性交轉運打喪屍: （33）

相比起樓下，二樓嘅燈光就較為光亮。

一眼望去，基本睇得清周圍嘅環境。

嚟到第一眼就見到一間吉野家，喺佢嘅斜對面係錶鋪。

間吉野家係開放式設計，意思即係舖頭與走廊相連，無任何門窗阻隔，個收銀位亦正面面向走廊。

再行前多些少，望到走廊盡頭有一間，叫「真開心樂園」嘅室內遊樂場。



血跡一撻撻散佈地上，呢啲不在話下，除此以外，仲有啲斷手斷腳，甚至斷頭嘅屍體。

當中「重災區」就係吉野家，裡面不但檯櫈凌亂、鮮血淋漓，而且還有一堆屍首分離嘅食客。

其中有張檯，上面有個血淋淋嘅人頭，把口咬住半塊肥牛。

可以想像當時個情景係，條友啱放塊肥牛入口，跟住就突然有隻喪屍埋去咬甩左個頭，我齋諗都有少少毛管戙。

我地一路直行，經過間嘢嘅時候，突然就有隻喪屍喺counter跳出嚟。



三個南亞仔反應好迅速，拎住板球棍同西瓜刀，三兩下手勢就合力解決左隻喪屍。

「喂！你地幾個唔好跟住曬，過去睇下另一邊咩環境。」金毛仔用吩咐嘅口吻對我地講。

「喂乜喂？你邊位？幾時輪到你點我地做嘢？」Jason 條氣唔gur，又想搵交嗌。

「點呀，係咪要隻抽？」金毛仔旁邊個滿面鬚根嘅南亞仔又嚟挑釁。

「嚟呀，我驚你呀…」



我二話不說，快快手掹走Jason，費事佢地又嘈過。

我地兩個連同Isabel，掉頭到走廊另一邊。

「做乜拉走我，等我俾啲教訓…」Jason講講下突然索一下鼻，抹走鼻哥流出嘅鼻涕，「教訓班阿差…」

條友有吸毒習慣，咁嘅動靜，似係毒癮起。

海悅廣場同一般屋邨商場差唔多，樓底唔高，面積唔大，沿住環形走廊兜個圈，眨下眼就行曬。

除左啲鋪頭笠笠亂之外，都唔覺有喪屍，亦唔見有其他人。

兜左圈返到中庭位置，金毛仔就問：「點？你地有無見到喪屍？」

「無，唔見有。」我搖搖頭答。



金毛仔指住我話：「你！你上去三樓望下。」

「我？」

「係呀，叫你去就去啦！」

Jason索完鼻，又加一把嘴：「憨鳩！要上你自己上！」

「無問題，我去，我上去得啦。」

我即刻開聲閘住，唔俾佢地嘈，然之後一支公行上三樓。

商場嘅三樓俾一間酒樓霸曬全層，不過據聞間酒樓已經裝修左大半年，平日無乜人上去。



沿扶手梯行上去，只見酒樓門口落曬大閘，無人又無喪屍。

地下至到三樓暫時都唔覺有喪屍，即係話商場呢度都算係幾安全。

睇嚟可以喺度暫避一下。

為免街外嘅喪屍闖入嚟，我提議搵嘢鎖住樓下兩側門，其他人都表示同意，但無人去做，結果得我一個人去搞。

我揾左幾間舖頭，先搵到幾條麻繩，用嚟綁連住玻璃門上嘅拉手。

至於外面啲雨好似細左，個天都開始無咁陰沉。