美好世界的沉思者/ADVANCING (重製): Dos. 狂
「鈴鈴鈴鈴鈴～」
？咦？！
正當我打算撳熄個鬧鐘個時，發現根本唔係鬧鐘響，而係有人打俾我，而來電顯示係阿傑！
「喂？」我用住慵懶嘅聲音開場。
「仲訓呀你？！夠鐘喇！」
「夠鐘？夠咩鐘呀？」
「婚禮呀！」
婚禮？我靜咗陣再嘗試尋回記憶，係喎！婚禮喎！
「呀～sorry呀，我盡快嚟！」
我收咗線就即刻9秒9換好晒衫然後落去停車場攞車揸去婚禮現場。
不過好唔好彩，而家出面落緊大雨，又行晒雷咁，希望唔好有啲咩事啦。
塞咗一陣車我就到咗，泊好架車我就入場尋找阿傑嘅身影。
「喂！咁耐架！」就係我搵緊阿傑嘅時候，佢就自己走埋嚟，而係佢隔離仲有阿威。
「唔好意思囉！訓晏咗啫！」
「十年嚟都冇變過！都係成日遲到！」
「小心啲講野！仲未開席嘅，我趕得切！」
「你好彩咪趕得切囉！係現場有啲事延遲咗啫！」
「搵個位坐低先啦！企起到好馨香咩？！」
我地坐低晒就繼續傾計。畢咗業咁耐，都冇幾可見返班朋友。莫講話見，傾計都一句起兩句止。都冇辦法嘅～定律嚟，畢咗業一定各散東西，好彩咪可以入到同一間大學囉，但都未必同一學系，各有各忙。到大學畢業埋，就要即刻出嚟社會工作，日日都OT，有時間都會留係屋企訓覺休息，仲點會出嚟吖～或者要見真係要等到其中一個嘅喪禮。
不過好彩！唔使喪禮！婚禮就見到！不過都見到唔齊人，當時嘅中學同學有嚟嘅一半都冇，唉～
「喂～大家好呀！都知大家等得耐架喇！我就係們日嘅MC，沙聲強！......」 傾傾下嘅時候，MC就出場。
而佢係邊個我都唔知，應該都係一對新人係大學或者做野識嘅。
而聽完佢講完一堆野，我地又睇下啲新人嘅成長片段又吹下水，
終於都到咗今日嘅重頭戲，就係一對新人出場！
男嘅我唔識佢，應該大概係大學識或者出嚟做野識。相貌堂堂，非常高大，目測都有180幾咁高，好靚仔，一副事業有成嘅樣。身型都唔錯，膊頭闊，有啲肌肉，著到套衫好好睇。
至於個女嘅，我就再熟悉不過，我都同過佢一齊...幾個月...而今日嘅佢非常容光煥發，面色非常漂亮......
兩個企埋一齊，真係好夫妻相，簡直郎才女貌，天作之合。
望住佢地交換戒指，到深情對望，全場起烘，最後親吻...唔知點解，我好想好開心，好想鄧佢地高興，好想打從心底祝福佢地，但我莫名地有啲心酸...
點解？明明都7年冇見過，應該都放低咗架啦，真係好笑...
—————————————————
「我地都覓食呀！要唔要一齊呀？」
「覓食？」
「嗯嗯嗯！我地呢...頭先見到有幾個女仔幾靚，都冇男朋友架～」
「咪搞人啦，一陣入醫院冇人陪你架～」
「痴線！唔去咪唔去囉！使唔使咁呀！」
就係咁，佢地去晒搵食，得返我一個周圍行晒，飲住香檳。
「喂！」
「嗯？！」突然有人係我後面拍我膊頭，搞到我嚇一嚇。
「做咩呀？」
「做咩？我問你做咩就真呀！咁耐都唔見你，以為你唔嚟添呀！遺棄我呢個朋友！」
「唔好意思，訓晏咗。」
「又訓晏，咁多年嚟都係咁，都唔改下～」
「對唔住。」
「咁見外做咩啫？咁多年仲未放低咩？」
「唔係呀，咁你都結咗婚，你老公又係到，都係唔好咁親密好啲，我唔想打直入嚟打橫出去呀。」
「哼！唔好笑囉！」
「點呀？畢咗業之後點呀？」
「冇呀，就上咗大學讀醫囉，而家係神經外科實習緊。」
「咁你都撈得幾好喎！份工仲好偉大！我向你致敬！」
「咁我多謝先喇～」
「幾時到我飲你個餐呀？」
「都未有～不過你都幾好吖～嫁咗個咁好嘅老公！要樣有樣！要身材有身材！」
「係架！唔單止外在好！內在都好！我地讀書個時識嘅。佢好照顧我架！份人仲好有愛心，成日去捐血捐錢做義工！我爸爸媽媽都好鍾意佢！」
「係係係！仲要好有錢添！睇下！個婚禮幾咁高貴幾大！仲有鮑參翅肚食！」
「我咁膚淺嘅咩？！不過...佢係有自己嘅公司，搞社交媒體架！」
「你講就咁講，但個笑容鬼咁燦爛！成個人冧到熔晒咁濟！」
「我笑都唔係笑呢啲！」
「但係佢嘅呢啲優點...的確係令我生活無憂嘅，唔需要為生活擔心呢樣個樣，仲要我地係相親相愛。」
既然你咁幸福咁開心就好，我都好戥你開心...
可惜咁嘅說話我講唔出...
「我去個廁所先，飲得太多！」
話就話去廁所，但都係想自己冷靜下，理性思考。
人地結咗婚架喇！你係咪想係人地個場到搞事呀？！係！冇錯，我係人地個場，冇謂搞串個party！咁...唯有走先！逃避係最好嘅方法！出到去一支箭離開呢到！一眼都唔好望其他野！好！
「你真係甘於平淡？」
下？就係我轉身正要離開之際，我聽到把聲。
「你真係幸福咩？你問心個句。」
我四周圍望都望唔到有其他人，邊個？到底係邊個講緊野？！
我知喇，把聲係由塊鏡入面傳出嚟架...但係係邊個呢？皆因呢個廁所好特別，洗手盤有一塊鏡，後面又有一塊，換句話講係鏡中係可1望到無限個自己。
「唔係咩？」
我定睛一望，係鏡入面嘅我講緊野。
「你係邊個？！」
「我？我咪你囉。」點解？點解嘅？
「唔係！」冇可能會有呢啲事，拍戲咩！
「我係！忠於自己啦！」
「唔係呀！唔係呀！唔係呀！」
「無可能！我已經放低咗！你唔係我！」
「唔係呀！！！！！」
「咩事？！」呢個時候有人開門入咗嚟。
「賢仔，你點呀？冇事嘛？」
「...佢...」
「佢？邊個佢呀？」
我指住塊鏡，望住鏡中嘅我。
「咩呀？鏡入面有咩呀？」
呢個時候，咩聲都冇晒。
「......對...對唔住，我...我有事...要走先...」
講完我就奪門而出。
「賢！」
一出到去就見到啲人望住我，當中更包括阿雯。
「你點呀？冇事嘛？」
我望咗佢一眼，沉思咗一下，就頭也不回離開。