性交轉運打喪屍: （49）

隻癲狗咬住肥仔隻腳唔放，啲血好似噴泉咁，噴個不停。

我地全部就得個「睇」字，無一個人去幫手。

「Jojo，曳曳豬呀你，睇少你一陣就周圍走。」

呢個時候，有一個身材高大，全身肌肉嘅男人跑過嚟拉開隻狗。

個肌肉佬著住運動背心同短褲，手瓜起展，心口胸肌就嚟要撐爆件衫。



「哇，好大隻呀…」Isabel心心眼望住肌肉佬。

「哎呀，JoJo曳呀你，亂咁咬人都有嘅！」肌肉佬單手抱起隻貴婦狗，跟手將類似狗口罩嘅嘢，笠落隻狗個嘴度。

跟住，佢對住肥仔非常誠懇地，九十度鞠躬致歉：「呢位先生，唔好意思呀，頭先我無睇實Jojo，搞到佢走圍走又亂咬人，真係好對唔住！」

肥仔坐左喺地下，表情痛苦咁掩住腳上嘅傷口，塊面同手腳開始變得灰白。

「喂！你條友有病呀？周圍放癲狗咬人？」背囊友氣沖沖咁，衝埋去肌肉男面前理論。



「Sorry，好對唔住，係我一時疏忽無好好睇住Jojo，但我係無心架，Sorry。」肌肉男繼續鞠躬耍冧。

戴帽男就問：「你隻狗…係咪喪…喪屍？」

肌肉男點點頭。

「咁肥仔俾隻嘢咬左，咪即係會變喪屍？」戴帽男連同背囊友、瘦仔、Sandy，圍埋去肥仔跟前關心。

肥仔臉色越嚟越差，氣息變得非常微弱：「救…救我…」



「喂，睇嚟肥仔唔掂啦，趁佢未變喪屍之前，我地不如解決佢先。」背囊友喺背囊拎左個錘仔出嚟，並提議，「大家包剪揼，猜輸嗰個就落手。」

Sandy退後一步，戴帽男、瘦仔就點點頭，伸手出嚟一齊猜。

結果係背囊友贏左。

「唔…唔好…我唔想...死」肥仔塊面已經白到好似死屍咁。

「對唔住，我地都唔想。」背囊友深呼吸一口氣，舉起錘仔準備毆落去。

「喂喂喂！你真係想毆落去呀？有無人性架你地！人命嚟架！」肌肉男突然出手阻止。

「頂！你快啲放手啦！依家唔殺死佢，陣間佢變喪屍就麻煩架啦！」背囊友手上嘅錘仔俾肌肉男單手捉住，想扑落去都扑唔到。

「傻嘅咩！就算變成喪屍你都唔可以打死佢架！」



「下！點解呀？」背囊友一臉迷惑。

唔單止係佢，其他人包括我呢個花生友在內，都表示無法理解肌肉男呢句說話

「你地無聽收音機架咩？香港嗰啲化學家、生物學家、醫學家等等專家，已經開發緊解藥，呢班喪屍好快就有救，所以你地係唔可以打死佢！」

呢頭肌肉男講完，嗰頭肥仔就企返起身，且完全變成左喪屍。

「Raaaauuugh！」

肥仔大聲咆哮，腳上嘅傷好似好返曬咁，即刻行得走得，仲跳起撲向人堆。

背囊友棄錘閃避，至於戴帽男、瘦仔同Sandy亦急急腳躲避。



然而個肌肉佬就無縮，先用個手踭輕鬆撞開肥仔，跟住抱住隻狗快速轉身，一記旋風地堂腿就掃低對方。

話曬肥仔都有啲噸位，卻咁輕鬆就被掃低，可見肌肉男力量相當之大，動作亦非常瀟灑。

「真心好有型！」Isabel眼都唔眨，好仰慕咁望住肌肉男，我諗佢下面應該濕曬。

肥仔好快起返身，再舉手撲埋去，肌肉男將隻狗放上車頂，再不慌不忙咁側身閃避。

隨後，佢雙手捉住肥仔膊頭，夾硬將對方個身擰返轉。

肥仔面朝前方，背脊呢刻向住肌肉男。

然後，肌肉男大大力一腳踢落肥仔個屎忽，將對方成個人踢走到差唔多兩米外遠。

「Raaaauuugh…」肥仔無再擰轉身，反而向住佢嘅前方走遠。



肌肉男抱返隻狗，對住肥仔嘅背影揮手：「放心啦！研發到解藥之後，你就會無事架啦！」

睇曬成個過程，我第一個感覺就係，呢個充滿肌肉嘅男人非常抽得，超級犀利，相信係一個好值得依賴嘅人。