喪屍好明顯，俾嚟自四方八面嘅聲音擾亂左，導致佢地咁亂衝亂撞，甚至撼埋落墻。



我同Sandy個妹當然唔放過呢個機會，趁機穿過側門衝出外面。

一出到去就係一條小徑，我地順住小徑狹窄嘅樓梯落去，然後轉彎穿過一個停車場，最後成功返出去大馬路。

有驚無險，總算順利逃走，脫離險境。

Sandy個妹亦鬆一口氣，稍稍放慢左腳步。

頭先一直都無機會問佢叫咩名，依家終於可以問，亦都順便問埋之前係咪一直困喺城大。



「我叫Shirley，本來同一班同學匿埋喺soc房幾日，諗住等救援，點知等極都等唔到，無曬糧食同水之後，我地被逼要出去揾嘢食揾嘢飲，結果一出去就遇到喪屍圍攻，原本我地同行五個人，最後就死剩我一個。」

Shirley提到同伴嘅離去，臉上流露一絲傷感，跟住又問我：「係啦，你唔係話同我家姐一齊入嚟救我嘅？咁依家我家姐人呢？佢喺邊呀？」

「Er…呢層我都唔知…我地入嚟無幾耐就失散左。」

「你地喺邊度失散架？係咁嘅話，我地要返轉頭救佢先得！」

「又返入去？咁難得先出到嚟，無理由就咁又返入去送死。」



「嗰個我家姐！我點可以就咁走左佢唔理佢…」

佢未講完，我就打斷左佢，指住前面講：「唔好講呢啲住，你快啲望下前面…」

我地一直沿住馬路行，半路又遇到一大班喪屍，一字排開擋住去路。

「唉，弊啦，快啲調頭走！」Shirley剛調頭就即刻停住腳步。

事因後面亦都有一堆喪屍阻路。

「慘啦，前後都無路走，唯有就靠你開槍，射低佢地嚟開路！」Shirley對我講。

「唔掂啦，支槍無子彈！」我向住舉槍掹雞，但子彈用盡，射出嘅只有空氣。

前面一班喪屍，後面又有一班，佢地慢慢逼近，我地卡住喺馬路中央，基本上係無路可走。



「咁多喪屍，我地依家點算好？」

「仲可以點，唯有就睇下有無路可以走。」Shirley環顧四周，嘗試揾路逃跑。

無奈周圍密不透風，幾乎無路可走。

過左一陣，身後忽然傳出汽車引擎聲。

我地擰轉頭，見到有一架黑色私家車，橫衝直衝咁駛緊埋嚟。

「砰！」「砰！」「砰！」

架車一口氣撞飛曬啲喪屍，兼且繼續加速，直衝埋嚟。



我同Shirley唔理三七二十一，即刻閃埋一邊。

「我要同你班喪屍同歸於盡！」我地聽到車上嘅司機大嗌。

架車以極高速嘅速度，撞散前面嘅喪屍。

當中有隻喪屍撞唔走，趴左落擋風玻璃度。

嗰部車唔收油，直接就撞到落交通燈度，順勢一下夾爆嗰隻喪屍。

啲喪屍全部被架車撞走曬，但係架車嘅車頭撞到凹曬，兼且冒緊白煙，就係唔知車入面個司機有無事。