美好世界的沉思者/ADVANCING (重製): I. 狂怒之罪
新一年，亦都係我係呢間學校嘅最後一年，終於都嚟。
話快唔快，話耐唔耐。當初真係唔係咁鐘意返學，對呢間學校毫無感情。然後係度識到一班嘅好朋友，一齊開開心心快快樂樂過每一日，逐漸慢慢期待上學嘅日子。時光飛逝，5年時間咁就過咗去，眨吓眼就最後一年，中學入學日好似都係尋日嘅事咁。
梳洗完之後我就出門返學。
—————————————————
「早晨！」一入到班房坐低我就同我班兄弟打個招呼。
「早晨，好想放假呀！點解2個月咁快過架？！」坐係我隔離嘅傑仔係度呻。
「好喇！同學，我地要準備去禮堂喇！」轉眼間我地就去禮堂聽野。
「係喎賢哥，今日唔見你同阿嫂一齊返嘅？」聽聽下野坐我隔離嘅威威問我。
冇錯，今日我就自己一個人返，而我返到嚟都見到阿雯已經一早返咗嚟，而佢隔離都坐咗佢嘅朋友。就算冇，我都冇勇氣走過去，坐佢隔離，同佢搭話，打招呼。
—————————————————
得返一個禮拜時間，但我都係仲未做功課。呢個暑假又要補課，又有成疊功課要做，點解會咁苦？
雖然係咁，我都係冇理到，而家坐喺到打機！
「嘟～嘟～嘟～」手機突然響咗，係我親愛嘅女朋友打嚟！
「喂？」
「做緊咩呀你？」
「er……做...緊...功課囉！」
「真係？咁點解聽到遊戲聲嘅？」
「下？哈～」死！唔記得熄聲添！
「冇講呢啲喇！我地呢個暑假都冇幾何一齊過，不如聽日出街吖？！」
「就嚟DSE喇，仲掛住玩～」
「咁好囉！」
「唔好唔開心啦～最多...後日！後日我同你一齊過！好冇？」
「咁好啦。」
「嗯！做功課先！」
「嗯！拜拜！」
收咗線我都放低個遊戲機手制去做功課。做咗幾粒鐘我都剩係做咗幾條，一嚟好難，二嚟真係冇心機做，側邊實在太多誘惑喇。
「努力」咗咁耐，都夜喇！沖涼訓覺！
一起身已經晏就點幾鍾，求其煮個麵食算！
橫掂咁耐冇碌過拎，一陣落去玩返兩手！
—————————————————
「咦！師兄！乜咁啱呀！」碌碌下聽到有人叫師兄就好奇望過去聲音嘅來源。見到有個女仔望住我。
「？？？妳...妳叫我？」
「係呀！你唔記得咗我喇師兄？」佢講呢句嘅時候面上明顯流露出失落嘅表情。
死喇，我真係唔記得咗佢邊個喎，唉～點算呢今鋪。
「講笑咋！睇吓你吖！驚到咁！」
「你記唔記得...你同過一個童軍嘅師妹講佢好有前途嘅～」
下？我會講啲咁嘅野？！不過佢咁講一講，又好似有喎～
「哦～」
「終於記返喇？！太好喇！我叫阿瑩！」
「不過，乜你都鍾意打保齡球架？」
「係呀！你都係？」
「嗯嗯～我冇野做都玩下咋，我都唔識打。」佢講呢句嘅時候摸摸個頭，吐一吐舌，有啲得意可愛。
「要唔要我救妳呀？保齡球，開正我個範！」
「咁就要拜托你喇師兄！」
—————————————————
打咗兩個鍾，我地都了解咗大家好多，同埋都交換咗電話號碼。
「咕嚕嚕嚕嚕嚕～」我身邊嘅阿瑩傳嚟一陣低音，佢頓時紅都面晒，我都淺笑咗下。
「冇笑啦！」
「唔笑唔笑！我知道有間餐廳啲野幾好食，賞唔賞面？」
係等緊野食個時，我都睇下手機，阿雯都打咗幾次電話嚟但都掛住玩冇聽到，但佢都send咗訊息俾我，知道原來佢嚟咗我屋企但我出咗街佢就自己一個返咗去。
「唔好意思，我有啲事做出咗去。」我簡單覆咗佢一句就繼續食野。
—————————————————
「你真係冇介紹錯！真係好好食！」
「都話架啦！」
「我送妳返屋企？」
「唔使喇，搭程車就到，好快架咋。」
「真係唔使？」
「係呀！返去陪女朋友啦！開學再見啦！拜拜！」
同佢分開咗之後我再自己一個繼續行下街。
「！」行行下突然感覺到有啲野滴咗落我個頭。我伸隻手去摸咗摸，濕嘅？唔通...
「！」果然！唔知邊隻衰雀屙咗篤屎落我個頭，我即刻衝返屋企沖涼。而唔知係咪心理作用，洗完都好似仲有浸味咁。
訓醒覺去到第二日我都再洗多次頭，希望去到浸味。
今日係我同阿雯一齊拍拖嘅日子，好期待嘅同時，我都好擔心佢會聞到，而我都好驚個天，心怕又嚟多次。
出到去睇完戲行下街就買野返屋企煮飯。
「想食咩呀？」
「……嗯？雯？雯？」
「…下？下？咩話？」
「做咩呀？成日都咁嘅？神不守舍咁。」
「哦～冇呀～食咩你決定吖。」
「好！咁今晚就到我大顯身手！」我就隨我心意係個超市到買野。
—————————————————
食完飯洗完碗我就出嚟廳陪我嘅女朋友。
「點呀？做咩事啫？」
「嗯？冇呀。」
「妳真係好鬼差～妳估呃到我咩？成日都三魂唔見七魄咁，問你野問幾次先應咁，反應又冷冷冰冰咁。」
「講啦～」
「真係冇呀，我好好呀。」
「我地已經係男女朋友，有啲咩應該坦誠面對，有困難就要攜手同行，妳話係咪呀哈姆太郎？」
「咁...咁我講架喇。」
「你...係咪有野暪住我？」
「下？！」啲女仔一講呢句十成十出咗事！但我咩都冇做過喎！乜呀？！
「我...我冇呀。咩事呀？」
「係呀？咁...尋日同你一齊個女仔邊個嚟架？」
「咩呀？」
「同你一齊去玩去食飯個個呀。」
「……」
「冇野講？咁好吖，我明白晒。再見。」講完佢起走向門口。
「對唔住。」我下意識捉實佢隻手。
「個個，朋友嚟咋，冇野架～」
「原來係朋友，咁好啦～我信你。」
「夜喇，我返去先喇。」
「咁快？我送妳吖。」
「唔使喇，我自己得架啦，好近之嘛，行幾步路就到。」
「其實你仲係唔信我咪講囉！使唔使咁呀！」
「我咪信咗你囉，我信你地冇野呀，冇嬲啦～」
「信？信咗你都係咁？木無表情，講野冇晒感情咁，仲唔係對我失望唔信任我？！」
「你可唔可以俾啲信任啫？！都話咗係朋友你又唔信！喂大佬呀！一齊咗就要成日mon實部電話嘅？！做咩都要詳詳細細同妳交代？！」
「我知妳讀書好叻呀！好靚女呀！但係你唔信人吖嘛！又要問人，答咗又唔信！讀咁多書有鬼用呀？！你社交個度零分呀！高分低能！」
「你係學校好多兵呀！咁你咪搵你啲兵囉！得你啲兵會忍你之嘛！」
講完佢拎轉面望住我，伴隨住兩行眼淚。
「對唔住，我唔似得你咁社交滿分。我剩係識讀書讀書讀書！我配唔起你，浪費左你咁多時間同精神，真係好對唔住。」
講完佢就離開咗，頭都冇回。
「走吖！走咗唔好返嚟！」佢走咗之後我仲對住門口咆哮。
𣊬間我都流下咗眼淚，點解嘅？我有錯咩？
冇呀。
咁點解會喊嘅？
閂好度門得就返入房準備打機，但完全冇心情打，兼且係有一樣野吸引咗我嘅目光——————玻璃櫃入面嘅一隻手錶。
呢隻手錶點解會放咗響度？
因為我真係好鍾意隻錶，鍾意都唔捨得戴，驚會整污糟整花整爛。
幾錢？
無價，因為佢係我最親愛嘅人送嘅。
最親愛？
係呀，由第一眼見到佢就鍾意左佢，然後一直同佢親近，追佢。終於表白咗，仲成功埋添！一直都而家都無風無浪平平安安咁過。
唔係，啱啱就有一個，仲要一嚟就黑色暴雨雷暴警告加十號風球打到正。內心嘅天氣正係咁樣，唔知出面係咪呢？
我行近去窗邊一望。哈！唔係，天氣好到不得了，一舊雲都冇，仲依稀見到幾粒星。
街上嘅人都若無其事的行住，好似我好怪咁。
咦？街上有個熟悉嘅身影行緊，離我越嚟越遠，但我仲一直凝望住個個背影，逐漸變成一個小點。
眼淚又留下喇，而今次我終於知道點解會喊。
「哈！」
但，而家又有另一個問題。
明明我喊緊，點解會笑咗出嚟？