美好世界的沉思者/ADVANCING (重製): 18. 美好與欣喜

「你坐低先吖，我去個廁所。」

「嗯。」講完我就周圍行，觀察下呢個屋企。

上到佢屋企先發覺同我屋企係兩個世界咁，佢屋企好乾淨，我屋企就好亂；我屋企好暗，佢屋企就光線充足。

廚房就有嘅嘢有，冇嘅當然冇。煮食用具都好多，煎pan、鑊、唔同大細嘅煲、焗爐等等。鑊鏟、湯勺、鉗等等。實在太多，不能盡錄。

睇完廚房，個廳係入嚟個時都見到，中間有一張茶几，側邊有張大嘅梳化，隔離就有張細嘅梳化，對面就有一個矮組合櫃，上面擺咗部電視機。除此之外，仲擺咗一啲嘅盆栽，但我唔識所以都唔知種嘅係咩。





去到重頭戲，就係參觀阿雯嘅閨房，我屏住氣息，懷住期待嘅情感打開門入去。入面我一眼睇晒，床、書枱、衣櫃、衣架。張床係黑色，衣櫃係黑色，凳煲黑色，衣架都係黑色。睇嚟佢喜好同我都差唔多喎～都鍾意黑色！

而係電腦枱就冇太多嘅裝飾，只係有兩個相架，一個係一男一女嘅合照，一個就係兩個男女同一個女仔嘅合照，相信呢兩個男女應該就係阿雯嘅爸爸媽媽，個女仔就係阿雯。

而阿雯係相中嘅佢就係佢細細個陣，眼大大，天真可愛，純潔善良。

「做咩呀係度？」後面突然出現咗把聲。

「吓？！」我下意識拎轉頭睇，原來阿雯已經去完廁所出嚟。
「冇呀，參觀下你間屋囉～估唔到原來你嘅喜好係同我一樣，鍾意黑色、簡潔、樸素、隨性！」





「嘻嘻！咁你會唔會都仲係咁鍾意我呀？」

「無論你變到點，我都一樣鍾意你！」

「但係我唔鍾意喎！」佢放開咗我自己行咗出廳。

「做咩呀？我認真架！你鍾意啲咩都好，性格變到點都好，樣貌變到點都好，我都會一樣咁鍾意你，永不改變。就算海枯石爛，都矢志不渝！」
我都跟埋佢行出去，從後一下將佢抱住。





「我唔係講呢個。」佢拎轉頭望住我。
「間房都唔係我嘅，我爸爸架。！唉～失望。」佢坐咗係梳化度。

「吓？呀...sorry呀雯雯，我冇心架～」我挨係佢膊頭嗲佢。

「…講下笑咋！傻仔！」

「吓？」

「係咪想睇吓我間房呀？嚟啦！」佢企起身拖住我行下去佢間房，間房嘅位置就係佢阿爸間房嘅斜對面，走廊最入嘅個間房。

一入到間房就好明顯睇得出係女仔房。藍色嘅牆身，白色嘅床上仲有仲有個粉紅色嘅心形咕𠱸。隔離嘅書枱上面有部手提電腦，有個藍牙喇叭，一啲嘅擺設，仲有幾個相架。而另一邊張枱就有幾個櫃桶，上面就擺咗一塊鏡，隔離就有一大堆嘅護膚品同埋化妝品。當然仲有一個衣櫃，隔離張枱就有一啲嘅零食。

「係咪同我爸爸間房好唔同呢？！」





「係呀！同你好襯，好似你！」

「你睇吓，你送俾我嘅水晶kuromi我有放出嚟架！條鏈我都成日戴住唔除架！但係我送咗隻錶俾你都唔見你戴過...」佢係件衫入面攞條鏈出嚟俾我睇。

「咁...我見隻錶咁靚，又係你嘅一番心意，我唔想整污糟整花佢，咪擺係屋企好好珍藏囉～同埋，條鏈係要除架，沖涼要除，瞓覺要除。」

「你做粗重嘢做運動個時先除囉。一係...我送多隻陀錶俾你？」

「唔使喇，其實我好少會睇錶，都係睇手機多～」
「不過...你好似都好變態喎～曬我啲相出嚟擺喺你床頭度。」

「你就變態！張相我同你嘅合照嚟架！」

「係喇係喇～幾時煮飯呀？我餓喇。」





「想食女朋友嘅手勢呀？求下佢啦～」

「我想食你親手整嘅食物，求下你吖～」

「唔...咁好啦！你坐低乖乖地等啦～好快有得食！」

「嗯！咁我出返去先啦！」我就出返去廳睇電視。

睇咗一陣之後，阿雯佢就攞住一碟碟餸出嚟開飯。

「咁多餸嘅，有咩名堂呀？」我望住每一碟餸，雙眼發光咁問佢。

「呢個煎蛋免治牛肉飯，跟住煎帶子、鮮菇木耳絲、炒高麗菜。」佢指住一碟碟餸講。

我即刻每碟餸都夾一舊嚟食。





「點呀？」

「一個字！好正！」

「好，正。兩個字嚟個喎。」

「仲有個字送俾你架！」

「哼～」

「嗯～我真係好幸福呀！識到個煮嘢咁好食嘅女朋友，又賢良淑德，又細心溫柔體貼善解人意！」

「口花花！」





食完飯我幫佢洗埋碗之後我就返屋企。

「送到嚟呢度得喇。」我哋一齊行到分岔路。

「咁快？！」

「我都唔想同你分開架～一秒都唔想！但我哋仲會見！我哋住得咁近，又一齊讀書，日日都坐埋一齊。」我哋相擁而吻就離開大家各自返屋企。

「拜拜喇！聽日見！」「嗯！拜拜！」