美好世界的沉思者/ADVANCING (重製): V. 欺詐之苦

或者...我真係要盡快...追返佢返嚟。
因為我心知道我仲係好愛佢，我亦只可以愛佢一個。

咁之但係...我可以點做？冇人可以教下我？

但我真係好驚，我好驚面對佢，我好驚會失敗，
我好驚知道殘忍嘅別離...就係我地嘅終點...

每日我都好似正常人生活，
一到夜晚，苦澀嘅酒就係我唯一嘅朋友。





我眼淚都流到乾涸，你可唔可以返嚟？

我諗你諗到就嚟癲，你可唔可以返嚟？

我每日都識淨識諗住你，生活變到一塌糊塗，我好需要你...

雖然一開頭我都決心要挽回呢段關係，但我真係唔知做啲咩好，每日都係諗諗諗，時間就不斷流逝...

話咁快就嚟到十二月，但一切都好似冇變過咁，每日仲希望一朝早醒返你會訓係我身邊，




但每朝醒來陪住我嘅就只有失望...同埋絕望...

十二月就係聖誕節，所以卒之都俾我諗到一個方法，只希望可以成功。
諗返起上年聖誕節我地嘅美好回憶，佢仲送到隻好靚嘅錶俾我，個底仲要刻住字，
但係我就咩都冇送到俾佢...

諗好咗個方法，我就第二日放學即刻去買材料然後返屋企整，
始終禮物，重點係心意，而唔係個價值，呢個都係我近排學返嚟，一改我以往覺得越貴就越有心思嘅想法。

去到聖誕聯歡會當日，我就收好呢份精美，又充滿我嘅心思同埋汗血嘅禮物。





一如以往，我地都係要去咗禮堂睇表演先。都最尾一年，有好多中六嘅同學都會上堂表演，有啲入選咗，有啲就落選，
但最重要嘅係，留返一個美好、快樂嘅回憶俾自己同埋朋友、同學、以及老師，等自己唔好後悔，六年咩都冇做就渾渾惡惡過咗去。

「跟住落嚟出場嘅係，6C班嘅溫靖雯，仲有6A班嘅趙詠娟，黃瑜詩，表演嘅跳舞！」

司儀嘅呢一句，吸引咗我嘅注意力。阿雯？阿雯會表演？

紅幕左右打開，就可以見到阿雯，今朝都冇咩留意，佢今日著住紅色嘅毛衣，出面著住件啡色嘅外套，下身就係一條淺藍色牛仔褲，一對啡色嘅靴。
衣著雖然簡單，但係就盡顯佢身材嘅優美，而現場無人唔為佢而歡呼...
睇真啲，佢而家嘅笑容真係好燦爛好甜美，我好似，從來都冇見過...

我...或者離開，佢先會得到真正嘅幸福...比起以前更靚更加容光煥發...

唔得，連呢啲咁普通嘅大話我都講唔出，真係想嘔...我果然都係想佢返嚟...





成個表演我都冇專心留意，只係...我望住佢我就會格外傷心，只係聽住現場嘅歡呼聲、歡愉嘅音樂聲，扮作一切正常，
我好好，唔使擔心；我過得好好，唔使擔心；我一個人會更加開心，所以...唔好理我，由得我...

返到班房，就係成班人一齊開開心心，食住野一齊玩嘅快樂時光。

「我去個廁所先！」我聽到阿雯要去廁所，或者呢個係一個好機會？

望住佢出咗去，而其他人又專心係度食係度玩，我就捉緊呢個機會，因為呢個，係個難得嘅機會，錯過咗，就唔會再有。

我迅速咁係個袋度攞出裝住禮物嘅紙袋，確認一切無誤，就急步趕上佢嘅腳步！

「賢仔！」

邊個？邊個係呢個十萬火急嘅時候叫停我？！