美好世界的沉思者/ADVANCING (重製): VII. 狂歡之憂

。。。

。。。

！

咩事都冇發生，

唔係，點解要有事發生？





此刻嘅我正處於半天吊嘅情況底下，我頭上面係地下，腳下面係天空！

然後我正逐步被拉落去天空。

我，呢到係？呢到，邊度嚟？...點解我會係度嘅？

「好彩冇人見到咋！」

「你冇野嘛？」





「冇反應喎，係咪傻咗呀？」

「賢！賢！」

係我頭上有四把聲係度交談，佢哋叫緊我？

係掛，係？

「啪！」突然我被人打咗一巴！





我錯愕地摸住我塊面，眨咗眨眼，抬頭望住打我嘅個個人...

「做咩咁傻要自殺呀？」

我要自殺？

望下周圍環境，啲記憶逐啲湧現係我嘅腦海...

嗯，我記得，我好傷心，漫無目的咁行，然後，然後...就係呢到？

「算啦！以後唔好喇！好彩冇人見到咋！」

「嗯...」

「好彩阿傑條友好奇跟埋嚟...唔係...係喪禮見架喇～」





阿傑？係喎，佢哋係我嘅好朋友，曾經係，但而家？點解？

「個個...點解？」

「點解啲咩呀？」

「點解你哋要救我？好似我呢種人，唔係死咗更好咩？」

「…」

「咁...始終我地都係朋友嚟架嘛～係～你係做咗好錯嘅事，但你都有做過野有努力過，都知道你知錯...唉呀！而家friend返咪得囉！」

「仲有呀，冇咗條女啫，冇必要死嘅！你人生唔係得佢架嘛，仲有家人朋友；同埋冇咗一個，咪搵個第二個更好個囉，而家中學都未畢業，第時出到嚟大把女等緊你呀！」





「多謝你地...」唔知點解眼角流下咗滴眼淚出嚟。

「妖！講呢啲！仲有呀！冇鬼喊呀！男人老狗咁小事就喊...」

—————————————————

或者係因為我同我嘅好兄弟好返，又或者我知道衰咗而放棄，我暫時放低咗呢件事。

生活回復返正常，每日都同朋友開開心心咁玩，又會一齊打機打通宵！

但始終我地都已經中六，仲有2個幾月就要考DSE，都要盡返做學生嘅本分努力溫書，去快餐店食住垃圾食物溫書。

唔知係好定壞，同朋友溫書都會傾計未必溫得入腦，但係有個人係旁邊都可以起到互相監督嘅作用，又可以互相教導。

雖然書係要溫，但樂都係要玩，係跨年嘅時候，我地就約埋一齊去尖沙咀倒數，當然就唔包括阿傑同埋志偉。





又再一次，

十！九！八！七！六！五！四！三！二！一！

新年快樂！！！！！

倒數完後嘅我哋就一齊去打邊爐食宵夜，係咁凍嘅天氣底下，打邊爐係最適合不過！講起都漏口水！

食完都已經3點幾，我地就夾錢搭的士返屋企，佢地兩個先行落車，而我就係最後一個落車嘅。

係車上面，我一邊戴住耳機聽歌，一邊透過車窗欣賞住車外深夜嘅風景，人生有幾多可以見到咁嘅光景？冇咩人會深夜落街。

雖然一片漆黑，偶有些少街燈點綴。在街上想找到一個人都唔容易，就算見到，又係咪呢？





「到喇，178蚊。」眨眼間就到咗我屋企樓下。

「唔使找。」我係銀包攞出兩張二百蚊俾佢。

「多謝晒！新年快樂！」

「呀...新年快樂。」

互不相識但會互相祝福，感覺今日會...唔係，
係呢一年都會好運！

返到去成個人都已經散晒，已經好耐冇玩得咁癲，換完衫就直訓喇，真係太攰！聽朝起身先沖啦！

—————————————————

係凍冰冰嘅天氣沖個舒舒服服嘅熱水涼真係正，但係沖完要抹身著衫個下就痛苦。

煮完碗麵之後我就睇手機，尋晚到而家都冇睇過，應該都有唔少訊息。

有三個訊息，
三個都係同我講新年快樂，分別係阿瑩，阿媽同埋阿爸，而我都一一回覆返新年快樂。
再之後都係一啲遊戲嘅通知同埋一啲無謂嘅電郵。

社交平台每年都會有一啲回憶，一年前做過咩？二年前做過咩咁樣。
而我都有，一年前嘅今日，

相片中係維港煙倒數煙花，諗返起同今年嘅都冇分別。

仲有一相係大樓上面顯示住「Happy New Year!」嘅英文字，嗯！新年快樂，全世界新年快樂。

後面仲有最後一張，

係一張合照，

我同埋

阿雯…