性交轉運打喪屍: （63）

我同Shirley慢慢行過去架車度。

車入面嘅安全氣囊彈左出嚟，個司機暈左，但望落唔見血，估計應該無乜大礙。

打開車門，我地兩個慢慢扶個司機落車。

對方年紀睇落都算後生，二十尾左右，不過頭髮稀薄，明顯有「地中海」危機。

佢身上著住白色polo加牛仔褲，最引我注目嘅係，佢心口一個類似頸鏈嘅飾物。



話係飾物，望多幾眼，感覺又唔似係飾物，因為外形好奇怪。

其實就係一條黑色幼繩穿住半隻手指公咁大、扁圓但中間有啲凸起嘅淺啡色物體。

我拍拍司機塊臉，嘗試喚醒對方：「先生！醒醒呀先生！你無事呀嘛！」

司機好快醒左，迷迷糊糊睜開眼，神志唔太清醒：「呢度…呢度喺邊度…我係咪…我係咪已經死左？」

「哈，你醒返就好啦。」我鬆一口氣。



然後對方好肉緊望住我問：「你…你係咪地獄使者？求下你...求下你快啲帶我去見我老婆！」

「先生！你冷靜啲先！我唔係咩地獄使者，呢度都唔係地獄，你啱先炒左車，不過好好彩大難不死。」

「頭先咁樣鏟埋去…諗住同班喪屍一獲熟…但…但咁都死唔去…」對方揦埋口面，完全無為自己嘅脫險而感到慶幸。

「死唔去應該值得開心先係架？做咩苦埋口面？」Shirley就問。

「嗚嗚嗚…我老婆都唔喺度…得返我自己一個…生存仲有咩意義…嗚嗚嗚…」「地中海」司機抱頭大哭，喊得非常淒厲。



睇嚟佢有一段好悲慘嘅經歷。

「嗚嗚嗚…老婆你死得好慘...嗚嗚嗚...係我無用...救唔到你...」

佢坐喺地下抱膝，不停咁喊，我同Shirley想安慰又唔知講咩好，氣氛一度有啲尷尬。

大約五分鐘之後，馬路駛嚟一架七人車。

車上嘅司機向住我地呢邊響安。

隨即車上傳嚟一把好興奮嘅女人聲，叫住Shirley個名。

「Shirley！！！」

無錯，呢架七人車正正就係楊過架車。



當部車一停低，Sandy就跑落車，衝埋嚟攬住Shirley：「你無事實在太好啦，我幾驚以後都見唔到你呀…」

「家姐你都無事…我終於唔洗心掛掛啦…頭先我驚你有事…仲想返入學校揾你…」

兩姊妹激動相擁，喜極而泣。

同一時間，楊過抱住隻狗同Isabel一齊行左落車。

楊過啲手手腳腳受左傷，Isabel個膝頭哥都損左，本來完美無瑕嘅雙腿多左一處礙眼嘅傷口。

從佢地幾個身上嘅傷可以推斷出，佢地應該同喪屍有過激烈嘅搏鬥。

不過點都好，見返去佢地三個無事，我都好開心。



「咦？嗰三個男仔呢？佢地去左邊？」楊過問我。

「死嘅死，變喪屍嘅就變喪屍。」我答。

「咁…呢位係？」楊過望一眼仲坐喺喊緊嘅嗰位司機。

「頭先我地俾喪屍包圍，差啲走唔甩，全靠呢位先生揸車撞走啲喪屍，咁我地先無事。」

「佢係咪受左傷？點解會喊得咁犀利嘅？」

「Er…呢層我都…」我唔知點講好。

個司機就全程無理過我地，繼續狂喊。

現在已經係傍晚時分，西邊嘅太陽落緊山。



「既然Sandy個妹都救左出嚟，咁我地唔好曬時間，快啲過海去維園嘅救護站，收音機話嗰度會協助救援我地呢啲生還者。」我舉手提議。

「呢個我都同意，趁個天未黑齊，我地都係快啲啟程去維園。」Isabel難得附和。

其他人點點頭，對此亦無異議。

當大家差唔多上曬車，就剩得嗰位司機。

雖然只係萍水相逢，但四周咁多喪屍，危機四伏，我地都唔忍心就咁丟低佢。

尤其是楊過，佢最有救人精神，因為二話不說就扶埋個司機上車。

就係咁，我地一行六人，三男三女，啟程前往維多利亞公園。



由九龍塘去銅鑼灣，路程並唔算遠，一個鐘之內點都去得到。

問題係就負責揸車嘅楊過，為左唔車死擋路嘅喪屍，選擇不停兜路，而且有時仲會讓路俾喪屍過，搞到架車行得好慢。

我地其他幾個包括「地中海」司機都身心俱疲，加上架車龜速咁慢，大家都頂唔順，瞇埋眼恰一恰。

過左唔知幾耐，楊過突然叫醒我地：「大家醒一醒啦喂，我地就嚟到啦！」

架車終於過左隧道，再轉個彎就會到維園。

呢一刻天色已經全黑，好在還有路燈照明。

經歷咁多生生死死嘅關頭，如今即將去到救援站，有人力有物資，睇嚟終於可以鬆一口氣，唔洗再擔驚受怕。