美好世界的沉思者/ADVANCING (重製): III. 逃避之罪

現實往往都唔會如願以償，你想點，佢都總係要同你唱反調。
你想行街唔會出事，你就會中頭獎又或者踩中黃金；你想好天？他就會倒一大盤水落嚟。

一起身個頭就赤赤痛，痛到就嚟要爆咁滯。但係我都竭力起身去廁所洗個面等自己清醒下，途中仲踢到幾個啤酒罐，好彩都係飲晒。
尋晚買咗一大pat嘅啤酒返嚟，一直飲一直飲，後尾就直接係個廳到瞓咗。

「喂？媽？我有啲燒呀，今日返唔到學......係呀......我會架喇。......咁學校打嚟你就咁講啦...嗯，拜拜。」

我執好晒尋晚啲垃圾，沖埋個涼等就返房繼續訓，始終個頭都仲係好赤。





訓咗係床成半個鐘我都未訓得著，唔知係因為頭痛定咩呢？

物理上，我的確係俾頭頭纏擾住；精神上，我成個腦都係「佢」。

個晚，被憤怒沖昏頭腦嘅我，爆出一堆尖刺，一堆非常尖銳嘅刺，直直咁插入咗佢嘅心。

—————————————————

「被情緒所主導嘅行為、言詞，都係最唔理性，所以要盡量避免。」





「但係，例如......憤怒呀，悲傷呀，產生呢啲情緒個時都係最唔冷靜，可以點樣避免？」

「就以兩性為例，啲人成日話男女朋友之間鬧交，最緊要溝通要面對，要一起解決個問題，要快啲，唔好等個問題發大先搞，到時就難搞好多。」
「但係鬧交即係嬲啦，個情緒係最亢奮嘅，係咁嘅狀態下點解決呢？」
「最緊要分開下先，等大家嘅情緒都緩和落嚟，反思返頭先發生嘅野，再好好一起理性討論、解決個問題。」

—————————————————

應該都差唔多，而家佢上緊堂，冇睇手機......就而家啦！





「對唔住，當晚係我太過分，你離開個晚，我仲用惡毒嘅話語去整喊你，係我錯。轉過頭我就即刻後悔。
從來都估唔到你會就咁樣走咗去，我太唔成熟。望住你走，望住我地之間嘅紅線逐漸撕裂，而我就好似個蠢材咁企響度冇野可以做到。
時間已經過咗去咁耐，唔知你最緊點呢，係學校我見你氣色都唔錯，好似仲靚咗，無數次我都想走上去捉實你嘅手唔俾你走，但咁樣應該都幾好笑。
好對唔住，我之後......

就係呢個時候，我無意中眼角見到係上面佢嘅名字底下，顯示住「在線上」，
佢究竟係幾時上線嘅呢？佢究竟睇住我打字打咗幾耐？佢唔係上緊堂嘅咩？點解會......會有時間睇手機嘅？

驚恐之中，非常害怕面對一切事物嘅我，即刻刪除晒成篇野，然後下線......

對唔住，我連面對我地之間嘅關係都冇......
唔係！而家......仲係咪男女朋友關係？定係......