性交轉運打喪屍: （4）

mk妹俾完錢就離開，我繼續打掃。

「叮鈴鈴鈴——」

電話響。

我伸手到神壇頂，拎起道堂嘅電話接聽。

有個女人打嚟揾我老細。



「老細，有條女打嚟揾你。」

「Shh！唔好嘈我，我數緊嘢。」老細正點算夾萬入面嘅轉運符，「你問佢邊位，揾我咩事？」

我照返指示問個女人，對方就答話係超市打嚟，通知我老細去領獎。

「條女係超市打嚟，佢話你之前參加個抽獎，中左二等獎。」

老細一聽到自己中獎，立即撲過嚟聽電話。



我心諗：唔撚係呀嘛，呢條光頭佬又中獎？

條友呢排唔知行咩好運，上個禮拜參加商場抽獎，抽中左架寶馬，呢次超市抽獎居然又中。

之前仲聽過啲街坊講，個光頭佬好似仲中過幾次六合彩三獎，我本來就唔係幾信，但依家見佢咁有抽獎運，開始覺得可能係真。

老細聽完個電話，知道自己中獎後，笑到四萬咁口。

本身我以為條友心情好，應該就唔會亂鬧人，點知無啦啦突然又大聲喝我過去。



「喂！你快過嚟！」

「老細，又有咩事呢？」

「點解我數嚟數去都少左一道符嘅，係咪你偷左？」

「下！我掂都唔掂過個夾萬，唔關我事架喎！」

「唔關你事？咁點解會無啦啦少左一道符架？」

「我都唔知喎，我都無郁過個夾萬。」

老細對我投向猜疑嘅眼神：「你唔知？你個樣好心虛喎，係咪你偷架？」

「咪亂屈呀，我幾時偷過你啲嘢？」



「一講起就咁激動，即係身有屎啦！」

老細一口咬定，並警告我：「我話你聽，唔好以為偷道符，揾條女扑幾次嘢就可以改到運，你呢種命犯天煞嘅厄星，普通符係幫你唔到，起碼要得道高人開過光嘅先得，所以夾萬啲普通符你偷嚟都無用，精精地就好快啲交返出嚟！」

「好啦喎，唔好屈得就屈，個夾萬得你有鎖匙開到，除非我溶左個夾萬，或者鑿爛佢，如果唔係我有乜本事偷？」

「算！我就假設唔係你偷，但依家少左一道符，你同我快啲搵返出嚟，搵唔到就扣你人工！」

「有無搞錯，咁都要入我數？」

「總之我唔理咁多，聽日前你搵唔返道符出嚟，咁就喺你份糧度扣！你知啦，一道符就值八千，搵唔到就扣你八千蚊！」

頂佢個肺！我每個月做足三十日先得九千蚊人工，咁樣扣足八千，豈不是成個月白做咁滯？



我據理力爭：「你咁樣好唔講道理啫，道符又唔係我偷，又唔係我整唔見，點解要入我數？同埋你有無數清楚…」

「一定無數錯！警告你唔好再咁多嘰趌，係唔想扣錢就同我搵返道符出嚟！」

「老細你講下道理好…」

「收聲啦，唔得閒同你講咁多，我家下要去領獎，你留喺度慢慢搵，係咁先。」

個死人光頭佬講完，拍拍籮柚走人。

打工遇著呢啲仆街老細，實屬不幸。