美好世界的沉思者/ADVANCING (重製): Uno. 靜

我慢慢打開眼，搓搓雙眼，打個喊露就攞部手機出嚟睇。

而家仲係1:40，都仲有時間，好彩唔係訓咗好耐啫。

不過好快架車就到站，我就落車前往約定之地，慢慢靜靜咁等佢。

我坐係長凳上，懷住又興奮又緊張嘅心情咁等佢嚟，但其實我完全唔知道佢知唔知道呢件事，不過我都係會堅持等佢。

可能等得太耐，但有幾耐？我都唔知，只係睡魔又襲來，我下一次清醒嘅時候，就已經係夜晚，天上亦高掛著皎潔嘅圓月。





再望下部手機，原來已經晚上十點鐘，氣溫都急劇驟降咗。

呢刻，我嘅意志已經正式消沉晒，我決定離開。

我帶住失落嘅心情行返去屋企，路上我特登行慢啲，不時望向身後，期望佢會嚟。又或者望下手機，或者會有佢嘅訊息。

行到去樓下嘅時候，望向身後，望向手機，仲未有佢嘅蹤影。

或者，唔會有機會喇，或者，我真係傷得佢好深，或者，我地唔會再見。





我快快趣沖個涼，刷個牙就上床訓，連飲水嘅胃口都冇。

但係床上輾轉反側千百次都無法入睡，思緒無法被清空，滿腦子都係佢，說話、身影、動作，充滿冰冷嘅感覺。

訓唔著就起身郁下啦唯有，反正聽日都冇野做。

但望住凌亂嘅梳發，飯枱，令我又諗起佢。

—————————————————





「又搞到咁亂？！」

「呢啲叫亂中有序！咁樣搵野先至搵到呀！」

「係係係！你啱你啱！」
「冇咗我你生活唔到架喇～」

「係架～所以係遇到你之前我人生完全冇希望，每日都係廢青。」
「好彩～遇到你！令我重拾希望！有返人生意義！」

「哦～所以同我一齊係要我做阿四？」

「唔係！唔好誤會！」
「我嚟到呢個世界嘅任務係要錫你架～點會要你受苦呢？」





「咁一起執啦！執完我地去食好西！」

—————————————————

對唔住～我履行唔到我嘅人生任務...

呢次或者係我第一次主動去執屋...

咦！呢個係？

—————————————————

「我晒咗啲相出嚟喇～」

「相？咩相呀？」





「個次我地去主題公園玩個陣影嘅相呀！」

「係喎！真係靚！」

「我仲買咗個相架，相我都揀埋架喇～」
「就呢張！」

「有眼光！你企起水池前邊扮可愛嘅相！」

「咩扮可愛呀？唔使扮！我根本可愛！」

「嘻！根本可愛，日本人呀？」
「不過...做咩咁突然俾張相我，仲要入落相架到呀？」





「我又唔係成日都可以陪你，仲有呀～你知架啦，我唔係到你都唔溫書，咪等呢個陪住你溫囉～」

—————————————————

諗緊舊事嘅時候，眼淚不其然咁流咗落嚟...淨係識跌坐係地下度喊，咩都做唔到。