美好世界的沉思者/ADVANCING (重製): VIII. 大家有甚麼罪 罪全都是矛盾
轉眼間已經一月份，距離中學文憑試得返2個月左右。
時間真係過得好快，中四時會諗仲有兩年幾，有排啦。去到中五，仲有一年，仲有時間嘅。最後嘅暑假時，得返半年，得啦仲有100幾日。
當真係去到時，就會開始慌張，一直以嚟都恃住仲有時間，就不停浪費時間。但一切都不能扭轉。
—————————————————
成個聖誕假都係度消耗生命嘅我就當然係冇溫過書，而且我而家成個腦都係阿雯，完全冇多餘嘅空間思考其他野。
止痛藥終究係止痛藥，係用嚟緩和病徵，唔係用嚟醫病。
—————————————————
相信好多人嘅學校都係，考試嘅時候都係跟學生編號去排，而個學生編號就係跟英文姓氏嘅字母順序，所以我個位就係阿雯嘅後面。
當我返到嚟個時，阿雯已經一早返咗嚟坐係個位度溫書。都正常嘅，今次考嘅係模擬考，佔嘅分都係最高，咁緊張咁早返都正常嘅。係我呢啲人先會咁與別不同。
下意識底下，我想向佢打聲招呼講句早晨，都差唔多成個月冇見，禮貌嚟嘅。但細思過後，或者都唔需要講。
—————————————————
考咗九日試，我就望足佢嘅背影九日。咁講或者好變態。但...你心愛嘅人就坐係你前面，而你地嘅關係卻不如以往，會有心情專注於其他事咩？
雖然話考九日我望足九日，但實情當然唔係，呢個講法係有啲誇張。我都有做過份卷，但肯定成績已經大不如前，有機會唔合格。
每日考完試佢都會同朋友一齊走，我每日考完都係自己一個回家繼續放棄自己。我地雖然坐得咁近，但並沒講過野，我每日都望住佢，而佢每日都冇望過我。
考完試返到去都係派返啲卷對下咁，然後放新年假，再返埋最後唔夠一個月嘅學溫下書，之後就要全力應付文憑試。
模擬考嘅成績如我所料，一塌糊塗，但就未到肥佬嘅地步，都算係萬幸嘅。
—————————————————
「雲建賢！放學嚟搵我！」我地嘅班主任Miss Cheng大大聲同我講。
「咩事呀？」坐係我附近嘅傑仔問我。
但我都唔知，聳聳肩嚟回覆佢。算啦，就應酬下佢囉。
放學嘅時候我執好晒書包，攞好晒所有野就落去教員室搵Miss Cheng。
「跟我嚟。」佢見到我到咗之後就帶我去一間空房。
「坐低。」
「你近排係咪有啲咩煩惱？」
「煩惱？冇呀。」
「冇？咁點解今次mock會咁低分嘅？」
「對比返上次個次，跌咗好多喎。我真係好擔心你呀。」
「原來你嘅成績都可以有4嘅，但如果根據今次嘅成績，2都有少少忟水。」
「真係冇野嘛？」
「...」我都唔知可以點答好。
「我就開門見山。我都聽到啲傳聞嘅都，你係咪有感情煩惱？罵咗交？」
「真係冇事，一切正常。」
「老師我用朋友嘅身分嚟同你講。分手一係和平一係唔和平，係唔和平先會影響到生活啫。咁一定有個係做醜人，有個係被人飛。」
「我見佢成績都有跌到嘅對比起上次，但你跌得勁啲。」
「純粹係俾啲意見你。老師我都係女人，係就係老啲，但我都明白女仔嘅諗法，我睇得出佢對你係仲有依戀。而你就好明顯，係非常掛念對方。所以仲愛嘅，就把握機會，唔好衰一次就放棄。同埋機會係唔等人，免得自己後悔。亦唔會講自己唔會後悔呢啲野，未來冇人知，結果都冇人知，唔好覺得衰緊，把握現在，忠於現在嘅自己！」
「嗯...」
「咁我信你喇...」
「處理好件事之後，就加倍努力，俾返之前嘅雲建賢俾我！」
「有咩需要就隨時搵我，唔好怕麻煩定點，我無任歡迎！記住我永遠都支持住你！」
「嗯...」
雖然當時冇講，但希望您明白，男人天生體質就係冇辦法直接表白心意。
多謝您，Miss Cheng!
—————————————————
聽住呢一番咁鼓舞性嘅說話，但係幾時先係適合嘅時間呢？
我就一直諗一直諗，幾時會係最好？邊度會最好？我要準備啲咩？
最後我終於得出咗一個決定，而我亦都轉換心態去迎接當日嘅來臨。
經過咗新年假期，然後同呢班一齊經歷咗5年有多嘅光輝歲月嘅戰友過埋最後嘅中學生涯。
「賢仔，得咗喇？」就係最後一日，Miss Cheng趁空檔嚟到慰問。
「下？唔...算係啦！」
「咩算係呀？係就係，唔係就唔係啦！」
「唔重要，最重要嘅係，Miss Cheng，我好多謝您！」
「好多謝您呢六年嚟對我嘅教導，而您都唔只扮演一個老師嘅角色，仲擔當我地嘅樹窿、朋友。而我地有咩做得唔好，您都唔會罵我地，反而係先安撫我地，再教導我地。學業上我地有咩唔識，您都願意抽時間嚟教我地，即使我地天資愚笨，但您都竭盡所能，不知疲倦，耐心咁教我地。我亦都好多謝您最後同我講嘅個番說話，唔係我都唔會改變，我都仲放棄緊自己。Miss Cheng，我好感激我人生遇到您！」講講下我都不禁留出眼淚。
「唔好喊，男人老狗喊咩啫，Miss收到晒你地嘅心意，Miss都好多謝你地，冇你地我都唔會成長，係多得你地願意當我係朋友，我先可以成為你地嘅樹窿，先唔會同時代脫節，先仲可以扮後生。嚟，抹咗啲眼淚佢，然後影相開開心心，笑顏大開嘅相！」
「嗯！」講完我地就合照咗一張。
「Miss Cheng，多謝您！」
「呢個我電話，以後有咩心事，或者上到大學功課有唔識都可以問我架！當然首先就send返頭先張selfie俾我先啦！」
「好！」
「同埋記得請我飲呀第時結婚！」
「一定！唔使你俾人情添！」
「好嗱！去同同學影相啦！」
Miss Cheng，我知講咗好多次，但我真係真心！Miss Cheng 多謝您！
—————————————————
天下無不散之筵席，就算大家幾不捨都好，都係要走，然後走上各自嘅道路。或者會有交雜，或者唔會再見，但都僅記生命中有佢地嘅陪伴。
可能唔會再見面，但如果有人願意做搞手，請珍惜呢個機會。唔係嘅話，或者下一次見，會係某人嘅喪禮之上。
中六學生逐一離開呢個大門，大家嘅方向都唔一樣，有人行往康莊大道，有人走在荊棘之路，有人走在空闊原野，但大家都一樣，就係望向身後嘅呢個建築物嘅眼神，表情，行徑，都表達出深深嘅不捨。
—————————————————
今日，就係我嘅決定之日，或者我心中還存有畏懼，所以先揀今日。即使失敗，都不會再相見，都不會尷尬，都不會憶起。
相隔半年後，我再度鼓起勇氣對話，但係係透過訊息。
「阿雯，我約你今日放學後2:00係你屋企樓下嘅公園見，不見不散。」
一路上我都好緊張，但我都唔知緊張啲咩？可以係成功與否，佢會唔會嚟，邊樣先係最主要呢？
我唯有戴上耳機聽住歌，望向車廂外嘅風景。
上層風景同下層風景各有不同嘅味道。下層風景都係水平線之內，有種熟悉感，特別舒服；上層風景居高臨下，有種高貴嘅感覺，味道截然不同，令人嚮往。
唔知趕唔趕得切呢？望一望手機，1:30，應該得嘅。不過，感覺上呢個紅綠燈特別慢咁。
算啦，半個鐘得嘅。我再繼續欣賞風景，但...今次嘅風景有啲唔同。
所有野都打橫咗，視線比水平線還要低，好似...貼住地下咁。郁唔到，手手腳腳都郁唔到，算啦，或者係太攰。
不過呢個新視角風景都幾吸引，與平常世界截然不同，另一面嘅世界，另一種魅力。
有啲暈添，可能返學返到攰，訓個覺先...