性交轉運打喪屍: （48）

Isabel繼續同我講：「你又唔識揸車，條街又無巴士又無地鐵，你唔係諗住我地就咁行過去呀嘛？」

「Er…或者都行得通嘅…可以經隧道行過海？」我答。

「你都烚戇嘅，入左隧道，萬一唔好彩俾喪屍塞住出入口，咁到時我地點走呀？」

Isabel呢個問題再次考起我，我無法回答。

然後，佢就問嗰四個宅男：「我想問下你地幾個，有無人識揸車呀？」



一直無出聲，淨係掛住偷望Isabel對腳嘅肥仔，衝出嚟舉手：「我識呀我識呀！我有車牌，我識揸車，架車就停左喺對面馬路渣嘛。」

「咁肥哥哥，你可唔可以車人地過海呀？」

Isabel學嘢學得真係快，即刻就識得向條肥仔放生電，仲借啲意拉高條身上嘅灰色窄裙，露對髀出嚟，想用美人計氹對方車佢過海。

「原來你想過海，我唔介意跟埋一齊保護你架！」另外嗰條瘦仔都埋嚟獻殷勤。

呢兩條友仔睇嚟見異思遷，轉會想溝Isabel。



「嗚嗚嗚—」

呢個時候，旁邊嘅Sandy突然喊起上嚟。

「嗚嗚…陳仔、阿明（相信係肥仔同瘦仔嘅名）…你地係咪唔幫我啦…嗚嗚…都唔緊要嘅...就算我自己一個去都ok嘅...嗚嗚...」

Sandy一邊抹眼淚一邊講，嗰兩條友見到佢喺度喊，立即行過去安慰，就連戴帽男同背囊友都埋去一齊安慰。

過左一陣，嗰四個男仔商量完一輪，決定就先幫Sandy去城大救個妹，之後連同Isabel一齊過海去維園。



「我地決定好啦，咁你就跟我地車，先去城大先，救到Sandy個妹後，我地就一齊過海。」肥仔對Isabel講。

「好呀！好多謝你地呀！」Isabel表示感激。

「不過有個問題，就係我架車最多坐得五個人，呢度七個人，唔夠位坐喎。」肥仔數一次人頭。

「我夠瘦，霸唔到好多位，逼少少估計可以坐到六個。」瘦仔話。

「部車位置就得咁多，咁即係話我地當中有一個人無得跟埋嚟。」戴帽男講完呢句，全部人嘅視線一致投向我身上。

我大吃一驚：「唔係呀！我都好瘦架，逼逼地應該攝得入架！」

「唔好意思，睇嚟我地唔可以帶埋你一齊，架車就得咁多位，仲要留位俾我個妹，真係無法再容納多一個人。」Sandy對我講。

「唔好咁啦，求下你地帶埋我走啦！」我繼續乞求。



佢地班人包括Isabel都無理我，直接行出餅鋪門口。

我追上去前，唔肯罷休：「求你地做下好心，帶埋我走啦！Isabel，連你都咁樣揼低我？」

Isabel擰轉面對我講：「Sorry，我同你本來就有無咩關係，甚至其實我連你個名都唔知，我幫你唔到。」

我死心不息，繼續死纏爛打，一路纏到佢地過對面馬路攞車。

「車尾箱仲有位，我唔介意屈喺入面架…」

但無論我點講，班人都係唔理我。

條肥仔行最前，佢埋去架車度，啱打開車門。



忽然之間，唔知從邊度，標左隻貴婦狗出嚟。

隻狗衝埋去一啖咬落肥仔隻腳度。

「啊！！！」肥仔痛苦咁仰天大叫，隻腳狂噴出鮮血。

全部人包括我都嚇到o左嘴。

隻貴婦狗神色猙獰，眼珠呈灰白色，莫非都係喪屍？