美好世界的沉思者/ADVANCING (重製): IV. 憶思之惱
有一日我收到咗阿瑩嘅訊息。
「師兄，唔知你...下個星期四得唔得閒呢？」
下星期四？個日咁啱又學校假期，我而家又自己一個...
「得呀！做咩呀？」
「我想約你去主題公園，唔知得唔得呢？」
海洋公園，係一個...充滿回憶嘅地方，就係早兩個月先去完一次。
「好吖！咁...個日見～」
—————————————————
因為我地揀咗平日去，所以都冇咁多人，排隊應該都會快啲～
「唔好意思，係咪等咗好耐呀？」就係我望住公園方向個時，阿瑩就到咗。
我轉個頭望過去，發現阿瑩對長腿非常之吸睛。
「我...我係咪著得好怪呀？」
「呀，唔係呀，著得好好睇。我地...行喇。」佢嘅呢一個將我拉返嚟現實，亦都提醒咗我...我...唔可以揀佢。
「係喎...點解...你會冇啦啦搵我出嚟嘅？」
「吓？你...你唔...唔好誤會呀！我...我冇啲咩特別意思架...」
「哈哈哈！得啦！我都好想玩一次，而家萬聖節有鬼屋我好想玩！」
「乜原來師兄你都鍾意玩鬼屋架？我都好鍾意架！不過我就有啲驚～啲朋友都驚都唔陪我...」
「咁今日有我陪你！我就唔驚嘅！所以你都唔使驚！」
「嗯！多謝師兄！」
「唔好再師兄前師兄後喇，叫我賢仔啦！」
「賢仔...叫仔都唔係咁好，始終你都大過我，叫你賢哥啦！賢哥！」
「er…都得啫。」
—————————————————
入到去我地首先就搭纜車上山玩咗機動遊戲先，而途中阿瑩佢就不斷係度望風景望個海望座山仲係咁講好靚呀好靚呀，仲不停響度影相。
而我就坐喺隔離望住佢係度好似個細路女咁，不時就幫佢影下相咁。
對比返佢，真係好唔同。邊度唔同呢？首先阿瑩而家係坐我對面，而佢就坐係我隔離黐住我，唔係因為恩愛，只係因為佢特別驚。
—————————————————
「嘩～好高呀！」佢因為太高所以係我隔離黐住我合埋眼尖叫。
「哈哈哈！！！」而我就只係一直係度笑佢。
「笑笑笑！笑咩啫！」
「冇～你試吓望地下，冇咁驚架～」
「唔使指意呃我！個地下玻璃嚟，透架！」
「咁你試下...望住我？會唔會冇咁驚？」
「……」
—————————————————
「賢哥？賢哥？」
「…吓？咩...咩事？」
「到喇，要落車喇。」
「…哦，好...」
「頭先諗咩諗到入晒神呀？」
「…下？冇呀，可能因為我就嚟考DSE，有啲緊張啫......」
「放鬆下，我地今次嚟咪就係放鬆個囉！」
「你放埋今次好喇！下年到你架喇！」
「咁下年我實chur住你唔放！要你日日幫我溫書！」
「嚟吖！」
—————————————————
事關鬼屋就緊係夜晚先有feel架啦！所以家下都冇鬼屋開。呀唔係，有一個！個個鬼屋嘅主題係「醫院」！
可能而家仲係晏晝，又係平日，條隊都唔係太長，我地等咗幾個字就入得去玩，而除咗我同阿瑩，仲有另外六個人，有啲遊客呀，香港人咁樣。
而成個旅程，每一次有些少風吹草動，阿瑩都會叫一次，係旁邊望住佢呢個驚青樣嘅我真係好想笑！但係玩鬼屋笑都太唔尊重個環境，所以我就一直忍一直忍。
我呢？講真個句唔驚就呃人，但係都冇阿瑩咁驚，起碼我冇叫過囉，哈哈！！
玩完呢個鬼屋之後我就就再玩多兩個機動遊戲再去食飯。
我地去到附近最近嘅一間餐廳食野，唔係咁啱定咁橋，又係冰室。
「啲野好貴喎～」
「樂園餐廳係咁架啦～唔緊要啦，我請！」
「咁我唔客氣架喇！就當係...頭先係玩鬼屋個時你係咁笑我嘅賠償！」
「咁你都發現到？我忍得咁辛苦。」
最後睇咗一輪個餐牌，我地都嗌咗個萬聖節特別餐單，始終入到嚟仲食返出面都有嘅野，感覺好悶又唔抵咁，加上應節。
呢個餐單啲野就係用各種嘅食材扮到好似啲人體器官咁，血呀，腦呀，眼呀咁樣。雖然講到咁，但其實唔恐怖，味道方面就...不過不失，唔係難食嘅。
—————————————————
「嘩～個海好靚呀！」
「而家就咁大膽睇個海，頭先搭纜車就驚都死係咁攬住人，唉～」
「又笑人！唔睬你！」
「咁呀，一陣去食枝雪糕先，天氣咁熱！」
「…一齊食啦～我食芋頭味！」
「…哼！一齊食喇！」
—————————————————
雖然普通，但就非常浪漫，兩個人共享一枝雪榚～諗返起都打從心底笑出嚟。
不過...唔知仲會唔會有呢啲日子呢...
「嗯～食飽lu～」
「…飽喇？咁行喇...」
見而家都差唔多時間啲鬼屋開就周圍行下。
一到夜晚，樂園就多咗好多人，周圍都多咗啲演員扮啲恐怖野俾我地一齊影相，而我地就當然有影啦！
「咁多人，睇嚟玩多兩個就要走喇～唉～」
「唔緊要啦！最重要嘅係回憶，你今日玩得開唔開心吖？」
「開心～」
「咁咪得囉！嚟！去玩鬼屋喇！」
冇記錯夜晚係開多4個鬼屋，即係總共有5個鬼屋玩，要一日玩晒真係唔易，何況係假日？何況係萬聖節正日？
實際情況比我地預想嘅更嚴重，剩係排一個鬼屋都排咗我地半個鐘，都仲未計玩。
「睇嚟剩係可以玩多個咋～」
「係呀，好可惜。」
「咁樣，我地就要俾足100%嘅能量，去好好享受最後嘅一個鬼屋！」
最後嘅呢個鬼屋，主題係取材自著名恐怖電影！入面還原咗好多個電影入面嘅場景，亦都會有人扮個殺手扮去追殺我地！過程真係又刺激又驚險，同時又做到恐怖嘅氣氛！正！
雖然我冇同過佢玩，但...玩起上嚟應該都幾好笑。
—————————————————
「呀～救命呀！」
「好恐怖呀！」
「賢呀，唔准笑呀！真係驚呀嘛～呀！鳴～～～我要喊喇～」
—————————————————
淨係想像都夠好笑，如果可以......
不如不覺間，我地就已經行晒成個鬼屋出返嚟。
「呢個比起上個醫院鬼屋冇咁恐怖，但就刺激好多！係咪呀？」
「嗯。」
玩完呢個鬼屋，意味住我地要返去。
「我仲有兩個站就落車喇。」搭搭下車，企係隔離嘅阿瑩同我講。
「我陪你吖，我送你返去。」
「好呀！」
難得地今次佢又會肯俾我送佢。
—————————————————
「送到呢度得喇。」
「咁...返到去...send個訊息俾我啦。」
「嗯！」
「拜拜。」
「師兄呀...」
「……咩呀？」
「其實...我都有聽聞過你地嘅事。就係...你同雯師姐嘅事。」
「係咪...因為我？好對唔住，我拆散咗你地...」
「唔係...唔關你事，係我唔爭氣啫。」
「咁...我可唔可以問下，到底係咩事？」
「……」我又唔好意思講個實情俾佢聽，萬一佢知道咗，離我而去，咁...我就真係一無所有，咁落去，相信我會死去。
「唔想講唔緊要，不過...」
「好似都已經過咗好耐，如果你係仲鍾意人嘅語，你係後悔嘅話，你想美好嘅回憶可以永存嘅，就去啦...」
「唔好要人等太耐。」
「我係呢度俾信心你，俾支持你，咁樣...你應該就會有勇氣去經歷一切困境，解決問題。無論點，我都唔會走。」
「早啲返去啦！聽日仲要返學架！拜拜！」
目送佢離開後，我都思索緊佢嘅說話。