美好世界的沉思者/ADVANCING (重製): 26. 黃昏
補晒咁多科，真係成個人都散晒，不過迎接而嚟嘅就係真正嘅暑假！
「有得玩喇！正！」我哋一行人離開咗學校之後就講。
「得返半年多啲就DSE喇，仲掛住玩～」娟姨講。
「咁～話晒都係人生中最尾一個暑假吖！應該要創造下美好嘅最好回憶！」志偉講。
「啱呀～中學或者真係最尾一個真係可以一班朋友聚埋一齊嘅機會。」
「點擔保到我哋全部人都可以入到大學，或者入到同一間大學吖～」
「大家都因為不同嘅事而忙到踢晒腳，好難會有時間聚到；出到嚟社會就更加唔使講啦～」我係隔離附和志偉。
「咁你又啱嘅～」娟姨係側邊好感慨。
「咁我哋去邊玩？」阿霆講。
「不如...主題樂園吖？！」阿雯講。
「好喎！」我哋其他人一齊高呼。
「但幾時先？」傑仔講。
「嗯...8月10號？」娟姨講。
「個日咁啱係志偉生日，佢可以免費入場。而且又係平日，應該都冇咁多人。」
「咁就約定咗架喇！我上網買飛！買完係group都同你哋講。」詩姐講。
於是我哋一行8人，我、傑仔、威威、阿霆、志偉、阿雯、娟姨同埋詩姐就約定咗8月10號一齊去海洋公園玩。
兩個星期後～
今日就係8月10號，我哋約埋一齊9點先去食個早餐，之後就再一齊搭車去。
食晒早餐唞咗陣之後大概10點鐘，我哋就起行出發。到咗之後，見到現場個情況比我哋想像中多人，睇嚟排成日都玩唔到幾個遊戲呀。
一入到去當然都係首先影下相，而第一個就梗係水池前面。
「去邊玩先好呀？」影晒相就問。
「晏啲應該會更加多人，不如我哋話咗機動遊戲先？」
「吓？！唔玩得唔得呀？」傑仔問。
「你驚呀？！」詩姐笑佢。
「驚...驚？！我...我...我梗係唔驚啦！玩...玩咪玩！」
「哈哈哈哈！！！唔驚咁就玩啦！」一聽到佢講到口窒窒就知佢係驚！一定好驚玩機動遊戲。
「真係要玩呀？」係行緊去過山車嘅途中，傑仔再問。
「你驚咪唔好玩囉！係下面等我哋囉！」詩姐講。
「…玩！當時玩啦！我先唔驚！」
係排緊隊嘅時候我哋都不停聽到尖叫聲同大笑聲，而傑仔亦都皺晒眉頭，個八字眉出晒嚟，我哋都不停係到笑佢。
皆因我哋有成8個人，所以就分兩排坐。我同阿雯、傑仔同詩姐坐第一排，其他人就第二排。
個種速度感真係好舒服，啲風迎面吹埋嚟好清爽。除咗我，其他人都係度尖叫。
「嘩～真係好正呀！好想再玩過呀！」玩完落到嚟阿雯即刻講。
「睇吓啲相先啦！」
我哋一齊去睇吓頭先係過山車上面個啲相。
一睇返啲相，阿雯就指住我幅相笑，相入面嘅我真係冇表情，同其他人好唔同，其他人都係擘大雙眼，擘大個口尖叫，得我冇。再睇吓傑仔張相，佢個樣係合實對眼，八字眉，擘到個口好大係度叫，一睇到我哋就瘋狂係度笑佢！
之後我地再決定玩多一次，要辛苦傑仔再陪我哋經歷多次地獄之旅。
因為我哋都心知傑仔係唔玩得機動遊戲，亦都決定放過佢，但係我哋之中有啲人仲想玩機動遊戲，所以就分成兩組，一組就睇動物，一組就玩機動遊戲。
而我就當然係玩機動遊戲個組啦！除咗我，仲有阿雯同埋阿霆仲有威威。
玩完過山車，我哋就稍移玉步去玩隔嚟嘅機動遊戲，坐係上面係咁自轉，又360度搖擺，充分感受個重力感。個種重力嘅感覺，離心力都好正，同埋上到去係高空俯瞰成個樂園嘅感覺好特別，我好鐘意。
「你又係冇叫到嘅～」阿雯講。
「佢好大膽架！咩都夠膽玩，呢啲對佢嚟講濕濕碎啦！」阿霆係一邊講。
「要令到你叫真係做唔到。」
「唔係喎～跳樓機應該得。」我突然諗起就講。
「啲人講到好恐怖，好快，搞到我都唔敢玩，我畏高架嘛～不過我一直都想試，睇吓係咪真係咁恐怖。」
去嘅過程我都好緊張，始終都未玩過，一直都係聽人講，好似好恐怖咁，係咪真係咁恐怖呢？
坐到上去，綁晒安全帶就準備開始。
首先架跳樓樣慢慢咁上到最高，然後再急速下趕一段距離，再上返去，咁樣來回咗幾次。
「嘩！真係好高呀！」阿雯望住下面講。
「嘩～唔敢擘大眼呀！」坐我另一邊嘅阿霆同威威都好驚。
玩完之後，比想像中冇咁高，又唔係真係好快。
「真係好正。去食飯咯，我都餓喇。」落到嚟阿雯就講。
我睇睇手錶，發現而家都真係係時候去食個飯，於是乎我哋4個就近近地去係位於跳樓機隔離嘅餐廳食飯。
入面有港式茶餐廳嘅嘢食嘢飲。而除咗港式嘅嘢，仲有東南亞風味啦，例如咖哩、叻沙、海南雞咁樣。
不過我哋就嗌返香港嘢。食緊咁美味嘅午餐嘅同時，好好彩俾我哋坐到近海嘅位置，有無敵大海景送飯，正！
食完個美味嘅午餐，打埋卡，當然就係繼續去玩啦。首先就去睇吓動物先，始終呢個主題樂園嘅賣點都係各種各樣嘅動物。
我哋沿注地圖上嘅路線一直行，行咗好耐終於到咗燙魚館、鱘龍魚館同埋水母館。
「啲水母真係好靚呀！」出到嚟阿雯就一直係度回味頭先嘅入面嘅水母。
相反鱘龍魚同埋鯊魚都冇咩特別。
之後嘅雪狐館同埋南極館，阿雯都一直好興奮，不斷係度影相自拍。
「注意下言行舉止啦。」
「呀，係喎，唔好意思，我太興奮喇～」
「你咪由得佢囉，咁啲雪狐嘅姿態又真係幾優美嘅。」
「但係咁落去，我哋唔洗去其他地方玩囉～」
每個地點，阿雯都停留咗好耐，睇好耐，去到買紀念品個時又係睇好耐，但最勁嘅係最後咩都冇買到，唉～
「我哋落返去喇，你哋點呀？」睇完北極熊離開咗北極館，威威同阿霆同我哋講。
「咁快落去？」
「講就咁講啫，唔通成日都做兩個電燈膽咩？」阿霆走埋嚟我耳邊細細聲同我講。
「就咁啦，我哋走先喇！今晚再見啦！」
於是乎我哋就兵分兩路，佢哋就落返去，而我哋就繼續留係呢度。
「佢頭先細細聲同你講咩呀？」分開咗之後阿雯就問我。
「冇呀～就...佢哋落去有嘢做啫～我哋去玩喇。」
我心目中一早就已經有個目的地，去埋個度玩我哋就落返去。
行咗好耐好耐，真係好耐，仲要係大熱天時行，就感覺行得更耐～
「我就係想玩呢個喇～」我哋拖住手行去一個過山車。
「又係過山車？」
「係呀，呢個我都冇玩過，呢個過山車嘅賣點就係可以睇到漂亮嘅山景同海景。」
「估唔到喎～有嗌喎今次～係驚吖？定係興奮先？」玩完之後阿雯就係度講。
「都有，不過應該驚多啲～」
「驚咩呀？」
「高～」
之後我哋就落去玩最尾一個機動遊戲，就係飛船，保證濕身。
「嘩～救命呀！」「上面淋水落嚟呀！」「入水呀！」
全程我都係咁樣嗌，我都唔想濕身，應該冇人想濕身。
玩完之後，無可避免就梗係一定濕啦！好彩阿雯有戴衫換，但我就冇戴，所以我要一直濕住咁行，不過呢個天氣，好快就會乾，所以問題不大。
睇返錶，見到都已經6點幾鐘，我哋就決定咗再去玩多一個機動遊戲，真係最尾一個，就係摩天輪。
上到去摩天輪都7點幾8點鐘，個天都已經黑晒，個海都一片黑色。我哋就望住一片黑暗享受呢段短短嘅旅程。
「話咁快就最尾一年喇，係度讀咗5年，唉～真係好唔捨得。」
「我都係呀，雖然讀得一年，但係呢一年我都有好多美好嘅回憶，我都同樣好唔捨得。」
「其實，唔係一年，係半年，得返半年，都唔知點算。」
「天下無不散之筵席。事實已定，唯有樂觀啲面對，珍惜呢個最後嘅半年，把握呢個最後嘅半年，創造更多美好嘅回憶！」
「唯有係咁啦。」
究竟天下有冇不散嘅筵席？
我哋玩完咗之後就搭纜車返落去同佢哋會合，一齊去水族館入面。一路望住各種各樣嘅魚類一路食晚餐。
最尾最尾，我哋去返早上嘅個個水池一齊影相，晚上嘅水池有不同嘅顏色，姐橙黃綠藍靛紫，漸變落去，非常漂亮！
返到去，我哋就變返做一個為DSE努力嘅中六學生。