美好世界的沉思者/ADVANCING (重製): Tres. 亂
「起身啦BB～」
「嗯？」
「早晨老婆～」
當我一擘大眼出現係我眼前嘅就係我老婆，真係一日嘅好開始！
「邊個係你老婆呀？」
「咪你囉？仲有第二個咩？」
「我嫁咗俾你咩？」
「呢個世界，除咗我仲會有人要你咩？」
「呢句野會唔會我講先啱呀？」
「唔好講咁多啦，食完野就去返工啦～」
「係實習！唔係返工～」
「係係係，咁不如食咗早餐先？」
「今晚有咩做呀？」
「下？」就係我食食下野俾佢咁問搞到我嚇咁嚇。死啦，我係咪約咗佢唔記得呢？生日？紀念日？定咩呢？
咦？唔係喎。
「我今晚要on duty囉，做咩呀？」
「on duty？冇聽你講過嘅？」
「係咩？可能我唔記得咗講啫，做咩呀？」
「冇～咁我都返埋今晚啦。」
「你淨係返日頭更咋喎，做咩返埋夜晚咁辛苦呀？」
「反正返到嚟都係對住四面牆，你又係聽晚先返架啦～」
「同埋賺多個錢，生活都好啲，唔係咩？」
「咁你都有道理嘅，但係你小心身體，唔好挨壞呀，知唔知呀？」
「知喇～食啦，食完返工。」
—————————————————
「記實呀知唔知呀徒弟仔？！去食飯先啦都攰架啦，今日咁忙。」
「係嘅師父，我等埋你吖～」
「唔使喇，我仲有野做，你自己食先啦。」
今日真係特別忙，可能因為星期一啦，唉～落去canteen買個三文治買杯咖啡食完再唞陣先啦～
「仲係度嘅？」
「嗯？」就係我一路嘆住我杯咖啡嘅時候，有人行過嚟。
「凱怡？今晚我on duty呀，所以咪仲響度囉。你放工喇？」
「係呀，我約咗男朋友睇演唱會呀。」
「咁開心？！」
「嗯！唔講啦，我走先！聽日再見！」
「嗯！拜拜！」
—————————————————
「叮咚叮」我嘅手機突然傳嚟鈴聲。
「雯B」
原來係我嘅老婆send咗段錄音俾我。
今日原來應該係要陪佢，我我衰仔唔記得咗，唉～
「建賢，原本今日係我地嘅拍拖紀念日，我仲book咗餐廳，一齊食飯慶祝。但可惜你有野做慶祝唔到。不過，我有份禮物我而家要送俾你，就係......我有咗！你要做爸爸啦！係咪嚇咗一跳呢？我都有咗三個月，突登等個好日子再講，咁啱今日就係。好喇，我都唔阻你做野，我都要繼續做野，拜拜。」
當我聽到呢個消息，我即刻激動到企咗起身！哇！我要做爸爸喇！我要做爸爸喇！我又興奮又激動！面上露出真摯嘅燦爛笑容，難掩我嘅情緒！
—————————————————
「哇～做咩笑晒口咁呀？中頭獎呀？」
「唔係呀！仲開心過中頭獎呀師父！」
「講嚟聽下，分享下喜悅呀！」
「我女朋友有咗！我要做爸爸喇！～～～～」
「咁真係恭喜晒喎！」
「咁聽日我俾你早啲走，你去同女朋友好好慶祝下！」
「多謝師父！」
「不過而家你就咁開心咋！我個時都係，不知幾開心！到生咗出嚟就知多野煩！」
「唔緊要，我一定會努力做個好爸爸！有咩困難有咩難題我都會勇於去解決！」
「有呢顆心就好喇！」
—————————————————
「叮叮叮...叮叮叮...」做做下野係我衫袋嘅手機突然響起，而個號碼我係唔識嘅。
「師父，我去聽個電話先，好快返。」於是我就行開咗去接聽呢個電話。
「喂？…係，我係...好！我..我即刻嚟！」
「師父唔好意思，我有啲事要走先！」我收咗線即刻衝返入去。
「咩事呀？睇你個樣好急咁喎。」
「我...我女朋友佢入咗院，我要即刻去見佢！」
「咁你去啦！啲手尾我執得喇！」
「唔該師父！」
我道別後就即刻換衫落樓飛的過去，唔好有事呀雯，一定要平安無事呀！
—————————————————
「唔該我係溫靖雯嘅男朋友，佢而家係邊呀？！」
「嗯...佢而家係3號手術室做緊手術。」
「唔該晒！」
我急步走過去手術室門口，見到盞燈仲著住，我就坐係側邊一直等，但等咗好耐都未出嚟，搞到我好擔心個手術係咪出咗啲咩意外。
唔知等咗幾耐，醫生終於出嚟。
「醫生醫生，我女朋友佢點呀？」
「嗯...放心，個手術好順利，但係肚入面個個...唔好意思...」
「…」
「我地會送佢上房，轉頭你可以去睇佢。」
「…」點會？點解？我嘅錯？應該係。
唔係我佢都唔會要為咗個家而出去做野賺錢，唔係咁佢都唔會有事，可以留係屋企舒舒服服。係我唔夠好，俾唔到幸福佢，早知當初就唔應該追佢，應該要放手，應該要俾個更好嘅未來俾佢。
係！真係我嘅錯！我真係一個罪人！毀咗人地嘅幸福！
既然咁就需要離開佢，咁佢就可以搵個更好嘅人俾個更好嘅下半生佢。
我係房出面望埋佢最後一眼。但...我始終都好唔捨得佢。望住佢秀麗嘅面孔，不禁流下咗淚水。
但呢一切都係為咗佢好。
再見喇。
「你女朋友呀？」之後就見到有個醫生問我。
「…而家唔係喇...」
「…要唔要傾下？我請你飲咖啡。」
—————————————————
「點解嘅？」
「…」
「因為...唉～係為佢好...」
「發生啲咩事？」
「…我覺得，佢出事都係因為我。係我俾唔到好嘅生活佢，令到佢要出去做野，先會出意外，先會冇咗個BB。如果佢搵到個更好嘅人，就唔會出呢啲事。佢仲後生，仲可以重新搵一個人陪佢過埋下半生，俾一個好嘅生活佢。」
「我係局外人，唔係好應該理你地嘅事。」
「但係我講少少事。」
「呢件事係意外，冇人想嘅，你都唔應該怪責自己，唔係你嘅錯。而佢願意去為頭家付出，佢咁愛你，比起物質上嘅滿足，佢更想得到情感嘅滿足。而物質從來係情感前都係微不足道，佢仍然要佢為咗物質上嘅豐富，而要佢放棄最愛？」
「我要講嘅係咁多。你可以做嘅，就係離開，或者留低支持佢。」
「佢而家最需要嘅就係你嘅支持，入去陪下佢。」佢講完就起身走。
—————————————————
我重新返上去病房，係門口猶豫住入唔入去，我始終都冇勇氣去面對，好想逃避。透過窗口，可以見到佢仲訓緊，麻醉藥嘅藥效仲未過。
或者呢個係個藉口俾我逃避現實。
—————————————————
但我清楚明白係要面對，逃避只係權宜之計，過咗幾日我重新再去。今次見到佢都仲係好攰咁訓係張床上面。
但係佢身上插住一條條細管，見到都心痛，佢本身可以唔使咁...
我思索咗一陣就敲門入去。
「冇事吖嘛？」
「我...我冇事...」
「咁就好...」
「對唔住...」
「…」
「唔係我...你都唔會有事，對唔住。」
「都唔關你事，係我唔係小心，你冇做錯。」
「唔係我唔夠叻，你先要出去做野，唔洗做野，都唔會出事，都唔會...」
「唔好咁諗啦，都唔關事...」
「唔係，對唔住，再見。」我轉身就走，嘗試逃離現場。
「唔準走！」
「我已冇咗個仔，我唔想冇埋個男朋友！冇咗個仔我都好傷心，佢係我嘅骨肉，我地一齊咗3個月，冇咗我受嘅傷都好深澈。但冇咗我地咪繼續好好生活，或者呢個係一個機會俾我地好好規劃下未來，賺多啲錢，結埋婚，等個仔出嚟有個更好嘅生活，唔係咩？」
「我都可以咁樂觀面對，你可唔可以？」
「我想你繼續留係我身邊，我想你陪我渡過難關，我想同你一生一世，你唔好離開我，我需要你。」
「…」
「唔好意思，病人要做檢查，唔該你出去等一陣。」呢個時候有個護士同醫生入咗嚟。
「…咁我走先。」我轉頭同阿雯講咗聲就走。
—————————————————
「呠！呠！」突如其來嘅聲響將我帶回返嚟現實。
一直思考究竟要點選擇，不過而家我諗我知要點抉擇...
「呠！呠！」
我望向左方，一架大貨車向我全速駛過嚟，但我已經走避不及...