美好世界的沉思者/ADVANCING (重製): 23. CONCERTO
萬眾期待嘅陸運會即將到來，我哋嘅陸運會今年就會係3月搞。
所有人都可以唔使上堂兩日，之後仲會有一個日嘅假。大家都會係呢一日開開心心咁玩、傾計同影相；而有啲人就會報好多項目，全力準備。
而我當然都會報一兩項玩下，同時因為我係童軍，開幕禮同閉幕禮我都要負責。但其實我都唔想去，要帶多套衫帶多對鞋去換。
而最衰嘅係個老師搵埋我去當值，要企成日，又悶。
「你哋報啲咩呀？」上體育堂個時阿霆問。
「1500囉！」1500即係跑1500米。
「咁辛苦！唔喇，我一定會中途瞓低架！」
「咁你報咩呀？」
「推鉛球囉！」
經過我哋一番討論之後，就報晒想報嘅項目，之後就同班男仔一齊出去打波。
「之前都冇留意到，原來你打波都叻個喎。」食飯個時阿雯同我講。
「唔叻架，佢地就住我咋。」
「唔會嘅～我男朋友咁叻！」
「哈！係喎，你陸運會報咗啲咩呀？」
「100米、跳遠仲有...鉛球。咁你呢？！你又報咗啲咩呀？」
「1500米同跳遠囉。」
「1500咁勁？！」
「玩下啫，又唔係要攞冠軍。」
「不過我個兩日要當值，陪唔到你喇。」
「吓？有冇得唔去架？」
「唔緊要啦，幫下老師手嘛，都最後一年啦。」
「咁好啦。」
—————————————————
到咗陸運會當日，返到去之後我哋就分批搭車去運動場，而我哋制服團隊就獨有一架車。
「腎仔，我想問呢～，趙樂傑份人點架？」係去程嘅途中，坐我隔離嘅詩姐問我。
「做咩咁問呀？」
「答咗我先啦～」
「佢呀，嗯...份人好衝動，但又好細膽，成日都傻傻地咁囉～」
「有冇啲正面啲架？」
「正面？重情重義，坦率，樂觀。」
「咁～佢有冇拍過拖架？」
「以我所知...就冇。」
「做咩呀？鍾意人呀？」
「痴線！」
講講吓我哋就已經到咗運動場，首先就係整理下咁樣。然後等埋其他所有人都到齊晒個開幕典禮就開始。我哋呢部分完咗，就升旗起歌。搞掂晒聽完校長講野，今屆陸運會就正式開始。
—————————————————
「詩姐，幫我拎上去吖。」因為我要繼續留係下面做野，我就叫停準備上去嘅詩姐，拎起我嘅書包俾佢。
「哦，拜拜。」
留係下面都
真係幾難受唔係真係咁差，起碼因為近跑道，所以可以近距離清楚望到比賽。
講返先，我有參加嘅項目入面1500米係第一日嘅上午比賽，跳遠就係第二日上午。
做做下野，聽到廣播話1500米要集合，我就上返去攞運動衫落返嚟換衫，再上返去同阿霆同埋威威一齊過去集合。我哋三個人其實得阿霆係認真準備，我同威威都係陪跑，為嘅就係完成呢一個唔簡單嘅賽事，始終呢個都唔係一個咁易嘅賽事，好多人都冇勇氣跑到就冇報。我都係冇諗過會跑到會贏到，但咪當落去玩下，至少我都勁過唔少人，夠膽報。
無論係男子1500米定係女子1500米，都係有好多人參加，斷估都超過30人。而除咗我哋一班學生之外，都有啲老師助興參加埋一份，有啲就準備充足，拉晒筋咁樣，有啲就成個肚腩都去玩，真係佩服！
場上面可以聽到看台上面嘅人係度熱烈為我哋每一個人加油，但最大聲最響嘅當然就係一眾老師同埋阿霆！
跑完之後，最後阿霆攞咗亞軍，我哋就當然冇攞獎。而我哋都見到有其他人係度玩，火影跑、跑online都有！
跑完之後我又做下野咁就同班朋友一齊出去食飯，至於阿雯就就同佢班姊妹一齊。
「好野啦！攞到亞軍！」
「好彩啫。」阿霆戴住佢個獎牌好謙虛。
「又唔見我地好彩？」威威講。
「你廢啫～你個零跑人。」
「係呀！我影咗好多相，返到去send俾你哋睇！」傑仔攞住佢部單反講。
「出到嚟都攞住部單反，唔重架？」
「重架，但我寶貝嚟，一定要跟身！」
「嚟！你一陣要擲乜擲盛，又要扔樣個樣，俾多舊雞你，冇獎嘔返俾我！」志偉夾咗佢隻上面一舊雞俾傑仔。
我哋食完飯就返去繼續我哋嘅陸運會，至於下午同我哋有關嘅賽事都唔多，都係得傑仔嘅鉛球同鐵餅。可惜嘅係鉛球同鐵餅嘅比賽場地係成個運動場最邊邊嘅位置，所以我都睇唔到佢比賽時嘅英姿。
「有冇獎呀？」佢比完賽之後經過我就捉住佢。
「有！睇吓！」佢拎起掛係佢條頸嘅獎牌。
「亞軍？！叻仔喎！」
「平時都唔知你咁大力嘅！」
「呢啲咪叫禾稈冚珍珠囉！」
「唔講喇！上去先！」
「陪下我啦～我好悶呀！」
「你自己慢慢受啦～拜拜！」佢條友吖！
去到第一日嘅尾聲，我就返上去同佢哋一齊離開運動場搭車返屋企。
因為我做咗成日野，返到屋企已經散晒，所以換晒衫我就宜接上床瞓覺。
—————————————————
去到第二日，今日同尋日唔同，我地係跟班車去，而今日第一場比賽就係跳遠，我同埋阿霆，威威，志偉都有份參加。
去到等咗陣半個幾鐘我哋就聽到廣播去集合，再同其他參賽者一齊去跳遠個沙池度。
我見到跳遠都有10幾20個人跳，每個人都會有1次試跳同埋2次正式跳嘅機會，成績就攞最好個次。因為有好多人嘅關係，所以都用咗唔少時間。
而係隔離跑道上同時都進行緊200米嘅男子賽跑比賽。
在場嘅每個人都好俾心機跳，真係為咗贏而跳。而仲未輪到我哋跳嘅時候就當然係傾計同埋拉下筋。
結果我都係冇獎，而阿霆就在我哋預計之中，攞咗冠軍，佢就要留低頒獎影相，我哋都唔等佢上咗去先。上到去唔見阿雯我就落去做野。
就係上晝，志偉同傑仔嘅標槍都進行埋，我都借咗阿Sir嘅望遠鏡觀看佢哋嘅英姿，可惜嘅係佢哋並冇得到任何獎，呢個都係佢地嘅預計之內。而阿雯嘅推鉛球都完咗，聽佢講雖然佢夠力，但手勢完全錯晒，所以不停俾人foul。
食埋飯返嚟就繼續下晝嘅賽事，而宜家跑道上工作人員係度擺緊啲圍欄，調較緊啲欄嘅高度，好明顯下午嘅第一場賽事就係跨欄。
下晝嘅節目除咗有跨欄之外，仲有其他傳統賽事嘅決賽。之後就有四社接力賽、班際接力賽以及師生接力賽，三個都係跑400米。
跨欄方面，因為我係下面嘅關係，所以可以好清楚見到跨欄比賽。原本我見到阿霆係可以攞到三甲，可惜佢臨尾唔小心整跌咗個欄仆街。
「賢！你有冇帶運動衫？」企企下我個社嘅嘅社長，方Sir走過嚟搵我。我同佢都好熟，就係因為佢份人好和善，冇老師嘅架子，同學生之間係朋友而唔係師生，初中又教過我哋藝術，就好熟。
「有呀，做咩呀？社際接力呀？」
「係呀，男子甲組差一個呀，幫幫手吖。」
「但係我都唔跑得。」
「玩吓啫，贏輸冇所謂啦！」
「你話架！一陣差唔多時候同我講我就去換衫過嚟啦。」
「就咁話！」
至於班際接力就冇我份，但當中緊係有阿霆。而師生接力就唔使講，完全係揀啲跑得嘅人落去跑，所以就冇我份。
好快傳統賽事完晒，就嚟到社際接力。
社際接力係4x100，4個人每人100米；分開男女子，各自又有甲、乙、丙三組，每組每社又有兩隊，總共48隊。
我就擔任第一隊第一棒，望住前面嘅人嘅比賽，聽住四個社嘅加油打氣聲，我真係又驚又緊張，驚自己會累到成隊輸晒，輸都唔緊要，唔想輸得太明顯，唔想做包尾嗰個。
落到場，真係不顧一切奮力向前跑，一味將隻手伸到最前，盡快交枝棒俾第二棒。最尾結果點我都唔知，只係知係我哋個社衝咗線，但衝線嘅係第一隊定第二隊我都冇深究落去。
班際接力方面，我哋都係靠住阿霆攞咗冠軍。
時光飛逝，終於嚟到呢屆陸運會嘅尾聲，閉幕禮亦都開始，成個安排同開幕禮一樣，最尾聽埋國歌校歌降埋旗送走埋嘉賓我哋就放學離開，返到去可以慢慢唞，因為聽日係運動會後補假。