美好世界的沉思者/ADVANCING (重製): Cuatro. 壞

黑暗，清空。

黑暗，彎月。

黑暗......

—————————————————

此刻嘅我正訓係床上面俾人推住，想起身但起唔到，視線中只有一片模模糊糊嘅白色，周邊只有此起彼落嘅人聲。





—————————————————

終於做晒暑期功課，夠鐘訓覺，訓醒就係新一年，中五嘅生活。

今日係9月1日，中五嘅第一日。今日嚟咗個女插班生，佢叫阿雯，我曾經係暑假嘅時候見過佢，但都只有一面之緣。老師安排佢坐我隔離，我地簡單打個招呼就繼續上堂。

今日係10月23日，我地被派返中期測驗嘅卷。我眼角見到佢成績同我嘅相反，佢中文、通識考得好，我考得差；我數學、物理考得好，佢考得差。

今日係11月16日，我地第一次交談。佢主動詢問我學業上嘅問題，我亦都解答咗佢。





今日係12月19日，聖誕聯歡會。我同我嘅朋友上台表演咗跳唱，攞咗冠軍。

今日係2月24日，佢主動邀約我。我拒絕咗。

今日係3月9日，運動會。我遠遠見到佢頸上掛住獎牌，同朋友一齊向遠處行去，笑住傾計。我有啲失落。

今日係3月9日，我地第一次共處。放學後一齊留係課室，我教佢物理。

今日係5月11日，學校旅行。我全日都同我嘅朋友一齊玩。我見到佢，佢同另一班嘅一個男仔一齊玩。我有啲失落，有啲鼻酸。





今日係6月25日，我地被派返期末考嘅卷。我眼角見到佢成績比我好。

今日係3月11日，中學生涯嘅最後一日。我同朋友一齊離開學校。佢同一個男仔一齊離開學校。我有啲失落，有啲鼻酸，胸口有啲痛。

—————————————————

放工後嘅我搭地鐵前往約定之地，因為我要加班，避開咗放工時間嘅人潮，而家車廂並唔多人。

到咗之後我就同呢班舊友講句對唔住，打個招呼就坐低。

望住呢班曾經一齊奮鬥6年嘅朋友，往時嘅記憶一下子就湧上腦海。

佢哋有啲有帶埋另一半嚟，有啲手上戴住戒指。

我簡單講咗幾句我嘅近況就聽佢地訴說近況，有啲係老闆，有啲炒股炒燶咗，有啲就入咗娛樂圈，大家都好熱烈咁傾計。





時間越夜，現場就越少人，而阿雯就同另一個男同學拖住手離開。係喎，都唔記得添。

去到最後，我都離開，自己一個返去。

—————————————————

回憶像是走馬燈閃過我的腦海，眼前嘅白濛濛眨眼間就變成黑漆漆。

—————————————————