性交轉運打喪屍: （29）

攞起鐵鏟，我加快腳步行落樓。

唔單只鏟頭，鐵鏟嘅柄都係金屬物料所造，所以其實都幾重幾墜手。

話咁快落到嚟最低嗰層樓梯，終於見返娟姐。

「咦『運滯』，『梨』無事呀？」

「頭先好險，差啲就死。」



「『梨』無事就『巧』啦，不如『梨』嚟打開道鐵閘呀？」

娟姐縮後一步，示意我去打開大廈樓下道鐵閘。

隔住鐵門都聽到外面有啲奇怪嘅雜音，希望唔會一開門就又有喪屍撲埋嚟。

我輕輕擰開把鎖，慢慢推開鐵閘。

「呼—呼—」



開門迎面撲嚟嘅唔係喪屍，而係一陣強風。

啲風好大，吹起曬地下啲雜物，報紙、膠袋呢啲全部都被吹到上半空。

探頭確認過門外四周圍安全後，我地先慢慢咁行出去。

我地要行過兩個街口，先去得到最近嗰間七仔。

娟姐驚驚青青，縮埋喺我後面。



其實我都好淆底，只係男人老狗無理由縮喺女人後面，幾驚都好都要頂硬上，點都係要行第一。

依家係中午時分，天上卻烏雲密佈，陰陰沉沉，而且一路都刮緊好大風。

按感覺推斷，呢個風力至少都有八號風球嘅級數，有時啲風迎面猛吹埋嚟，都真係會行唔郁。

至於街上人跡罕至，周圍嘅環境可以用「滿目瘡痍」嚟形容。

血漿及斷肢基本上隨處可見，大部分嘅商店同餐廳都打鬥過嘅痕跡，混亂一片。

馬路上就有汽車翻側，路燈閃下閃下，街道兩旁嘅廣告招牌則搖搖欲墜。

行左大約一百米，暫時都風平浪靜，未見有喪屍。

然而我地都唔敢鬆懈，打醒十二分精神，保持最高警覺。



行過馬路，只要轉彎再過多條馬路，就會到達七仔。

我同娟姐一前一後，帶住不快不慢嘅步伐前進。

「Raaauuugh！！！」

就喺轉彎嘅時候，一隻喪屍忽然之間標出嚟。

用得個「標」字，經已說明左喪屍行動突然而非常迅速。

企喺後面嘅娟姐拿拿聲退避三舍，相反，身先事卒嘅我行先死先。

我俾隻喪屍緊緊攬住，哄個頭埋嚟我膊頭度。



今次佢咬嘅正正係我無攝番簡嗰一邊。

我以為自己條命係咁大，點知俾佢「咬」左一陣，我都feel唔到痛，同埋唔覺有血出，咁擰轉頭望望隔籬。

咦？乜隻喪屍戴住左口罩嘅？

莫非佢未變喪屍前，感染傷風，所以要戴口罩？

隻喪屍咬極都咬唔入肉，個樣仲好似好疑惑，可能思考點解咬嚟咬去都咬唔到嘢，跟住佢突然間鬆開手。

我就趁呢個機會成功擺脫，並且順勢舉起手上嘅長鐵鏟，對住對方個頭劈落去。

可惜打歪左，淨係斬斷左隻耳仔。

少左一邊耳仔，個口罩隨其自然脫落。



喪屍大嗌一聲，再次撲過嚟。

拎住沉重嘅鐵鏟，導致我行動變慢，想避開卻又避唔到。

呢一次喪屍又捉住我，用口咬我無攝番簡嗰邊膊頭。

我心入面都諗住今次無啦，個膊頭準備要被咬甩。

估唔到結果再次出乎意料！

隻喪屍猛咁咬，而我又係覺得不痛不癢，再望一望，發現原來隻喪屍係個無牙老坑。

條友啲牙甩鬼曬，想咬都咬我唔到。



哇！咁都無事，咁就真係行運啦！

既然咬我唔死，咁就輪到我反擊。

我用膊頭大力頂開佢，然之後雙手揸實鐵鏟，瞄準佢個下巴，從上而下隊一嘢爆佢！

紅色嘅鮮血如噴泉一般湧出嚟。

一秒之後，隻無牙喪屍訓低左。

但搏鬥仲未完，因為緊接住又出現第二隻喪屍。

呢一隻喪屍無戴口罩，啲牙又尖又齊整，身形亦頗為龐大。