性交轉運打喪屍: （34）

未返上二樓，喺樓梯就聽到好嘈嘅雜聲。

而啲聲係嚟自三個南亞仔。

佢地打爆吉野家個counter，撬開部收銀機，拎左入面啲錢出嚟。

「咁多張一千蚊，發達啦！」鬚根佬笑笑口揸住沓金牛，另外二人喺旁邊亦笑得開心。

佢地爆完一間鋪頭，又爆第二間，都算幾猖狂下。



我就無多管閒事，周圍瞄左一陣，發現唔見左Jason，淨係見到Isabel唔知喺邊度，搬左張大班椅出嚟。

「嗯？Jason呢？」我問。

「佢去左廁所『上電』。」Isabel答完，就問我借支水。

我打開背囊，遞樽水俾佢。

對方用兩隻手指掂住樽蓋，拎到上手，睇左兩睇，好似要驗過無嘢先至擰開水樽。



我以為佢拎支水嚟飲，點知係拎嚟抹櫈。

佢喺褲袋拎包紙巾出嚟，倒啲水落張紙巾度，成張大班椅仔細咁抹一次。

講真，張櫈無血無剩，條女咁都要抹，似乎係有潔癖。

「係啦，點解你地會嚟到呢個商場嘅？」我一半為好奇，一半為R水吹而發問。

「Well，本身呢，我同Jason就匿喺上面半山壹號，which is即係Jason嘅屋企啦，本身都好地地架...」Isabel講到一半停低左。



佢見到自己左腳大髀污糟左，沾左啲塵，於是坐上張櫈，倒啲水落張新紙巾度，抹一抹大髀。

佢一邊抹一邊繼續講：「You know，Jason個uncle係政府啲高層，佢話會派人嚟救我地，叫我地stay喺度唔好周圍走，咁我地咪一心等人嚟救，結果turns out等左幾日都無人嚟。」

剛才條友無乜點出聲，家下講多幾句，就lur曬英文咁，都唔知佢講乜。

「and then屋企突然斷水，加上我地聽到收音機話，維園有救護站接收生還者，咁Jason咪決定揸佢架開蓬跑車，車埋我一齊過海，偏偏未出土瓜灣就落大雨，所以就被逼嚟呢度避雨。」

講左咁多，結論就係因為要避雨，所以入嚟呢個商場，其他嗰啲乜嘢高層uncle，全部都係廢話。

其實頭先聽到一半，我已經無心機聽，淨係掛住偷偷地𥄫佢對腳。

越睇就越覺得正，真心好修長，好白滑，同埋佢啲腳趾都生得好靚，無搽指甲油，反而顯得裸色指甲更晶瑩剔透。

我望到入曬神，差啲口水都流埋，之後feel到對方銳利嘅眼神睥住我，我先轉移視線。



「砰鏘！」

過左一陣，附近傳出一下刺耳嘅破裂聲。

我嚇到彈起，即刻睇下咩事。

原來係三個南亞仔打爆左錶鋪嘅櫥窗，擸曬全部嘅錶。

「發達啦發達啦！」佢地三個重重複複都係呢一句。

依家呢個環境，換轉係我，寧願搶水搶食物好過。

「哇！仆街呀！」



嗰個留「二撇雞」，手執板球棍嘅南亞仔，忽然爆粗，急步退後。

事因喺錶鋪突然攝出一隻，無左一隻手同腳嘅喪屍。

隻嘢趴喺地下爬行，兼捉住「二撇雞」隻腳。

金毛仔同鬚根佬馬上幫拖，一個揸住西瓜刀，一個拎板球棍，起勢狂毆。

不到三秒嘅時間，「二撇雞」順利擺脫喪屍。

然後，三條友繼續圍住隻喪屍嚟砌。

當佢地再散開嘅時候，隻喪屍已經變成一堆肉醬。

「你無事呀嘛？」金毛仔問「二撇雞」。



「無事，條褲hi左啲血啫。」

「哈，無事就好，咁唔好停曬手，繼續擸埋啲錶。」鬚根男講話。

「Er…我想去個廁所先，想抹抹條褲啲血。」「二撇雞」話。

「好呀，係去就快啲去啦，你要拎鎖匙嘅話，開心樂園嗰邊櫃檯有。」金毛男指一指走廊尾。

呢啲屋邨商場要用鎖匙先開到廁所道門，於是「二撇雞」先行去拎鎖匙。

而鬚根男發現我喺度𥄫佢地，大聲喝我：「望咩望？有咩好睇呀？」

我立即擰返個頭，Isabel就細細聲同我講：「嗰三條友咁惡，勸你唔好咁多事去惹佢地。」



我「哦」左一聲作回應，心諗唔洗你講我都知啦。

「二撇雞」落去地下去廁所，過左無幾耐，Jason終於返上嚟。

「BB，你返嚟啦！」Isabel起身迎接。

Jason卻氣沖沖走埋嚟，好用力咁捉住Isabel，粗聲粗氣問：「喂！你有無見過我包粉！」

條友口水鼻涕流曬出嚟，雙眼紅筋暴現，個樣仲恐怖過喪屍。