性交轉運打喪屍: （52）

架車由黃埔一路駛到九龍塘，轉入路口嚟到學校迴旋處。

迴旋處中央有個花圃，上面有一個樹立嘅雕像，形狀好似有上下兩個圓圈扣埋一齊咁。

睇得出個雕像應該係銅造，但呢刻已經見唔到銅嘅顏色，因為俾紅色嘅鮮血完全覆蓋。

我地架車停喺對開嗰片空地，抬頭見到某棟建築外墻上，「香港城市大學」呢六個字。

本來啲喪屍喺四周圍散得好開，我地駛入嚟嘅時候都算暢通無阻，點知好死唔死，架車準備泊定嗰陣，我抱住嘅嗰隻衰狗，無端端亂咁跳去司機位，仲「hi」到軚盤上嘅響按。



結果架車勁大聲響左一下喇叭，瞬間吸引曬四方八面嘅喪屍埋嚟。

「Shit！你條友係咪路架，咁都抱唔實隻狗！搞到家下引曬啲喪屍過嚟！」背囊友出言責怪。

我即刻反駁：「關我咩事！係隻狗自己跳落個軚盤度…」

「好啦好啦，一人少句唔好拗，大家都係快啲落車啦！」楊過率先抱住隻狗落車。

我都費事繼續同條傻仔嘈，擸齊架撐就跟住楊過行落車。



啲喪屍從四周圍湧緊過嚟，目測至少有七八十隻。

楊過見我地全部人都落曬車，跟住探身入去司機位，唔知郁左啲咩掣，令到架車係無人駕駛嘅情況下倒後行。

「砰！」

「砰！」

「砰！」



架七人車一路退後，車尾就不斷撞開攔路嘅喪屍，直至退無可退，最後撞埋去迴旋處個花圃。

車尾撼到圍住花圃嘅石壆，發出響亮嘅碰撞聲響，另外都有汽車所發出嘅嗶嗶警報聲。

嗰一大班喪屍瞬間就俾呢啲響聲吸引，全部都調轉槍頭，向住花圃前去。

楊過肌肉發達，頭腦卻唔簡單，果然好靠得住！

「架車咁撞法，陣間仲揸唔揸得返架？」Sandy表示擔心。

「唔好諗呢啲住，呢個時候我地應該拿拿臨去揾你妹。」楊過問Sandy，「你知唔知你個妹依家匿埋左喺邊？」

「佢話佢匿埋喺學術樓入面一間課室。」Sandy答。

「咁係邊一層同邊一間課室？」



「唉，呢層我都唔知呀，我同佢傾左十幾秒就斷開左，唔知係信號問題定係佢電話無電，之後就再都聯絡唔返，問唔到佢確實嘅身處地。」

「咁就無計啦，睇嚟我地要逐層逐間咁去揾。」楊過話。

唔係呀嘛，咁大間學校，咁多棟樓，要逐間課室揾，咁要揾到幾時？

以上呢句係本人心裡即時嘅想法，而我卻無宣之於口，免得打擊士氣。

「無事架！我地慢慢揾實會揾到。」瘦仔安慰Sandy。

「係囉，其實City都唔係好大啫，都無我地中大咁大，我相信好快就揾到架啦。」戴帽男都開聲安慰。

呢三個宅男同Sandy都係讀中大，即係話對城大嘅地形並唔係非常了解。



換句話講，我地幾個依家相等於盲頭烏蠅，喺度大海撈針。

其實本來成件事都唔關我同Isabel嘅事，如今只係為左黐車坐先捲入嚟。

諗諗下，Isabel其實講得無錯，男人唔識揸車，真係好唔掂。

我地跟住楊過向前行，嚟到四道紅色大門前，門上橫欄寫住「學術樓（一）」。

四周飄散住濃烈嘅血腥味，喪屍嘅叫聲亦不時喺遠處傳過嚟，導致我地心驚膽戰，見到門都唔敢開，個個人都旨意楊過推門入去先。

楊過抱住隻狗，放輕手腳，慢慢推開中間嗰道紅色大門。