性交轉運打喪屍: （3）

俾個鹹濕光頭佬咁樣博懵，女方不但無縮手，仲笑笑口講多謝，當正對方係恩人咁款。

「大師，我係咪好快就會紅到好似明星咁，啲followers去到幾十萬甚至過百萬？」

「哈哈，呢個當然啦，不過如果你想紅到去荷里活，得閒不妨上多啲嚟，等我幫下你，嘻嘻嘻—」死人光頭佬發出鹹濕又猥瑣嘅笑聲。

「咁到時會唔會收人平啲啫？」

「嘻嘻嘻，梗係會啦。」



望住一個皺曬皮嘅老坑同個二十出頭嘅女仔，喺面前眉來眼去，真係眼都冤，同時又好妒忌。

「喂！」老細喝我一聲，「仲成碌木棟喺度，快啲嚟幫手收錢啦！」

成間道堂除左我老細，就得我一個員工，所以乜都係要我做。

抹嘢又係我，收錢又係我，倒垃圾都係我，總之全部由我一腳踢，但就收緊最低工資，得嗰三百蚊一日。

「請問係碌卡定俾現金？」我有禮貌咁問。



條女就唔應人，隨手丟張信用卡過嚟，全程低頭碌電話，眼尾都無睄我一眼，同對待老細嘅態度相比，簡直判若兩人，典型嘅「白鴿眼」港女。

一次性交轉運加一道轉運符，總共一萬八千，我老細正宗係又食又拎，砌完條女爽完仲有錢收。

早知道係咁筍，咁我細個都唔讀書，上茅山拜師做道士好過。

或者好多人覺得，世上根本唔存在性交轉運呢回事，又會覺得我老細呢類茅山道士只係神棍，根本無料到。

老實講，我喺度做左三個月，幾乎每個月都有客人上門投訴佢呃人，有啲仲call埋差佬上嚟話要告佢詐騙。



只不過，薑越老越辣，我老細呢隻老狐狸每次同啲女扑嘢前，都會叫對方簽同意書，並靜靜雞錄音，證明雙方都係喺自願嘅情況下發生性行為，再加上佢有親戚係警隊高層，所以咁耐以嚟，都無人咬得佢入。

唔理啲茅山道術有無料到都好，總之願者上釣，我老細錢就收左，女又屌左，就係無人吹得佢唔漲。

諗返起初見工嗰陣，老細誤會以為我係客，第一眼見到我就話我係一生惡運命。

能夠一眼就睇出我天生黑仔，都唔知佢係亂噏定係無料之中其實又有啲料。

佢仲話我一旦轉運就會由一個極端轉去另一個極端，即係會由超級倒霉變到超級好運。

聽落好吸引，但條友要收我五十萬，先幫我轉運。

莫講話五十萬，五萬蚊我都攞唔出，我有問過佢可唔可以分期付款，或者喺每個月人工度扣，結果佢無理到我。

最後雖然無轉到運，但收穫一份工，對我嚟講已經算好好。