性交轉運打喪屍: （61）

Sandy個妹身為城大學生，對校園十分了解， 我跟住佢左拐右拐，一路上都算係暢通無阻。

「跑快啲啦，過埋前面道門，我地就出到去架啦！」對方一直跑喺前頭，完全唔等我，一味喺度催。

最犀利嘅係佢跑左咁耐，竟然喘都唔喘下。

相反我就跑到腳仔軟又氣喘：「停一停…等埋啦喂…」

「咁渣架你，慢吞吞咁，都唔知點樣生存到咁耐。」佢稍微放慢腳步，停低等我。



至於對方呢個問題我都唔知點答。

以一個廢柴嚟講，能夠喺呢個喪屍爆發嘅香港，生存到咁多日，連我本人都覺得好不可思議。

目前我地位於紫區，根據對方嘅講法，只要我地穿過側門，咁就會出到外面。

之前一路都無遇見喪屍，偏偏喺就嚟要逃出生天嘅時候，出現左幾隻喪屍攔路。

「死火！班喪屍又阻頭阻勢！」



「我地依家係咪兜路比較好？」我問。

「唔好兜啦，橫掂出口就喺前面，你頭先唔係執到支槍架咩，直接開槍射爆佢地啦！」

「下？我咁大個仔都未開過槍，唔知得唔得架喎？」

「咁你平時無玩開嗰啲喪屍game？」

「Er…都有嘅…」我答。



「咁你咪當打機咁射死啲喪屍！」

「但係…」

「唔好但係啦！佢地過緊嚟啦！快啲開槍啦！」

幾隻喪屍逼緊埋嚟，仔細望去，其中一隻個樣同衣著都好面善。

無睇錯嘅話，佢應該就係四個宅男之一嘅瘦仔。

喪屍咬佢唔死，反而變左喪屍。

「仲等咩？開槍啦！」

喺隔籬嗰位催促下，我向前瞄準，一口氣連開三槍。



結果，三槍都射到離行離迾（Laat）。

咁都不得止，響亮嘅槍聲更刺激左幾隻喪屍，佢地發曬茅對住我地咆哮。

瘦仔一個唔該仲撲埋嚟，好彩我地反應快，避得切。

「咁近都射唔中嘅，你玩開喪屍game無理由唔識瞄準架？」

「下？我平時玩開嗰啲唔洗瞄準架喎。」

「無理由，平時我見人玩開嗰啲喪屍game，都係揸住槍射嚟射去架？」

「Er…我淨係玩過植物大戰喪屍…應該有啲唔同...」



我說話剛完，瘦仔連同兩隻喪屍，一齊撲埋嚟我度。

驚慌失措嘅我快速退後，並向住對面開左三槍。

可惜，結果都係一樣，三槍都miss左。

然而三槍入面有一槍，射爆左遠處墻上嘅火警鐘。