性交轉運打喪屍: （53）

我地幾個跟隨其後，入到去首先見到正面有一條樓梯，另外兩邊嘅路就係通往前面嘅大堂。

由於相信四周都充滿喪屍，所以我地唔敢輕舉妄動，先睇清楚附近環境先。

正當我地檢視緊周圍有無喪屍嘅時候，忽然間隱約咁聽到非常密集腳步聲。

「踏踏踏踏—」

三秒之後，腳步聲越嚟越大，大到有種撲面而來嘅感覺。



於是我地順住聲音抬頭一望。

就喺我地面前嗰條長樓梯，有一大班緊密密麻麻嘅喪屍湧緊落嚟。

「啊！！！！！」兩個女仔嚇得尖叫。

「走！」楊過反應最快，第一時間轉身推門返出去。

我地幾個不敢怠慢，跟住佢尾跑出去。



剛出到門口，左邊傳來同樣嘅腳步聲，擰轉面一睇，原來又有一班喪屍過緊嚟，而且仲非常接近。

呢個危機關頭，梗係唔理三七二十一，見路就跑。

我同三個宅男向住「康樂樓」方向，極速狂奔。

至於楊過同兩個女仔無跟埋嚟，似乎去左另一邊方向。

「Raaaauuughhhh！」



可怕嘅叫聲加上密集而快速嘅腳步聲，令我地不顧一切，亡命逃跑。

三個宅男平時好明顯無做運動，跑得比較慢，只不過我都唔好得佢地幾多，只係快佢地少少。

「唔好走住！等埋我呀！」

跑到半路，突然聽到身後有人撲低。

背囊友同戴帽男充耳不聞，繼續向前奔跑。

我稍稍放慢，擰轉面，見到瘦仔跌左喺地下。

「等埋我呀…」

瘦仔都未嚟得切起返身，後面嘅喪屍經已撲上去，擒住佢嚟咬。



我無奈歎氣，且擰返轉頭，不忍再看。

後面咁多隻喪屍，一個人類當然唔夠分，所以其他喪屍繼續追住我地。

我再次提速向前跑，總之唔理咁多，有路就跑。

跑跑下都唔知自己跑左去邊，淨係見到隔籬樓下有個游泳池。

嚟到一條短樓梯前，準備想行上去，殊不知，背囊友同戴帽男突然擋住喺樓梯口。

佢地兩個人流曬汗，喘曬氣咁。

「喂！班喪屍追到嚟啦！你地做咩停喺度？」



後面一班喪屍距離我地唔夠五十米，就嚟要追到。

背囊友喘住氣，同時間舉起手上嘅槍，無端端指向我。

我大吃一驚：「喂…你…你想點呀？」

「跑唔贏班喪屍唔緊要，只要跑贏你就得啦！」

講完呢句，背囊友向住我心口開一槍。

「砰！」

子彈射中我心口，嗰種衝擊力令我連退幾步。

我掩住心口，眼白白睇住嗰兩條仆街跑走。



之後中槍嘅我坐喺地下，等待死神降臨。

兩種死法，一係就流血死，一係就俾喪屍咬死。

只不過，時間過左幾秒，我都好似感覺唔到咩痛楚，隨即低頭望望心口。

咦？點解無血出嘅？

呢一刻我先醒起，今朝離開日本城嗰陣，喺心口攝左塊砧板。

粒子彈淨係射中砧板，射唔到入去我啲肉，所以我無事，唔洗中槍死。

「踏踏踏踏—」



雖然唔洗中槍死，但班喪屍已經殺到埋身。

咁落去唔中槍死就會變成俾喪屍咬死。

見到樓下個游泳池，我腦海冒出一個大膽嘅想法。

同班喪屍鬥跑，遲早會無氣，既然係咁，不如博一博，乾脆跳落游泳池。

「Raaauuughhhh！！！」

班喪屍距離我只要兩步之遙，數隻血淋淋嘅手已經向前伸出，無時間再俾我諗咁多。

因此，我果斷咁跳上圍欄，跟住瞇埋眼，縱身向住游泳池一躍。

跳嘅時候，feel到有喪屍伸手捉住我，好彩只係捉到我對鞋，捉唔到我隻腳。

最後我成功「凍」一聲跳落泳池，幾經波折先能全身而退。