美好世界的沉思者/ADVANCING (重製): 25. 未來？
去完學校旅行，開心咗成日之後，返到嚟就當然係要繼續上堂。而放完個復活節假，去埋個旅行，一直去到放暑假都冇咩大假又或者活動，所以呢兩個月都真係幾悶下。而又因為我地都已經中五，學校老師又好體貼咁為我地安排咗補課，我地嘅暑假8月先會正式開始。
係對上一次嘅期中測驗嘅時候，基於阿雯嘅成績並不理想，個時我就同佢約定咗係今次考試之前要一齊溫書，每日溫，每個星期都溫，實質上當然唔係啦，日日溫死得架喇！
而我哋考試嘅時間係6月1號開始，歴時半個月，去到18號。
其實唔止我同阿雯，我見到我四個朋友佢地都好落力，上堂都有留心聽書，抄筆記。
經過日復一日沉悶嘅上課日以及日以繼夜，夜以繼日嘅溫習時間，惡夢般嘅考試終於來臨。中文兩日，英文兩日，數學一日，通識一日，兩科選修兩日，有啲讀多科就考多日。
至於口試係稍早之前已經考咗，而唔知係好定唔好，今年係最後一年有中文口語考試，之後都冇。對於冇咁叻嘅或者係好；叻嘅就冇咁好。但我係中游位置，兩邊都唔係。不過我至知道咁樣代表廣東話地位開始下降，顯得唔重要，相信我地香港人嘅語言會消失，擔心香港文化會完結，唔知香港之後會變得幾咁面目全非......
呢半個月，要考嘅日子就返去考，唔使考嘅就留返係屋企溫書。而話快唔快，話慢唔慢，短短嘅半個月就咁就過咗去。而一完咗我地就當然係去玩放鬆下啦，雖然得個兩日。
「嘩～好耐冇嚟過啦～」入到去保齡球場個時阿雯就好感嘆。
「係呀，都半年冇打過啦。」
「想當年，我哋都係係度識。」
「想當年？1年就咁快想當年？」
「1年都冇呀！8月底呀！我仲記得個陣時你係個變態佬嚟，哈哈哈哈～」
「我唔做個變態佬又點會被你識到我呢個絕世好男仔吖？！」
「係咪掉轉咗呀你？應該係你做變態佬先吸引到我呢個絕世好女仔嘅注意！」
我哋兩個打咗一陣波，捉返啲感覺返嚟之後又再打賭！
「我哋兩個嚟鬥一次吖？」阿雯扔出一個strike全中就問我。
「我哋上年都鬥過一次，個次仲要俾我贏咗，要你聽我話一年！」
「提下你，呢一年仲未完架！」
「宜家都做咗你男朋友啦，呢一年完咗未關事咩？」
「btw，今次你想賭咩先？」
「嗯...有！我贏咗嘅就你要永遠陪住我！留係我身邊！唔可以離開我！同患難，共生死！」
「咁大賭注呀？咁我個個都要大啲先得！」
「就...我贏咗嘅話你要永遠陪住我！留係我身邊！唔可以離開我！同患難，共生死！」再加埋你聽我話...一世！」
經過一輪激烈嘅爭鬥之後，結果以一分之差又係我輸咗！
「願賭服輸！你記得要做啲咩架嘛？」
「記得～我會永遠陪住你！留係你身邊！唔可以離開你！同患難，共生死！」
「好嘢！咁我哋一齊返屋企喇！」
—————————————————
返翻學就即刻派卷，今次派卷真係緊張好多，始終都係每年嘅大考嚟，而且對於升唔升到班都好大影響。
睇吓個分先，通識好彩仲係合格嘅。至於中文方面，對比返上次係有好明顯嘅進步。至於口語方面，無論係中文抑或英文，都係維持返係中等水平。
睇返阿雯個邊，最緊張嘅都係數學同物理呢兩科。
「今次點呀？」派咗數學卷之後我就問佢。
但只見佢攞住份卷，眼中就露悲傷情感，水汪汪咬晒唇咁貌似想喊咁。
「唔緊要嘅，再繼續努力囉。而且又唔係DSE，唔洗咁傷心喎。」見到佢咁嘅表情我即刻攬住佢俾安慰佢。
「你睇吓。」佢遞咗份卷俾我睇。
我睇咗下，再睇真啲，捽下對眼再睇多次。
我冇睇錯，係期中測驗個時得59分，宜家竟然進步到81分。
「你咁高分點解仲咁嘅樣嘅？」
「玩你咋傻豬～不過卷二就真係差啲啦～」
再睇吓佢卷二，真係比較差，得66分，拉低咗個分。
「唔緊要啦！你今次都已經好大進步㗎啦！」
去到派選修科科個日。講返生物先，我個分都中規中矩，至於阿雯個分都只係低我少少，不過都唔算差。
上次期中測驗個時肥咗物理科嘅阿雯今次大考佢嘅物理科成績到底會點樣呢？
係派卷嘅時候我哋都好緊張，首先我攞咗兩份卷，都係我嘅預想之中。
然後就睇返阿雯，攞完份卷但就唔夠膽睇。
「幫我睇吖。」返埋位佢就俾晒兩份卷我。
我睇咗睇，卷一52，卷二48。只可以講一言難盡，我都唔識講。
「係咪好差呀？」
「Er…唔...」我真係唔知點講好，個分真係樣衰咗啲，但又有進步喎，唔差得晒嘅。
「咁即係係啦，都估到架啦～」
「又唔好咁講～我覺得好好架喇！有進步吖！拉返勻都有...50分吖！」
「你估我係你呀？！唔夠分入大學都唔知點好～」
「放心啦～仲有一年時間，可以慢慢追！」
「一年都冇呀！」
「無論點我都會陪住你架嘛，開心傷心都好，我都同你一齊開心傷心，所以我宜家都好心痛架！但係有你係我旁邊，記得我有你，呢啲心痛都不值一提。同你係埋一齊，幸福嘅感覺係大過心痛嘅感覺。」
「你最開心嘅時候係幾時吖？」
「同你一齊嘅時光。」
「咁咪係囉。我會一直陪你幫你，等你可以考到高分，做狀元，到時仲驚入唔到大學？」
「咁我哋咪唔可以一齊讀書囉～」
「你都會幫我架嘛！情侶係兩個人，做咩事都係兩個人，大家嘅背後都有大家。愛情都係互相幫助，互相支持，互相愛護，互相遷就，互相扶持，互相依賴。宜家我哋就係互相扶持！互相幫助！」
「咁...一齊加油。」
考完試派完卷之後，都係返學玩下咁樣，做吓啲無謂野。
而時間方面都係返半日，朝頭早就放學。
所謂嘅無謂野其實就係聽下班老師講野，睇下表演咁，然後就Last day。呢日返嚟都係聽下老師廢噏，校長廢噏，家教會嘅人廢噏，頒下獎咁，返到班房派下成績表睇下自己全年成績同埋出年升唔升到班。
不過全日最重點都係向大家講再見，然後一齊影相留下紀念。不過其實又唔係畢業，而且暑假都仲會再見，講留念都好怪，不過總係會係最尾一日一齊影相。
雖然暑假期間要返學校補課，少咗時間玩，但係我哋都有共識，嚟緊我哋嘅拍拖活動相信絕大多數都係溫書、溫書同埋溫書。
「得返唔夠一年就畢業，時間真係過得好快。」放學個時我係度呻。
「雖然我入咗嚟只係短短一年，但我都感覺到個種不捨嘅感覺。」行係我隔離嘅阿雯講。
「無論考得好唔好，路始終都要行；畢咗業，大家都會各有各忙，絕對會少咗時間見面，有時想見個面都好難約到......」
「所以淨低嘅時間要好好珍惜，創造更多美好回憶。」
「你啱，不過...唔知未來會點呢......」