美好世界的沉思者/ADVANCING (重製): 0. 結束與開始之間

再擘大眼，眼前嘅景像轉變為一片白色。

係夢？之但係...我所見到嘅...佢所講嘅...

突然有個女人著全白色嘅衫戴住口罩出現係我面前。

—————————————————

經醫生同護士同埋探我嘅父母口中得知，我撞咗車，之後訓咗個幾星期，途中父母都一直好擔心我會醒唔返。而原本我係應該考緊DSE。





而我住多咗幾日，身體狀況都好咗好多，但係出院日子都仲未知道。

但或者醒唔返都幾好，唔需要要係呢個世界受苦，唔需要再成為他人嘅負累；但都好自私，死亡唔係自己嘅事，都會俾負擔人地，又或者會有人不捨自己。

都唔係嘅，都係得父母兩個啫。

都得知中間除咗我父母，仲有個女仔嚟探我，唔知係邊個呢？

—————————————————





「下個星期返嚟覆診啦，拜拜。」

「唔該。」

我攞住晒所有野就去藥房攞藥，等咗大概3個字攞完就走。

「賢！」

？！邊個嗌我？冇吖，周圍都唔似有人叫我，應該係其他人又或者我聽錯。





！正當我打算繼續行嘅時候，我感覺到有人突然從後抱住我。

我轉頭望向身後諗住睇下係邊個，但佢將個頭埋係我背脊，完全睇唔到佢個樣，淨係知佢係個女仔。

「呀...小姐呀...你冇野嘛？」

「...」

「小姐？」

「...」佢慢慢鬆開手，而我都慢慢轉身諗住睇清楚佢係邊個。

「賢...」

...！見到佢係邊個之後，我真係好吃驚...係咪真？





—————————————————

「唔好意思，我...我冇執屋，所以會有啲亂。」我一路打開度門，一路講。

「唔緊要。」跟係我身邊嘅女仔講。

「唔好意思，我都唔記得咗，我頭先冇買到晚餐。」

「咁...我煮俾你食啦。」

「雯呀...唔使喇，我冇咩胃口，不如你返屋企先啦。」

「嗯...咁好啦...再見...」





我回想返夢中嘅內容，或者我離開佢係最好。

—————————————————

往後嘅每個星期我都去醫院覆診，叫外賣食，攤係屋企冇野做。啲朋友個個都因為要考試，所以都冇時間陪我。

而我過咗幾個星期都開始去返考試。而我父母都幫我申請咗國外嘅學校。

—————————————————

「你地係邊到考呀？」

「你講咩科先？」

「全部啦，你地影張相擺上嚟俾我睇睇。」





「...」

「唉呀～冇一科一樣。」

「唔緊要啦～考完晒再出嚟聚囉！到時玩返夠本！」

「去畢業旅行啦好冇呀？」

「唔錯喎～但係...去邊先？」

「日本？泰國？台灣？」

「泰國？聽講有「好野」睇個喎～」





「成日淨係諗埋啲咁嘅野！日本啦！又有動漫又有模型，正！」

「唔好咁毒啦，去台灣啦～又近，又溝通到，個到嘅夜市又咁出名。」

「咁台灣啦好冇？」

「嗯！諗起到興奮！啲台妹聽講好親切架！」

「係咪想話俾阿嫂知？」

「講笑講笑。訓先，聽日考試。」

同我班朋友係網上聚完舊後我都要上床訓。

—————————————————

呼～終於都考完試！終於可以好好咁唞下！
我由最後嘅試場行出嚟，諗下一陣午餐食啲咩。

「考成點呀？」

？...突然有一把聲係我側邊響起。

「好難呀可？唉～都唔知合唔合格到...」
「算啦！都考咗，諗嚟都冇用，我地去食野先喇～我個肚都打晒鼓，嘻嘻～行喇～」講完佢就拖起我隻手開始行。

「雯呀...」行咗幾步路我就叫住咗佢。

「嗯？做咩呀？」

「...」我好想講，但我唔知要講啲咩好，亦都我唔識講。

「咩呀...我真係餓喇～」

「...對唔住。」我淨係諗到呢句說話。

「...對咩唔住呀冇啦啦。」

「...」

「...」
「...你話過唔揼低我架，之前一次，我等咗你好耐等到夜晚；而家又要扔低我？」
「有時我真係唔知你諗咩。」
「等咗幾個月，見到你搵返我我真係好開心，見到你為咗織條頸巾俾我搞到手指傷晒，我好感動，我知道個幾個月係值得嘅；但之後你又唔見咗。」
「到兩個月前你訊息我話約我有野同我講，當刻真係又驚又喜，一嚟唔知你想點，又驚我要唔要再等，二嚟我等咗幾個月終於等到...」
「當時都唔知去唔去好...但我忠於自己，我知道我嘅心情我嘅感覺，我去咗，但等咗成日都唔見你我真係好失望...」
「到後嚟知道你出咗事我個心好痛，我好驚你有事，我好驚見唔返你...每日都去醫院陪住係你身邊...一直等你醒...但聽到醫生話你咁耐都未醒，好大機會醒唔返，我...我...」

佢一路講，眼淚一直好似湧泉咁係佢雙眼湧出嚟，身邊經過嘅人都會望下我地。

「對唔住...」
「我唔知我仲可以講啲咩...」
「對唔住...」

我真係唔知，唯有行上去俾個擁抱佢，俾個安慰佢，俾個道歉佢。