性交轉運打喪屍: （5）

本身我收七點，為左搵道死人符而OT留到十點半，揾左三個半鐘，摷勻成間道堂都係搵唔到。

揾到攰嘅我心灰意冷，最後選擇放棄，直接收檔返屋企。

道堂位處紅磡，我屋企喺土瓜灣，位置相隔唔遠，行二十分鐘左右就返到。

行到半路覺得有啲口渴，於是就到七仔買啲嘢飲。

俾完錢，我拎住支津路行出舖頭，突然間有個阿叔好似趕住投胎咁，又唔睇路，推住架手推車撞埋嚟。



隻左腳當堂被撞瘀左，個阿叔則掂行掂過，連對唔住都唔講聲。

痛楚都未消，無端端樓上唔知邊個細路百厭，掟左個水彈落嚟。

我中到應一應，全身都濕曬。

呢啲就係所謂嘅「禍不單行」，然而對於我吳幸允嚟講，呢類倒霉事早就習以為常，見怪不怪。

而喺呢個咁狼狽嘅moment，偏偏遇上舊同學。



一架紅色開篷跑車駛來並停靠路邊。

跑車嘅主人係個身高一米五，留all back髮型嘅矮仔，喺佢嘅身邊卻拖住一條身材非常高挑嘅短裙索女。

「咦！『unlucky』，乜咁啱嘅？」

個矮仔揮手向我打招呼，佢個名叫Jason，係我中學時嘅同班同學，至於「unlucky」係我以前中學嘅花名。

「哇，你做咩成身濕曬嘅？游水嚟呀？」Jason嘅高度剛好嚟到身邊女伴個膊頭。



「頭先唔知上面邊個咁大整蠱，倒啲水落街。」我答。

「識你咁耐你都係咁黑仔，果然無改錯名，哈哈！」佢講完呢一句，用力索一下鼻。

望真少少就會留意到，佢嘅人中位置沾左啲白色粉末。

呢種遊手好閒嘅有錢仔，平時就係鐘意吸毒。

「係啦，你見唔見到我架新車，型唔型呀？」

Jason指住架開篷跑車：「上個月我生日嗰陣我老豆送架，別註限量版，全世界得五部，係咪好型呢？」

「型…好型…」我敷衍回答。

「哈哈哈！識貨！」對方又索一下鼻，跟住炫耀手上戴緊嘅手錶，「咁呢隻Richard Mille呢？八十萬！靚唔靚？夠唔夠grand？」



條死矮仔一如以往都係咁鐘意曬命，咩嘢Richard乜嘢，我窮鬼見識少，名牌嘅嘢識條鐵，淨係求其點下頭，應付式答兩句。

「好靚好靚，夠『gang』夠『gang』」

「哈哈哈哈！唔係讀gang，係『grand』，你啲英文仲係好似以前咁廢嘅，好心得閒就去進修下啦。」

呢句我駁唔到，因為自己啲英文確係好屎。