性交轉運打喪屍: （51）

「我架車就停喺對面。」楊過指住停泊喺對面馬路嘅七人車。

而馬路中央，有一架被棄置嘅警車。

坐上車，我坐到司機隔籬位，兩個女仔就坐喺最後一排。

至於三條宅男就不見影蹤。

楊過帶住隻狗，坐上司機位，佢調整車廂後鏡，問Wendy：「咦，你幾個Friend唔見左嘅？」



「係喎，佢地去左邊？點解無跟埋嚟嘅？」Sandy探頭出車門外，四處張望。

過左一分鐘度，嗰三條友先出現返。

原來佢地頭先，去左嗰架廢置嘅警車上搜略武器。

背囊友上車後，向後面座位嘅Sandy，展示手上嘅手槍：「我地幾個執到幾支槍，一有喪屍埋你身，我地就開槍射爆佢個頭！」

「係呀Sandy你唔洗驚架！我地一定會保護你！」「無錯！有我地喺度，你唔洗擔心！」戴帽男同瘦仔輪流對Sandy講。



佢地三個執左四支槍，背囊友將多左嗰支遞俾司機位嘅楊過：「喂！你要唔要？」

楊過堅定咁搖搖頭：「不必啦，喪屍都係人命，我係唔會傷害佢地，最好你地都唔好亂開槍射殺佢地。」

「唓！懶係嘢，唔要就慳返！」背囊友收返支槍入背囊。

「佢唔要我要呀！」我就伸手問對方攞。

「你要呀？但我偏唔俾你呀！」背囊友串串貢，寧願自己收埋支槍都唔俾我。



跟住佢執起座位底下嘅水槍，拋過嚟俾我：「呢度有碌水槍，粗粗地拎去洗啦！」

頂佢個肺，我心諗我又無得罪佢，條友洗唔洗咁q串！

唉，點都好啦，水槍都係槍，話唔埋噴啲水落地，都可以冼低啲喪屍，所以我將佢收埋喺褲袋。

經歷過踩住西瓜皮冼住砌低班喪屍，我依家相信無嘢係唔可能。

「好啦，熱完車，大家坐穩，準備開車！」

楊過纜好安全帶，然後將佢隻寶貝狗交到我手上，「麻煩你幫我照顧住Jojo先。」

話曬隻狗都係喪屍，咁樣抱住喺手，我點係有啲淆：「佢…佢會唔會咬人架？」

「放心啦，笠住左個罩，唔會咬你嘅，同埋小心你手上把刀，唔好整親我Jojo。」



隻貴婦狗喺我懷中非常不安分，不停盅個頭過嚟，好似想咬人咁。

好在有個罩隔住，隻狗先咬唔到。

但我好擔心個罩隨時會甩，因此幾乎全程車都打醒十二分精神，打開埋車窗，只要一有咩依郁就即刻拋佢落車。

揸緊車嘅楊過擰開收音機，電台又播放嗰段關於維園設置救護站，以及專家正研發解藥嘅公告。

呢一刻我淨係希望，我地可以盡快救出Sandy個妹，然後無穿無爛咁去維園揾救援。