性交轉運打喪屍: （30）

「Raaauuugh！！！」

呢隻喪屍例牌又咆哮一聲，跟手就迅速衝埋嚟。

我急忙退後，順風而退，一口氣連續快速後退左十幾步。

「唔『巧』過嚟呀！」匿喺後面嘅娟姐驚慌大叫，「不要！不要引他過來！」

其實唔係我想引隻喪屍過去，係除左往後退之後，我根本無地方可避。



跟住，喪屍跳起飛身撲前，情急下嘅我使出滾地翻，勉強避開左。

「啊！！！！」

娟姐尖叫大嗌，因為喪屍咁啱跳到佢前面。

佢揸住菜刀，乜都唔理亂咁斬，中左幾下喪屍嘅手，可惜傷害有限，仲俾喪屍一手掃走把菜刀。

把刀飛落去附近墻身上一個邪骨燈箱招牌度，喺土瓜灣呢啲舊唐樓區，好多地方都有鹹濕招牌。



見到娟姐有危險，我即刻起返身，拎住鐵鏟衝埋去幫拖。

佢隻右手伸出嚟想捉娟姐，我就一個鏟斬斷半隻手掌。

啲血噴落娟姐到，又嚇到佢大嗌，兼走夾唔抖。

對付喪屍，最有用嘅方法就係打爆佢個頭。

問題係啲喪屍係咁郁身郁勢，好鬼難去瞄準，再加上我已經消耗過多，身體越嚟越虛，專注力同速度都減弱左唔少。



睇嚟我又要用返頭先假動作嗰招。

今次我選擇fake右邊，喪屍一如所料咁中計，衝向我嘅右手邊。

然後，我即刻轉向到左邊，同時舉起鐵鏟斬落去。

本以為會成功，無諗到隻喪屍突然雙手高舉，佢隻左手手臂咁啱擋住左我嘅攻擊。

鏟刃深深陷左入佢厚實嘅肉度，令鐵鏟一時間掹唔返出嚟。

對方又想埋身咬我，於是我不得不放開個鏟，踎低閃避。

依家嘅我手無寸鐵，無法攻擊，只能左閃右避。

無奈體力幾乎消耗盡，退多兩步就真係腳軟，成個人向後「凳」左落地。



體型龐大嘅喪屍喺面前張開血盆大口，雙手張開，我知自己走唔甩，瞇埋眼受死。

「呼—」

耳邊吹來風聲。

等左一陣，喪屍好似無撲上嚟，偷偷地睜返開雙眼。

只見喪屍停左喺度唔郁，頭頂不斷冒煙。

開頭我唔知咩事，後尾睇真啲，留意到喪屍雙手架起，佢左手手臂所插住嘅鏟頭，連住嗰個金屬柄，掂到旁邊掛喺墻上嘅邪骨燈箱廣告牌。

莫非剛才娟姐把刀飛爆個燈箱，導致到漏電？跟住啲電經過個鐵鏟，流去喪屍身上，電到佢個頭出煙？



似係啦...似係啦...

又一次死過返生，我拍拍心口，定一定神。

喪屍倒下之後，頭先一直匿埋嘅娟姐終於敢蒲頭。

呢條友仲差啲直行直過，想瀨低我自己一個走左去，係要我開聲嗌佢，佢先肯過嚟扶我起身。