美好世界的沉思者/ADVANCING (重製): 24. 青春之地
緊接運動會之後嘅白色情人節我同阿雯都係好似平日咁過，因為咁啱又係要返學，而佢叫我唔好再買禮物。
之後就要開始準備4月嘅期中測驗，一直以嚟我都冇好好認真溫過書，下學期教嘅嘢我都係靠上堂聽書，考完放埋個復活節假返嚟就派卷，而今次成績都冇咩太大分別，阿雯都冇講到啲咩。
「好喇，測完驗，宜家有啲好消息同大家宣布。」我哋嘅班主任Miss Cheng朝頭早向我哋全班講嘢。
「下個禮拜五我哋會去學校旅行，而今次我們呢級會去戶外康樂中心，食飯我哋會係個度嘅餐廳食，所以大家唔使自備喇。記得簽家長回條返嚟。」
我哋睇晒啲詳細就收埋上堂。
時間眨下眼就過，今日就已經係星期五，亦即係旅行日。呢一日我哋著晒體育服，首先返學校集合，再搭車去旅行地點。
到咗之後首先就要聽啲營地簡介、須知、注意事項，都係咁樣。
聽晒冗長擾人嘅簡介之後就放咗我哋去自由活動。
我哋集合晒之後就係度傾去邊度玩，但我地都唔知有咩玩，所以我哋一齊睇係個度嘅場地平面圖。
「有卡啦ok喎～」詩姐講。
「通常政府嘅卡啦OK都冇歌唱嘅。」威威講。
「未必嘅，我都想唱K。詩姐，我陪你去唱？」傑仔講。
「打唔打籃球呀？咁啱我哋4個人可以2打2。」阿霆講。
「好喎！好冇呀？」我呼應咗佢之後再問我隔離嘅阿雯。
「你想去咪去囉，問我做咩啫？」佢話
「咁我一陣再搵你。」
最後詩姐、傑仔仲有一個女同學去唱K；我、威威、志偉、阿霆就去打籃球；阿雯、娟姨仲有另外一啲同學就去咗第二度。
而係我哋去緊籃球場嘅時候，阿霆吸引咗幾個女仔跟住咗我哋...跟住佢去睇佢打波。
猜咗一輪之後，我同阿霆一隊，威威同志偉一隊。
我哋打緊嘅途中，坐係側邊嘅幾個女仔都係度幫阿霆加油打氣，同埋影相。
打咗一輪之後，因為我哋都頂唔順個幾個女仔嘅呼叫聲所以單方面提早終結呢場比賽，故意放水俾阿霆，等佢可以瘋狂入波得分。
「你班友，做咩突然放晒水咁呀？」聰明嘅阿霆一眼就睇得出我哋放水。
「冇呀！邊有啫，打得耐攰吖嘛！」
「阿霆！你好勁呀！」「好型呀你！」呢個時候隔離幾個女仔衝咗過嚟阿霆度。
「嘩～阿霆，你睇吓你...我哋都係唔阻你哋啦，你哋慢慢啦，拜拜！」我哋借呢個機會賣甩班女仔，對唔住呀阿霆，要犧牲你，不過值得嘅！
「喂！喂！喂！～」阿霆係幾個女仔嘅包圍下向逐漸遠離嘅我哋發出咒罵。
打完波我哋就入返去嘆冷氣抹下汗。
企下行下諗下咗一陣我哋就落去桌球室，桌球我哋都唔係好曉，無論係英式桌球抑或係美式桌球都唔曉，但係睇電視都知道係點玩，知道打波嘅順序係點樣，但其實係玩吓啫。
我哋見差唔多時間就同阿雯同詩姐佢哋集合，至於阿霆就...唔理喇，佢會同班女仔一齊嚟餐廳食飯架啦哈哈！
「點呀？有咩歌唱？」一見到詩姐佢哋就問。
「真係冇，全部都舊歌嚟。」詩姐好沮喪咁講。
「咁你哋仲做咗啲咩呀？」
「都係周圍行吓咋～」
「你哋呢？一直都係打波打到啱先呀？」阿雯問。
「仲打咗桌球。」
「哦～係喎，阿霆呢？」
我哋講返頭先個情況俾佢哋聽。
「咁賤架～」詩姐一路聽一路笑。
講下講下我哋就行到餐廳，而阿霆過咗一陣都到埋，而佢隔離都跟住咗頭先幾個女仔，而我哋成枱人都望住佢係度笑。
講返我哋嘅食飯安排，我哋係10個人一枱，總共11枱，有一枱係成班老師坐嘅。
我哋呢枱當然就有我、阿雯、娟姨、傑仔、志偉、威威、阿霆、仲有另外三個同一班嘅女仔。
今餐我哋有六餸一湯，白飯任裝。食完我哋就坐喺度唞吓玩咗陣手機就繼續出發去玩。
呢個營地事實上真係好大，但係玩又唔係真係好多嘢玩。我真正想玩嘅嘢，偏偏都因為要事先報名而冇得玩，真係可惜～
我哋暫時仲未諗到要做咩好，我們就離開中心大樓出去周圍行吓，沿途俾我哋發現咗有條徑可以行下，好奇心驅使下我哋就沿住呢條徑行。落去之前我都幫我地兩個噴蚊怕水同貼蚊怕貼。
一直上上落落都見唔到有其他人，可能其他人都去晒玩，冇興趣嚟行山呢啲咁悶嘅活動。
一路上不停穿插係一片綠油油嘅樹林之中，感受大自然嘅滿園春色，欣賞大自然嘅奇妙之處，體驗大自然嘅清新空氣。
「好靚呀～」阿雯突然感歎。
「咩靚呀？」
「大自然囉。」
「望住呢片山林，吹住涼風，成個人冇晒煩惱，冇晒壓力，好舒服。」
「你仲靚啦！望住你仲舒服添～哈哈哈～」
「講咩呀你？冇嚟認真。」
「平時都唔會有機會接觸大自然，每日都活係石屎森林之中，根本都冇機會欣賞到咁靚嘅翠綠山景。生活節奏急促，每個人每日都係度趕頭趕命，壓力大到爆煲，就咁行係街頭，空氣都已經沉重到透唔到氣。」
「咁就要把握今次難得嘅機會好好睇到夠喇！」
我哋一齊拖手，吹住風漫步於一片蒼翠之中。間唔中就攞出手機影相，將呢片靚景試圖永恆地留在手機之中，記憶之中，我哋嘅心中。雖然個景係一樣，但親眼睇同透過手機睇，感覺始終都唔一樣。
「原來呢度有燒烤場架喎～」行下行下我哋到咗燒烤場。
「可惜吖～我哋都冇得燒。」
「好想燒嘢食呀～」
「你睇吓個燒烤場，咁細，邊度夠我哋全級一齊用呀？」
「下次我哋再自己買嘢自己出去燒囉。」
「嗯！秋天個陣去！」
「好！」
宜家係春天，加上我哋身處於山林之中，所以難免都會有一啲蚊滋打擾我哋，做電燈膽。好彩嘅係，我一早就做晒防蚊措施，我哋先免受俾蚊咬嘅痛苦，不過我哋都急急腳離開呢條生態徑返返去。
行緊返去嘅時候，我咁啱見到一個與呢個環境完全格格不入嘅畫面。一片翠綠嘅山林之中，遠遠有一棟棟用混凝土構造嘅人造物，心中突然湧中一絲感慨。究竟保育與發展，能不能夠並存呢？
返去到嘅時候，我哋都決定好跟住要做啲咩，就係去壁球室。
雖然就未打過，但都睇過啲片見到人地打，而實際上打起上嚟又真係幾易。
「吖！」「呀！」「嘩！」但反觀阿雯，佢個表現就比較差，望住個波高速彈去佢面前唔係揮拍打返去，而係發出高八度嘅叫聲同埋跑走，而我就係側邊係度恥笑佢。
「笑笑笑！笑咩喎？！咁我真係唔識吖嘛！」
「唔笑唔笑！一啲都唔好笑！」但講緊呢句嘅時候我都係度笑緊。
「你自己打啦～我唔識呀。」
「咁唔打呢個，我哋去玩第二啲嘢。」
離開咗壁球室，我哋就轉戰去玩氣墊球，咁啱就撞到娟姨同志偉佢哋玩緊。
佢哋都察覺到我哋係度睇住佢哋玩。
「你哋拍完拖喇？」
「仲拍緊，我哋嚟呢度係想玩氣墊球架。」
「咁俾你哋玩啦，我哋玩咗好耐喇。」
玩咗一輪之後，結果同壁球室嘅情況完全相反，阿雯佢大炒咗我。
「30-2」係隔離計住分嘅志偉講。
「好唔掂喎你！係咁俾佢入球都有嘅？！」
「我...我...我讓佢啫！」我臨時作一個藉口嘗試掩蓋我廢嘅事實。
「廢你就廢啦！」
「1-0～」阿雯行過嚟同我講。
「1-0？應該1-1喎！頭先你一球都打唔到！」
「你頭先有話比賽咩？有計分咩？」
「...哈…ok～」
「你贏！」
「好嘢！」
時間都差唔多，我哋全級集合晒點晒人數就上返車返去，而相信因為大家都玩咗成日，全車人同頭先去嘅時候不停傾計唔同，個個都瞓晒覺，包括我。