性交轉運打喪屍: （32）

Jason一隻手攞住高爾夫球棍，一手拖住高佢一個頭嘅Isabel。

「Unlucky，咁橋嘅，咁都撞到你。」

「你點解又會喺度嘅？」我問。

「講嚟一匹布咁長，不如入去先啦。」

我地推開玻璃門，慢慢行入商場。



整個商場有三層，我地依家身處嘅地下一層，主要係啲賣衫嘅鋪頭，同埋有間m記。

入到去，環境有點昏暗，周圍見唔到有人，地上則散落著零星嘅血跡。

「BB，呢度好似好恐怖咁。」Isabel個樣驚驚青青。

「有我保護你，唔洗驚。」Jason拖實女方隻手。

Jason矮佢條女咁多，感覺就好似小朋友保護大姐姐。



大雨仍然嘩啦嘩啦落個不停。商場裡面除左聽到外面嘅雨聲，就無其他聲音。

「乞嚏！」Isabel突然打一聲乞嚏。

「打乞嚏呀你？係咪頭先淋左啲雨凍親呀？」 Jason問。

「我諗係啦。」

其實Isabel同Jason只係頭髮同件衫濕左少少，相反我就淋到濕到成隻落湯雞咁。



我地打左一個白鴿轉，都唔見有喪屍，照咁睇地下呢一層應該尚算安全。

呢刻我個心稍稍定左落嚟，打開背囊，拎頭先喺七仔擸嘅樽裝水出嚟飲。

渴左咁耐，終於可以潤下個喉。

「鏘鏘！」

啱飲左兩啖水，忽然傳出硬物敲擊嘅聲音，還有急促嘅腳步聲。

「咩聲呀？係咪喪屍？」Jason左右張望。

「唔係掛BB，你唔好嚇我喎，」

「算啦唔好理，我地快啲上二樓先。」



Jason拖住Isabel急急腳走上樓上，我亦跟隨其後。

通往二樓嘅扶手電梯壞左唔郁，我地要用腳逐級檻上去。

Jason行第一，Isabel喺佢後面，我就行最後。

Isabel企喺我前面，我呢個角度完全𥄫到曬佢對腳。

佢上身著灰色小背心，下身係一條短到就嚟見到屎忽嘅黑色熱褲。

就算只係著住人字拖，但佢嗰對42、43吋長腿望落都已經夠曬長。

長得嚟又夠直，大髀又有肉地，小腿有線條，兼且白白淨淨，皮光肉滑，名副其實淨係對腳都有排玩。



開講雖然有話「朋友妻，不可窺」，不過擺曬出嚟都唔望，咁就係「假君子，真吃虧」。

「喂！你地企喺度！」

喺扶手梯行到半路，身後有人大聲叫停我地。

回頭一看，有三個二十歲出頭嘅南亞裔男人，凶神惡煞睥住我地。

佢地全部人都係著住黑色tee，其中二人揸住板球棍，一人拎住西瓜刀。

揸西瓜刀嗰個頭髮染金，塊面無留鬚，另外兩個頭髮都係攣攣地，一個滿臉鬚根，另一個就留左執「二撇雞」。

「喂！你地係人定係喪屍？」Jason「喂」返轉頭，反問三人。

「下？你條死矮仔發雞盲呀？喪屍塊面灰色架！你睇我地呢個樣，邊忽似喪屍？」金毛仔操一口流利嘅廣東話反駁。



「頂你個肺！你個死差仔話邊個係矮仔？話邊個發雞盲呀？」

崩口人忌崩口碗，Jason俾人講中痛處，情緒激動起上嚟，居然破口大罵。

「仆你個街，你講乜撚嘢！」「你話邊個差仔呀，死矮仔！」「你條矮仔係咪嬲打？」

對面三個南亞仔即時辣著左，揮動手上嘅架撐，好似想開拖咁。

而佢地每個人嘅廣東話都係十分流利正宗。

Jason嬲爆爆，舉起高爾夫球棍，不甘示弱：「嚟啦！打咪打囉！驚你有牙！」

「落嚟啦！屌你老母！矮冬瓜！」



「你夠pop咪上嚟囉！摩囉差！」

雙方左一言右一句，互相挑釁，嘈到拆天。

我頂唔順開口大聲嗌停：「屌啦星！你地一人少句咪撚嘈啦！咁撚大聲，陣間引曬啲喪屍過嚟，就唯你地事問！」

……

…....

雙方真係靜左唔出聲。

大約五秒後，Jason先再開聲：「哼！我先唔同你啲爛仔一般見識！」

講完佢就轉身拖Isabel上二樓。

「收皮啦！係我地大人不記小人過，唔同你計較渣！」

金毛仔邊講邊行，帶住兩個同伴行上扶手梯，直上樓上。

雖然步伐唔一致，但我地六個人全部都上曬嚟商場嘅二樓。